دۇركىرەپ وتكەن حالىقتىق توي...

«حاكىم ابايدىڭ مول مۇراسى – قازاق حالقىنىڭ عانا ەمەس، بارشا ادامزاتتىڭ ونەگە الاتىن اسىل قازىناسى. ونىڭ وي-تولعامدارى مەن وسيەتتەرىنىڭ وزەكتىلىگى ەشقاشان جوعالمايدى. سوندىقتان ابايدى تانۋ جانە تانىتۋ، شىعارماشىلىعىن تەرەڭ زەردەلەۋ وتە ماڭىزدى. بۇگىنگى سالتاناتتى ءىس-شارانىڭ تۇپكى ءمانى دە – وسىندا».
پرەزيدەنت قاسىم-جومارت توقاەۆتىڭ تۋعانىنا 180 جىل تولعان كۇنگى ءىس-شاراعا قاتىسۋشىلارعا ارنالعان قۇتتىقتاۋىنان...
(قاراۋىل ساپارىنان رەپورتاج)
ونكۇندىك رۋحاني-مادەني ءىس-شارالاردىڭ سوڭعى فازاسى مەن اپوگەياسى ءدال 10 تامىز كۇنى تۇيىندەلۋى زاڭدى نارسە. ويتكەنى، بۇل – اباي كۇنى، مەملەكەتىمىزدىڭ مەرەكەلىك كۇنتىزبەسىنە ەنگەن كۇن. اۆتوكولىكتەر لەگى تاڭ سارىدەن سەمەي-قاراۋىل كۇرە جولىنا قاراي اعىلا باستاعان. اراسىندا ۇلكەن اۆتوبۋستار بار، ولار كەرەكۋ قالاسىنان جالعا الىنعان ەكەن. ادەتتەگىدەي كۇشىكباي اسۋىنا توقتاعاندا بايقادىق، كولىك كەرۋەنى لەگىنىڭ ۇشى-قيىرى جوق، ءبىر شاقىرىمداي سوزىلىپ جاتىر. جۇرتتىڭ كوڭىل-كۇيى كوتەرىڭكى، 60 ادامدىق اۆتوبۋس ىشىندە اباي اندەرىن شىرقاۋمەن بولدىق. جيدەباي بۇرىلىسىنا جاقىنداعاندا كوشتىڭ نەگىزگى بولىگى اباي مۋزەيى مەن كەسەنەگە قاراي تارتتى. 09.00-09.40 اراسىندا جيدەبايدا اباي رۋحىنا ارناپ دۇعا وقىلدى، قۇران باعىشتالدى.
قاراۋىلتوبە بوكتەرىندە
ساعات 10.00 شاماسىندا كولىكتەر قاراۋىلتوبە ەتەگىنە جەتىپ، ات باسىن تىرەدى. «كۇلىمسىرەپ اسپان تۇر، ويعا ورالتىپ ءار نەنى» دەپ اقىن ءوزى ايتپاقشى، تاپ وسى سالتانات كۇنى تابيعات انا دا جادىراپ سالا بەردى. ىستىق تا، سۋىق تا ەمەس، سالقىن سامال وبەدى. جىبەك جەلدەر ەسەدى. قايران قاسيەتتى قاراۋىلتوبە! سەن شىڭعىس قاعان، ءسۇبىتاي ءباھادۇر، مايقى بيلەردىڭ كوزىن كورگەن، كارى تاريحتىڭ ءۇنسىز كۋاسىسىڭ! اباي تويى دا قاشاندا سەندە وتەدى! سەنىڭ تورىڭە كوتەرىلگەن سايىن تىنىسىڭ اشىلا تۇسەدى. قۇدايدىڭ قۇدىرەتى، اينالا الەم تۇگەل تومەندە قالعانداي، قۇس بولىپ اسپاندا قالىقتاپ تۇرعانداي وزگەشە سەزىمگە بولەيسىڭ. تومەنگە كوز سالعاندا ءتىپتى مىڭ سان اسكەر قابىلداپ تۇرعان شىڭعىسحاننىڭ قولباسشىسى سياقتى سەزىنەسىڭ ءوزىڭدى. ءسويتىپ، كولىكتەردەن تۇسكەن تويشىل قاۋىم اياڭداپ، كيىز ءۇيلى قالاشىققا قاراي بەتتەدىك. قالاشىق 180 ۇيدەن تۇرادى