شىن مانىندە بۇل قازاق ءۇشىن وتە وزەكتى تاقىرىپ. بۇعان ءازىر ساياسي، مادەني-عىلىمي ەليتا نازار اۋدارىپ وتىرعان جوق. ويتكەنى بارلىق سالانى ەۋروكىندىكشىل يدەولوگيا كەۋلەدى. سانا سانسىرادى، مادەنيەت ءدۇبارالاندى، ادام ماڭگۇرتتەندى.

بۇل تاقىرىپ قازاقتىڭ كەمەل ينستيتۋتى - جەتى اتانىڭ ابدەن كۇيرەگەنىن بىلدىرەدى. بىراق ونىڭ ورنىنا ايەلدەر قاۋىمى قۇرعان جەتى انا ينستيتۋتى دا جوق...

تۇرسەنگالي الاگۋزوۆ (امال جوق، وسى جىگىتتى مىسال رەتىندە الىپ وتىرمىن، ايتپەسە ءاربىر ەكىنشى نەكە اجىراسىپ، كۇيرەپ تىنۋدا) ءبىرىنشى ايەلىنىڭ بالالارىنان ءوزىنىڭ اتىن الدىرىپ تاستاعانىن كۇرسىنە وتىرىپ جەتكىزدى.

بىلاي قاراساڭ، بۇل تۇرسەننىڭ "جەكە شارۋاسى، تاعدىرى". بىراق ءتىپتى دە ولاي ەمەس. شىندىعىندا الاگۋزوۆتىڭ كىندىگىنەن تاراعان اسىرەسە، ۇل جەتى اتالىق تارماقتان ءۇزىلىپ ءتۇسىپ، تەكسىزدىككە ۇشىرادى. جالپى تەكسىزدىك - ورتاق گەنەتيكالىق تامىردان الشاقتاۋ، جەتى بۋىندىق تۋىستىقتى ءۇزۋ، تارك ەتۋ. باسقا ەشتەڭە دە ەمەس. ال بۇعان ەڭ اۋەلى سول اۋلەتتىڭ اقساقالدارى ويباي سالۋى كەرەك، نەمەرەمەن بايلانىس ورناتۋى قاجەت. ونىمەن رۋحاني-تۋىستىق قاتىناس ورناتۋ كەرەك!

وگەي قىزىنا سۇحبات بەرىپ وتىرعان تۇرسەن/تۇرسىن ءوزىنىڭ رۋحاني كۇيزەلىسىن ءبىلدىردى. اكە رەتىندە عانا تۇسىنۋگە بولادى. قازاق رەتىندە ونىڭ ۇرپاعى تورشەجىرەدە تۇرۋى كەرەك قوي. جەتى اتانى تۇرسەننىڭ ءوزى دە بىلمەيدى. ءتىل بىلمەگەسىن قايدان بىلەدى؟ ال ەندى وسى اۋلەتتىڭ جەتى اتاسىن كىم تۇگەندەپ، تۋىستىق قاۋىمدى تۇلەتىپ وتىر؟ ەشكىم! قازاقتىلدى قازاقتىڭ وزدەرى دە بىلمەيدى، ءتىپتى قازاقتىڭ 20 پايىزى عانا جەتى اتاسىن بىلەدى، قالعانى ماقۇرىم ەكەنىن تەكتانۋشى ماماندار كۇرسىنە جەتكىزۋدە.

مىنە رۋحاني-مادەني ماسەلە قايدا جاتىر؟ تەكسىزدىك قاي جاقتان كەلۋدە؟ ەرتەڭ الگى اجىراسقانداردىڭ بالدارى ءتارتىپسىز، جاۋاپسىز نەكەلەسەدى، بولماسا جىنىستىق قاتىناسقا تۇسەدى. ولار ەشقاشان جەتى اتاسىن سۇرامايدى، ولاردا ونداي تاربيە اتىمەن جوق. بولىپ تا جاتىر. سوندا بۇكىل ۇلت تەكسىز بولماي ما؟

تەكسىزدىك قازاق جىگىتتەرىنىڭ بەيشارالىعىنان! بەلىنەن تاراعان بالانى قاتىنعا قالدىرىپ، كورىنگەن جەرگە جەتىمدەردى، تەكسىزدەردى بالالاتىپ جاتىر... بۇنداي تەكسىز كۇيەۋلەر قايدان شىعىپ جاتىر؟ بالا-شاعاسىن اسىراي الماي، قاتىن-بالاسىن ۇرىپ-سوعىپ، اقىرى اجىراسىپ تاستاپ كەتىپ، ولارمەن بايلانىستى ءۇزىپ، قارابەت بولىپ، تاعى ءبىر قاتىننىڭ قوينىنا كىرىپ جۇرگەن دەلقۇلدار قايدان شىعىپ جاتىر؟

تايپا مەن رۋدىڭ اتىنا ماقتانىپ، سۇيەگى قۋراعان باتىر اتانىڭ اتىن جامىلعان تەكسىزدىك قايدان؟ ونىڭ ورنىنا جەتى اتا قاۋىمى نەگە قولعا الىنباي وتىر؟ بۇكىل قازاق وسىعان باس قاتىرۋى كەرەك!

قۇرىلتايدا ناسىباي ەمەس، باستى كوتەرەتىن تاقىرىپ - جەتى اتا!

سەرىك ەرعالي

Abai.kz