بۇگىنگى جاھاندانۋ داۋىرىندە ءار سالادا، سونىڭ ىشىندە ءبىلىم بەرۋ جۇيەسىندە دە تىڭ وزگەرىستەر بولىپ جاتىر. بۇل وزگەرىستەر قوعامنىڭ دامۋىمەن، زامان تالابىمەن تىعىز بايلانىستى.

سەبەبى ءححى عاسىر – اقپارات پەن تەحنولوگيا عاسىرى. بۇل كەزەڭدە تەك تەوريالىق ءبىلىم عانا ماڭىزدى ەمەس، قازىرگى زامان بالاسى جان-جاقتى، ءوز بەتىمەن ويلاي الاتىن، ءبىلىمدى، سىني كوزقاراس قالىپتاستىرا الاتىن تۇلعا بولۋى ءتيىس. وسى باعىتتا ەلىمىزدەگى ءبىلىم سالاسىنداعى رەفورمالار ۇلكەن ءرول اتقارىپ وتىر.

ءبىرىنشى كەزەكتە، جاڭارتىلعان ءبىلىم بەرۋ مازمۇنىنا كوشۋ – بۇل وزگەرىستىڭ باستى بەلەسى. بۇل جۇيە بۇرىنعىداي دايىن اقپاراتتى جاتتاۋعا ەمەس، كەرىسىنشە، ءبىلىمدى ءتۇسىنىپ، قولدانۋعا، وقۋشىنى زەرتتەۋگە، ىزدەنۋگە، وزىندىك پىكىر ايتۋعا باۋليدى. ساباق بارىسىندا وقۋشىلار ءتۇرلى ءادىس-تاسىلدەر ارقىلى توپتا جۇمىس ىستەۋدى، ءبىر-ءبىرىنىڭ پىكىرىن تىڭداۋدى، ورتاق شەشىم قابىلداۋدى ۇيرەنەدى.  جانە مۇعالىم - وقۋشى ورىسىندە عانا ەمەس، وقۋشى - مۇعالىم، وقۋشى - وقۋشى ورىسىندە تەوريالىق تۇردەن تاجىريبە ارقىلى ءتۇيسىنۋ، ومىردە سىناپ كورۋ، سىني ويلاۋ ارقىلى ناتيجەگە جەتۋ داعدىلارىن مەڭگەرەدى.  بۇل تەك ءبىلىم الۋ ەمەس، ومىرلىك ماڭىزدى داعدىلاردى قالىپتاستىرۋعا جول اشادى.

ەكىنشىدەن، سىني باعالاۋ جۇيەسى وقۋشىلاردىڭ ءبىلىمىن ءادىل باعالاۋعا مۇمكىندىك بەرەدى. بۇل جۇيە وقۋشىنىڭ ناقتى جەتىستىگىن، قاي تۇستا قينالىپ جاتقانىن كورسەتىپ، ءارى قاراي دامۋ باعىتىن ايقىندايدى. بۇرىنعى 2,3,4,5 سەكىلدى جالپىلاما باعالاردان گورى، قازىر ءار وقۋشى دەسكريپتور نەگىزىندە ءوز دەڭگەيىن ناقتى كورىپ، ءوز ءبىلىمىن جاقسارتۋعا تالپىنادى. بۇل – ءبىلىم الۋ بارىسىندا وقۋشىنىڭ تۇلعالىق قىرلارىن اشادى، وزىنە دەگەن سەنىمىن ارتتىرادى.

ۇشىنشىدەن، ءبىلىم بەرۋ ىسىنە اقپاراتتىق تەحنولوگيالاردىڭ ەنۋى ۇلكەن سەرپىن بەردى. قاشىقتان وقۋ، ەلەكتروندى جۋرنالدار، ونلاين ساباقتار، ۆيدەو رەسۋرستار – بارلىعى مۇعالىم مەن وقۋشىنىڭ جۇمىسىن جەڭىلدەتىپ، تيىمدىلىكتى ارتتىردى. وقۋشىلار ءوز بەتىمەن ينتەرنەت ارقىلى قوسىمشا ماتەريالدار قاراپ، ءبىلىم كوكجيەگىن كەڭەيتە الادى. ءبىلىم بەرۋدەگى قازىرگى وزەكتى ماسەلەلەردىڭ ءبىرى – “ۇيرەنۋدى ۇيرەتۋ”.  ويتكەنى گادجەتپەن وسكەن، جي مەن Google سۇراعانىن الدىنا توسىپ تۇرعان مىنا زاماندا مۇعالىم وقۋشىعا باعدارلاماداعى ءبىلىمدى ۇيرەتۋدە قاجەت داعدىلاردى، قىزىعۋشىلىقتى قالىپتاستىرۋى وڭاي ەمەس.  بۇل جولدا مۇعالىمنىڭ شەبەرلىگىن ارتتىرۋدا قازىرگى اقپاراتتىق تەحنولوگيالار كەڭىستىگىنىڭ ءرولى زور.  سونىمەن قاتار، بۇل اۋىل مەن قالا اراسىنداعى ءبىلىم الۋداعى تەڭسىزدىكتى ازايتۋعا ىقپال ەتىپ كەلەدى.

ءبىلىم سالاسىنداعى وسىنداي وڭ وزگەرىستەردىڭ بارلىعى ەلىمىزدىڭ كەلەشەگى – جاس ۇرپاقتىڭ ساپالى ءبىلىم الۋىنا، باسەكەگە قابىلەتتى ازامات بولىپ قالىپتاسۋىنا باعىتتالعان. بۇل وزگەرىستەر مۇعالىمدەردەن دە ۇنەمى ىزدەنىستى، جاڭاشىلدىقتى تالاپ ەتەدى. ال ءبىلىم سالاسىنداعى قىزمەتكەرلەر زامان كوشىنەن قالماي، ءوز كاسىبىنە جاۋاپكەرشىلىكپەن قاراسا، بۇل وزگەرىستەر ءوز ناتيجەسىن بەرەدى.

قورىتىندىلاي كەلگەندە ايتارىمىز: ءبىلىم سالاسىنداعى رەفورمالار – بولاشاق ءۇشىن جاسالىپ جاتقان ماڭىزدى قادامدار. ونىڭ بىزگە بەرەرى مول: ساپالى ءبىلىم، ءادىل باعالاۋ جۇيەسى، اقپاراتتىق تەحنولوگيامەن قامتاماسىز ەتۋ، ومىرلىك داعدىلاردى مەڭگەرتۋ – بۇلاردىڭ بارلىعى جاڭا ۇرپاقتىڭ جارقىن بولاشاعىنا باستار جول.

سۆەتا جولىموۆا،

م.جۇماباەۆ اتىنداعى №137 جببم-ءنىڭ قازاق ءتىلى جانە ادەبيەتى پاندەرىنىڭ مۇعالىمى، پەداگوگ-زەرتتەۋشى

Abai.kz