ەكەن. وبلىستىڭ ءار اۋدانى جانە سەمەي مەن كۋرچاتوۆ قالاسى 10 ۇيدەن تىككەن. ءجۇز جيىرما ما، وعان جەكە مەكەمەلەر مەن كاسىپورىندار ۇيلەرىن قوسىڭىز. قالعان 30 ءۇي اباي اۋدانىنىكى. ءتارتىپ پەن تازالىققا عاجاپتاناسىڭ. سۋ جانە ەلەكتر جەلىسى تارتىلعان، اسفالت توسەلگەن، ءار كيىز ءۇي نومىرلەنگەن، اتى جازىلعان. ءىشى دە، سىرتى دا جايناعان ءار ءۇيدىڭ داستارحانى دا جايۋلى تۇر. ساپىرۋلى سارى قىمىز، تاباق-تاباق ەت، جەمىس-جيدەك قويىلعان. قوناقتاردى كۇتىپ الىپ جۇرگەن قىز، جىگىتتەردىڭ كيىمدەرى ۇلتتىق ناقىشتا بولۋى كوز قۋانتادى. وسى ايتىلعان مولشىلىقتىڭ ءبارى بيۋدجەت ەسەبىنەن ەمەس، دەمەۋشى ازاماتتاردىڭ قول سوزۋى ارقاسىندا ىسكە اسقانىن دا ايتا وتىرايىق.
ءيا، كىسى قالىڭ. قازاقستاننىڭ تۇكپىر-تۇكپىرىنەن سالتاناتقا اسىعا جەتكەن قوناقتار ءنوپىرى تاڭقالارلىق. قاراۋىلتوبە ەتەگى قۇمىرسقانىڭ يلەۋى سياقتانادى. ايتالىق، الاشتىڭ اتى شىققان ازاماتتارىن تۇگەل دەرلىك وسى توبە بوكتەرىنەن تابۋعا بولار ەدى.
ءبىز، سەمەيدەن بىرگە شىققان ارداگەرلەر توبى، قوناق ءۇيدىڭ بىرىنە جايعاسىپ، ءدام اۋىز تيدىك. ساعات 11.00-11.30 اراسىندا قالىڭ كوپشىلىككە قوسىلىپ، «بالا ابايدان دانا ابايعا» دەگەن تەاترلانعان قويىلىمدى تاماشالادىق. «اباي جولى» رومانىنان الىنعان سيۋجەتتەر مەن «قان سوناردا بۇركىتشى شىعادى اڭعا» سياقتى اباي ولەڭدەرى نەگىزىندە كورسەتىلگەن قويىلىمعا تەبىرەنبەۋ، اسەرلەنبەۋ مۇمكىن ەمەس ەدى. 30 مىڭنان استام ادام سىلتىدەي تىندى، ونەر ساڭلاقتارى ابايدىڭ تاعدىرى مەن تاعلىمىن جۇرەككە جەتكىزدى. جانارلارعا جاس ءۇيىرىلدى.
اسەرلى قويىلىم سوڭى «قازاق كوشى» وتۋىمەن جالعاستى. بۇل ناعىز ۇلتتىق ءيسى اڭقىعان عاجايىپ كورىنىس بولدى. كوش جۇك ارتىپ ىشقىنعان تۇيە، كىسىنەگەن جىلقى داۋىسىنا تولى. ات قۇلاعىندا ويناعان قىز-بوزبالا، اربالى، سالت اتتى، اڭشى، بۇركىتشى، سال-سەرىلەر توبى، ءبارى-ءبارى بار بۇل كوشتەن كوز ايىرۋ مۇمكىن ەمەس ەدى. 19-عاسىر سالتاناتى، اباي زامانى قايتا ورالعانداي ەرەكشە اسەرگە بولەدى.
ساعات 12.00 شاماسىندا «اباي كۇنى» مەرەكەسى رەسمي تۇردە اشىلدى. قر پارلامەنتى سەناتىنىڭ توراعاسى ماۋلەن اشىمباەۆ قر پرەزيدەنتى ق.ك. توقاەۆتىڭ قۇتتىقتاۋىن وقىپ بەردى. م.اشىمباەۆتىڭ جانە اباي وبلىسى اكىمى بەرىك ءۋاليدىڭ بايانداماسىن جۇرتشىلىق ىستىق ىقىلاسپەن تىڭدادى.
