اقش ەنگىزگەن تاريفتەر قازاقستان ەكسپورتىنا قالاي اسەر ەتەدى؟ ساۋدا مينيسترلىگىنىڭ جاۋابىن پورتال وقىرماندارىنىڭ تالقىسىنا ۇسىنباقپىز...

2025 جىلعى 1 تامىزدان باستاپ اقش پرەزيدەنتى دونالد ترامپ الەمنىڭ جۇزدەگەن ەلىنە جاڭا ساۋدا تاريفتەرىن ەنگىزەتىنى تۋرالى رەسمي مالىمدەمە جاسادى. ءتيىستى ءۇشبۋ حات قازاقستان پرەزيدەنتى قاسىم-جومارت توقاەۆتىڭ اتىنا دا جولدانعان. حاتتا كورسەتىلگەندەي، اقش اۋماعىنا جەتكىزىلەتىن بارلىق قازاقستاندىق ونىمدەرگە 25% كولەمىندە جاڭا تاريف ەنگىزىلەدى. سونىمەن قاتار، ءۇشىنشى ەلدەر ارقىلى قايتا جونەلتىلەتىن تاۋارلارعا بۇدان دا جوعارى تاريف مولشەرى قولدانىلماق.

قازاقستان بۇعان نە دەپ جاۋاپ قاتپاق؟ قۇزىرلى مينيسترلىك نە دەيدى؟

قر ساۋدا جانە ينتەگراتسيا مينيسترلىگىنىڭ مالىمدەۋىنشە، جاڭا تاريفتەر ەلىمىزدىڭ اقش-قا باعىتتالعان ەكسپورت كولەمىنە ايتارلىقتاي اسەر ەتپەيدى. ۆەدومستۆونىڭ حابارلاۋىنشا، قازاقستاندىق ەكسپورتتىڭ نەگىزگى بولىگى – اتاپ ايتقاندا مۇناي، ۋران، كۇمىس، فەرروقورىتپا، تانتال جانە تيتان سياقتى ستراتەگيالىق شيكىزاتتار – تاريفتەردەن بوساتىلادى. بۇل ونىمدەر قازاقستان ەكسپورتىنىڭ شامامەن 95%-ىن قۇرايدى.

قازاقستان بيلىگى امەريكالىق تاراپتىڭ 25 پايىزدىق باج سالىعىن ەنگىزۋى بويىنشا ەكىجاقتى ساۋدا جاعدايىن جاقسارتۋ باعىتىندا كەلىسسوزدەرگە دايىن. وسى ماقساتتا اقش-قا بىرقاتار ۇسىنىستار جولدانعان.

«قازاقستاننىڭ باستى ماقساتى – نارىققا ءادىل قول جەتكىزۋ جانە ساۋدا شارتتارىن وڭتايلاندىرۋ بويىنشا كەلىسىلگەن شەشىمدەرگە كەلۋ»، – دەپ اتاپ ءوتتى مينيسترلىك.

جاڭا تاريفتىك ساياسات اياسىندا قازاقستان مەن اقش اراسىنداعى ەكونوميكالىق بايلانىستاردىڭ بولاشاعى بەلسەندى تالقىلانۋدا. قازاقستان تاراپى ساۋدا سەرىكتەستىگىن ساقتاۋعا جانە ونى ودان ءارى نىعايتۋعا نيەتتى. ەكى ەل اراسىنداعى ارىپتەستىككە بۇل شەشىمنىڭ اسەرى شەكتەۋلى بولادى دەگەن سەنىم بار.

ايىم الماسقىزى

Abai.kz