ساياسات نۇربەك قورعانىس مينيسترلىگىنىڭ ستۋدەنتتەرگە قاتىستى ارەكەتىن زاڭدى دەپ سانايدى.

عىلىم جانە جوعارى ءبىلىم ءمينيسترىنىڭ سوزىنشە، وقۋعا قاراعاندا اسكەرگە ەرتەرەك شاقىرادى، سوندىقتان ۋنيۆەرسيتەتكە تۇسكەن تالاپكەرلەردى اسكەرگە الىپ كەتىپ جاتىر، - دەپ جازادى ازاتتىق راديوسى.

“نازارباەۆ ۋنيۆەرسيتەتىنىڭ ءبىر ستۋدەنتىن اسكەري كوميسساريات اسكەرگە الىپ كەتكەن. نەگىزى بۇل جەردە زاڭ ساقتالعان. بىراق بىزدە جوعارى وقۋ ورىندارىنا قابىلداۋ مەرزىمى مەن قورعانىس مينيسترلىگىنىڭ اسكەري شاقىرۋ مەرزىمى سايكەس كەلمەيدى. نازارباەۆ ۋنيۆەرسيتەتىندە [وقۋعا قابىلدانعانى جونىندە] شەشىمدى شىلدە-تامىز ايلارىندا جاريالايدى. وعان دەيىن [قورعانىس مينيسترلىگىنىڭ] ستۋدەنت ستاتۋسىنا ىلەنبەگەندەردى الىپ كەتۋگە قۇقىلى” دەدى ساياسات نۇربەك.

ول قورعانىس مينيسترلىگىنە مەرزىمدى سايكەستەندىرۋ جونىندە ۇسىنىس بەرگەنىن ايتتى. بۇعان دەيىن ەلدە نازارباەۆ ۋنيۆەرسيتەتىنە تۇسۋگە وقتالعان ءبىر تالاپكەردى اسكەرگە الىپ كەتكەن ەدى.

ول دايىندىق كۋرسىنان ءوتىپ، جارناسىن تولەپ، وقۋ ورنىنان رەسمي تۇردە شاقىرۋ العان. بىراق ونى تۋىستارىنىڭ سوزىنشە، ەشقانداي شاقىرۋسىز، ەسكەرتۋسىز اسكەرگە الىپ كەتكەن.

Abai.kz