12.30-دان قالىڭ جۇرتشىلىق ونەر جۇلدىزدارىنىڭ «ولەڭگە اركىمنىڭ-اق بار تالاسى» اتتى كۇندىزگى كونتسەرتتى تاماشالادى. اباي ولەڭدەرى مەن اندەرى قاراۋىلتوبە باۋرايىن جاڭعىرتىپ، شالقىعان اسەم دە اسەرلى اۋەندەر سوناۋ الىستا مۇنارتقان قارت شىڭعىسقا دا جەتىپ جاتتى...
13.00-14.30 اراسىندا ۇلى ابايدىڭ رۋحىنا باعىشتالعان اس بەرىلدى. اسقا قاتىسقان مىڭداعان ادامدار كيىز ۇيلەرگە ءبولىنىپ، ىڭ-شىڭسىز سىيىسىپ جاتتى. ىنتىماقتىق دەگەن وسى ەمەس پە. استىڭ سوڭىنا قاراي ونەرپازدار ءۇيدى-ءۇيدى ارالاپ، ءار شاڭىراقتا اباي اندەرى شىرقالعانىن دا ايتا وتىرايىق. داستارحان باسىندا تىلەكتەر توگىلىپ، اقساقالدار باتا بەرىپ جاتتى. سەمەي قالاسى ارداگەرلەر كەڭەسىنىڭ توراعاسى كەنجەباي بەردىكەنوۆ باستاتقان ۇلكەندەر ءبىر داستارحاندا باس قوستىق. ارامىزداعى قۇسمانيا وسپانوۆ اقساقال ءوزى جازعان ولەڭىن انىمەن ورىنداپ، جۇرەكتەردى تەبىرەنتتى. سول ولەڭ ءسوزىن كەلتىرە كەتەيىك:
ۇلى ابايدىڭ ءسوز شىقتى تاڭدايىنان،
دومبىراسىن جاساتتى بالقايىڭنان.
ارالادى اسىل ءسوز ەن دالا، جەردىڭ ءجۇزىن،
حان شىڭعىستىڭ باق قونعان باۋرايىنان.
ارعى تەگىڭ جارالعان دانالىقتان،
ولەڭ جازدىڭ اتقانشا اعارىپ تاڭ.
جازعانىڭ تىلگە جەڭىل، جۇرەككە جىلى ءتيىپ،
اقساقالدار، اجەلەر، بالا دا ۇققان.
ساۋلە شاشقان حاكىمىم، جارىق تاڭىم،
باسشى قاۋىم ويلاسا ەكەن كوپتىڭ قامىن.
اباي – باس اقىن، اۋدارماشى ءھام اۋدارماشى،
اقىل-ويدىڭ الىبى، ءبىر تۋار دانىشپانىم!
ولەڭنىڭ قايىرماسى:
جاسا، جاسا ۇلى اباي، ۇلى اباي،
اجەڭىز زەرە، اكەڭىز سۇلتان قۇنانباي.
جاسا، جاسا، جاساي بەرشى ۇلى اباي.
قاراپايىم قارا ولەڭدى حالىقتىڭ ۇلى اقىنىنا دەگەن قۇرمەتى مەن سۇيىسپەنشىلىگىنىڭ زارەدەي بەلگىسى دەپ باعالاۋعا بولاتىن سياقتى.
14.30-15.30. كوپشىلىك ۇلتتىق ات-سپورت ويىندارىن (توپ بايگە، جورعا، الامان بايگە) قىزىقتادى. كەڭ ساحنا ارتى – بايتاق جازىق، ميداي دالا. ات بايگەسى سوندا ءوتتى. اقاننىڭ قۇلاگەرى سەكىلدەنگەن اۋىزدىقپەن الىسقان كىلەڭ جۇيرىكتەر كوز الدىمىزدا زۋلاپ وتۋدە. اتشابىس دەگەندە قازاق بالاسى دەلەبەسى قىزباي، تاقات قىلىپ تۇرا المايدى. ءار اينالىمدا ۇران سالىپ، ءايت-شۋلەگەن قيقۋمەن قارسى الىپ وتىردى.
