قازاقستاننىڭ حالىق جازۋشىسى، اقىن، تانىمال دراماتۋرگ جانە سازگەر يسرايل ساپارباي 85 جاسقا قاراعان شاعىندا دۇنيەدەن وزدى.

قارالى حاباردى قر جازۋشىلار وداعى توواعاسىنىڭ ورىنباسارى قاسىمحان بەگمانوۆ جەتكىزدى.

قاسىمحان بەگمانوۆ:

– بۇگىن تاڭنان سۋىق حابار جەتتى.تاڭعى ساعات – ءتورت شاماسىندا 85 جاسىنا قاراعان شاعىندا قازاقستاننىڭ حالىق جازۋشىسى، تاۋەلسىز «پلاتينالى تارلان» سىيلىعىنىڭ لاۋرەاتى، اسا كورنەكتى ۇلت اقىنى، بەلگىلى دراماتۋرگ، تالانتتى سازگەر يسرايل ساپارباي اعامىز دۇنيەدەن ءوتتى. ءيا، ساعات ءتىلى قاسيەتتى جۇماعا قاراي اۋعاندا اقىننىڭ سوڭعى دەمى ءۇزىلدى.

ۇلى اقىننىڭ قاسكەلەڭدەگى قارا شاڭىراعىندا، بالا-شاعاسىنىڭ الدىندا اۋىر ناۋقاستان قايتقانى جايلى حاباردى ماعان اعامىزدىڭ ۇلى نۇرلان يسرايلۇلى باۋىرىم حابارلادى.

بيىل قازاق ادەبيەتىنىڭ الىپتارى، كەزىندە ىنىلەرى بولىپ سوڭىنان ەرگەن اسىل اعالارىم - دۋلات يسابەكوۆ (20.12.1942 - 21.02.2025), تەمىرحان مەدەتبەك (06.05.1945 - 10.05.2025), ەندى مىنە، يسرايل ساپارباي (15.05.1941 - 18.07.2025) بىرىنەن سوڭ ءبىرى ومىردەن وتكەنى مەنىڭ جانىما قاتتى باتىپ، جۇرەگىم اۋىرىپ وتىر. الاپات قايعى ساناما ەندى عانا جەتكەندەي كۇي كەشىپ وتىرمىن. سول كەڭسايعا، الىپتاردىڭ قاسىنا ەندى يسرايل اعام دا كەتىپ بارا جاتىر.

قازاقستان جازۋشىلار وداعىنىڭ توراعاسىمەن بىرگە اعامىز قاتتى اۋىرىپ جاتقاندا، اۋرۋحاناعا بارىپ، ۇنەمى حابار الىپ تۇردىق. سوڭعى بارعانىمىزدا كۇبىرلەپ، اقىرىن ءوز ولەڭىن وقىپ جاتتى...

اسا كورنەكتى ليريك اقىن يسرايل ساپاربايدىڭ ارتىندا قانشاما اندەرى، لاعىلداي، مولدىرەگەن جاقۇتتاي پوەزياسى، ماڭگى ولمەس سىرلى، مۇڭلى جىرلارى قالدى. جازعان پەسالارى م.اۋەزوۆ تەاترىنان باستاپ ەلىمىزدىڭ بىرنەشە تەاترلارىندا ساحنالانىپ، وتتى جىرلارى ءوز وقىرماندارىن تاۋىپ، اسەم اندەرى ميلليونداردىڭ جۇرەگىنە جەتىپ، قازاق اسپانىندا قالىقتاپ تۇر.

جانىڭىز ءجانناتتا بولسىن، اسىل اعا، جان اعا، يسرايل كوكەم مەنىڭ...

يسرايل ساپارباي – قازاق ليريكاسىنىڭ شوقتىعى بيىك وكىلدەرىنىڭ ءبىرى. ول ارتىنا تەرەڭ ماعىنالى ولەڭدەر، ساحناعا ارنالعان پەسالار مەن ەل ءسۇيىپ تىڭدايتىن سازدى اندەر قالدىردى. مارقۇمنىڭ ادەبي مۇراسى حالىق جادىندا ۇزاق ساقتالارى ءسوزسىز.

Abai.kz ۇجىمى اقىننىڭ وتباسىنا، تۋعان-تۋىستارىنا، قالىڭ قازاق وقىرماندارىنا قايعىرىپ كوڭىل ايتامىز...

Abai.kz