كۇنى كەشە الەۋمەتتىك جەلىدە الماتى قالاسىنىڭ اكىمى ەربولات دوساەۆتىڭ ورنىنان كەتەتىنى تۋرالى جازبالار جەلدەي ەسكەن ەدى. «جەل سوقپاسا ءشوپ باسى قيمىلدامايدى» دەگەن حالىق دانالىعى تاعى دا راستالدى.

بۇگىن تاڭەرتەڭ «مەملەكەت باسشىسىنىڭ جارلىعىمەن ەربولات اسقارۇلى دوساەۆ الماتى قالاسىنىڭ اكىمى لاۋازىمىنان بوساتىلدى» دەگەن رەسمي اقپارات اقوردانىڭ تەلەگرام ارناسىندا جارىق كوردى.

دوساەۆ «قاڭتار وقيعاسىنان» كەيىن باۋىرجان ساعىنتاەۆتىڭ ورىنىن باسىپ مادەني استاناعا اكىم بولىپ تاعايىندالعان ەدى. وعان دەيىن ءۇش جىل قاتارىنان ۇلتتىق بانك توراعاسى بولدى. 2014-جىلى قازاقستاندىق «Forbes» جۋرنالى دوساەۆتى ەلدەگڭ ەڭ باي 50 ادامنىڭ قاتارىنا قوستى.

دوساەۆ ساياسي، قارجى سالاسىندا كوپتەگەن ءلاۋازىم يەلەرى شىققان الماتىداعى و.جاۋتىكوۆ اتىنداعى فيزاكا-ماتەماتيكا مەكتەپ ينتەرناتىن بىتىرگەن.

2006-جىلى دەنساۋلىق ءمينيسترى بولىپ تۇرعاندا شىمكەنتتە بالالارعا جاپپاي ۆيچ ىندەتى جۇعۋىنا بايلانىستى قىزمەتىنەن بوساتىلدى. ارتىنان بيزنەسكە كەتتى. اراعا بىرنەشە جىل سالىپ جوعارى لاۋازىمدارعا يە بولدى.

وزىنەن بۇرىنعى اكىمدەر سياقتى دوساەۆكە دە حالىق باعاسى ءار ءتۇرلى. بلوگەرلەر ونىڭ حالىقپەن دوس بولماعانىن، «ۇرىسقاق» دەگەن مىنەزبەن ەستە قالاتىنىن جارىسا جازۋدا. قالاي دەسەك تە دوساەۆ مىڭ جەردەن بيزنەس تە، ساياسي ارەنادا تاجىريبەسى بولسادا الماتىنىڭ بۇرىننان قوردالانىپ قالعان پروبلەمالارىن ءبىر دەممەن شەشە قويۋى ەكى تالاي ەكەنى ايدان ايقىن ەدى. ولاي دەيتىنىمىز كەزىندە حراپۋنوۆ زاڭسىز ساتقان جەرلەر قالانىڭ ينفراقۇرىلىمىن رەتتەۋگە ءالى كەدەرگى كەلتىرىپ كەلەدى.

الماتى قالاسىنىڭ ءماسليحاتى قالاعا جاڭا اكىمنىڭ بۇگىن سايلاناتىنىن ءمالىم ەتكەن ەدى. پرەزيدەنتتىڭ ءباسپاسوز حاتشىسى رۋسلان جەلدىباي بوساعان لاۋازىمعا مەملەكەت باسشىسىنىڭ جارلىعىمەن دارحان ساتىپالدىنىڭ تاعايىندالعانىن جاريالادى. ول پرەزيدەنت اكىمشىلىگى ءبىرىنشى ورىنباسارى مىندەتىنەن بوساتىلعان..

Abai.kz