15.00-16.30. كەزەك قازاقشا كۇرەستەن رەسپۋبليكالىق ءتۋرنيردىڭ فينالدىق باسەكەلەرىنە (تۇيە جانە وگىز بالۋان) جەتتى. «بالۋاندار ايداھارداي ارباسقاندا، الىسىپ جاعالاسىپ، جارماسقاندا» دەمەكشى، فينالدىق كۇرەسكە كوز تىككەن حالىقتىڭ قاراسى قالىڭ بولدى. بالۋاندار دا ايانىپ قالعان جوق، جان الىپ، جان بەرگەن قىزۋ تارتىسپەن ءوتتى.
18.30-19.00. ماراپاتتاۋ ءراسىمى (توپ بايگە، جورعا، الامان بايگە، تۇيە جانە وگىز بالۋان). اۆتوكولىكتەن بولەك، قازاق داستۇرىنە ساي جەڭىمپازدارعا جىلقى دا بەرىلىپ جاتتى.
19.00-21.00. جۇرتشىلىق رەسپۋبليكاعا تانىمال جۇلدىزداردىڭ «جەلسىز تۇندە جارىق اي» اتتى گالا-كونتسەرتىن تاماشالادى. كوز بايلانىپ، قاراڭعى ابدەن قويۋلانعاندا عانا اۆتوكولىكتەر لەگى «سەمەي، قايداسىڭ؟!» دەپ كەرى قاراي جوڭكىلە باستادى.
سونىمەن، ادامزاتتىڭ ابايى اتانعان دانىشپان تۇلعامىزدىڭ 180 جىلدىق تويى دۇركىرەپ وتە شىقتى. ونىڭ ۇلتتىق دەڭگەيدە، بۇكىل حالىقتىق مەرەكە بولىپ وتكەنىنىڭ كۋاسى بولدىق. وعان 50 مىڭنان استام جينالعانى، 15 ەلدەن شەتەلدىك دەلەگاتسيا قاتىسقانى ءسوزىمىزدىڭ ايعاعى. مەرەيلى مەرەكەدە كورگەن-بىلگەندەرىمىز، مىنە، وسىلار. تويدىڭ شىرقاۋ شەگى بولعان بۇل كۇننىڭ كورگەن كىسىنىڭ جادىندا، ەلدىڭ ەسىندە ۇزاق ساقتالارى انىق.
اباي تويىنا قاتىسقان ادامداردىڭ وي-تولعاۋلارى مەن لەبىزدەرى
نۇربەك قوشقارباەۆ، بەسقاراعاي اۋدانىنىڭ اكىمى: «اباي مەن قازاق ۇعىمى ەگىز. ول – تۇتاس ءبىر الەم. وعان جاساندىلىق جات، كوتەرمە-كوپشىك كەرەك ەمەس. ابايدى قادىرلەپ، قاستەرلەۋ بارشا قازاققا پارىز. وسىنى تۇيسىنگەندىكتەن تويعا دايىندىققا كۇش-جىگەرىمىزدى ايانباي سالدىق. ءىس-شاراعا بىرىگە كىرىسكەن ورىنباسارىم نۇراسىل اعىباەۆقا، ماسليحات ءتورايىمى مەيرامگۇل رىسبەكقىزىنا، ىشكى ساياسات باسشىسى جان الجانوۆقا بەك ريزامىن. تويعا دايىندىققا 80 ادام اتسالىستى. ءبارىمىز دە جاۋاپكەرشىلىكتى سەزىندىك. اسىرەسە، ون كيىز ءۇيدى قونا جاتىپ، ساقاداي-ساي قۇرۋعا، بارلىق جابدىقتارىن ازىرلەۋگە وسىدان 11 كۇن بۇرىن، ياعني 31 شىلدەدە كەلگەن ازاماتتارعا ايتار العىسىم شەكسىز. قاراۋىلتوبە بوكتەرىندە ءتۇن سۋىق، كۇنارا جاۋىن-شاشىن بولىپ تۇرادى. سونىڭ بارىنە شىداپ، توزگەن جاندارعا قايتىپ رازى بولماسقا. جاڭاعى 80 ادام ىشىندە اۋداندىق مادەنيەت ءۇيىنىڭ 23 ءارتىسى بار. ولار كونتسەرتتەرگە جانە ءتۇرلى قويىلىم، ماسسوۆكالارعا قاتىستى. ءبىزدىڭ اۋدان اتىنان تۇيە بالۋان اتاعىن الۋعا فينالدا بەلگىلى بالۋان، «قازاقستان بارىسى» جەڭىمپازى ەراسىل قاجىباەۆ بەلدەسەدى. سونداي-اق، دەمەۋشى ازاماتتارىمىز بارشىلىق. سونىڭ ءبىرى – سەرىكبول ايتمولدين تويدىڭ جۇلدەسى قورىنا اۆتوكولىك سىيلادى. ايتا وتەرى، ون كيىز ءۇيدىڭ داستارحان مازىرىنە 5 جىلقى، 2 ءىرى قارا، 5 قوي سويىلدى. مال دا، كيىز ۇيلەر دە اۋداننان تاسىمالداندى. «قازاق كوشى» كورىنىسىنە ءتاۋىر دەگەن 11 جىلقى اكەلدىك».
