الماتىدا 2025 جىلعى تۋريزم سالاسىنىڭ نەگىزگى كورسەتكىشتەرىنە ارنالعان ءباسپاسوز-كونفەرەنتسياسى ءوتتى. 

ءىس-شارا بارىسىندا قالالىق تۋريزم باسقارماسىنىڭ باسشىسى عاليا توقسەيىتوۆا قالاداعى ۆيزيت-ورتالىقتاردىڭ جاڭا فورماتقا اۋىسۋى مۇمكىن ەكەنىن ايتتى. ونىڭ سوزىنشە، قازىر بۇل نىسانداردىڭ تۋريستەرگە كورسەتەتىن قىزمەتى شەكتەۋلى. 

– اقپاراتتىق ورتالىقتار مورالدىق تۇرعىدان ەسكىرگەن. باستى ماسەلە — زاڭنامالىق شەكتەۋلەردە. مەملەكەتتىك ورگان رەتىندە ءبىز اقىلى قىزمەت كورسەتە المايمىز. ال ۆيزيت-ورتالىققا كەلگەن تۋريستەر ەڭ الدىمەن دايىن تۋردى ساتىپ العىسى كەلەدى. سوندىقتان قازىر ينۆەستورلارمەن جۇمىس ىستەپ جاتىرمىز. ماقساتىمىز — تەك اقىل-كەڭەس پەن باعىت-باعدار بەرەتىن ەسكى فورماتتان حالىقارالىق دەڭگەيدەگى اقپاراتتىق ورتالىقتارعا اۋىسۋ. سوندا ساياحاتشى كەڭەس الىپ قانا قويماي، بىردەن تۋرلاردى ساتىپ الا الادى، - دەدى ۆەدومستۆو باسشىسى.

ەسكە سالايىق، بىرنەشە كۇن بۇرىن بۇتاقتى شاتقالىندا «بۇتاقتى» ۆيزيت-ورتالىعى اشىلدى. ۆيزيت-ورتالىق اۋماعىندا زاماناۋي سانيتارلىق-گيگيەنالىق توراپتار، تاماقتانۋ ورنى، تيمبيلدينگ پەن شەبەرلىك ساباقتارىن وتكىزۋگە ارنالعان الاڭدار، سونداي-اق مەكتەپ وقۋشىلارى مەن ءتۇرلى توپتارعا ارنالعان اشىق اسپان استىنداعى ءبىلىم بەرۋ جانە مادەني ءىس-شارالار وتەتىن ورىندار قاراستىرىلعان.

بۇعان دەيىن پرەمەر-مينيستر ولجاس بەكتەنوۆ سەنات دەپۋتاتتارىنىڭ ساۋالىنا بەرگەن جاۋابىندا ەلىمىزدىڭ قاي وڭىرلەرىندە تۋريستىك ۆيزيت-ورتالىقتارى سالىناتىنىن ايتتى.

Abai.kz