جۇماعازى ورازوۆ، قالالىق ءىىم ارداگەرلەرى كەڭەسىنىڭ توراعاسى: «ابايداي ۇلى تۇلعامىزدىڭ اتىن عانا بىلگەنىمەن ونىڭ ولمەس مۇرالارىنىڭ تەرەڭ سىرىنان ماقۇرىم قالعان، بىلايشا ايتقاندا، جۇرەگىنە بويلاماعان جاستارىمىز از ەمەس. مەن جۇمىس بابىمەن بۇزاقى اتانعان قيىن جاستارمەن كوپ كەزدەسكەن اداممىن. سونان بىلەتىنىم، اباي ۇرپاققا قالدىرعان باي مۇرانى قالىڭ قاۋىم بوپ يگەرۋ، ونى جاس بۋىن بويىنا دارىتۋ، ولاردى بيىك مۇراتقا باعىتتاۋ وتە ماڭىزدى مەملەكەتتىك ماسەلە. بۇگىنگى ارامشوپتەي قاۋلاعان جەمقورلىق، پاراقورلىق قۇبىلىسىنا توسقاۋىل قويۋدىڭ ەڭ ءتيىمدى دە توتە جولى وسى دەگەن ويدامىن. توي وتكەن سوڭ ابايدى ناسيحاتتاۋ ءىسى جىلى جابىلىپ قالماسا، قايتا ۇدەي تۇسسە عانيبەت بولار ەدى. بۇگىنگى تويعا رازىمىن، كوڭىلىم تولدى، ويتكەنى، ول ۇلتتىق دەڭگەيدە ءوتىپ جاتىر».
قۇسمانيا وسپانوۆ, ەڭبەك ارداگەرى، 80 جاستا: «مەن اقسۋات اۋدانىندا مال شارۋاشىلىعى سالاسىندا ەڭبەك ەتتىم. بىراق جاسىمنان اقىندىققا جۋىق، ادەبيەتكە قۇمار بولىپ ءوستىم. سونان دا بولار، اسىرەسە، اباي پوەزياسىن جانىما جاقىن كورىپ، تۇشىنىپ وقىدىم. ابايدا ايتىلماعان ءسوز جوق. ناعىز تاربيەشى. اتاسى جوقتىڭ اتاسى، اكەسى جوقتىڭ اكەسى بولعانىن كوزىمىز كوردى. قازىر ويلايمىن، ەستى، سانالى بولعانىم، ءتۇزۋ جولىمدى تاپقانىم سول اسىل مۇرانىڭ دا ارقاسى شىعار دەپ. باعانا داستارحان باسىندا وقىعان ولەڭىم مەن ءانىمدى ابايعا دەگەن قۇرمەتىمنىڭ ءبىر بەلگىسى دەپ بىلىڭىزدەر».
كوپپاەۆ سەرىكبول, سەمەي قالالىق ءبىلىم ءبولىمىنىڭ ارداگەرلەر كەڭەسىنىڭ توراعاسى: «مەكتەپ قابىرعاسىندا ابايدى تانىتۋ، ءتۇسىندىرۋ ءىسى – پەداگوگتار جۇگى ەكەنى بەلگىلى. ۇلى اقىندى وقۋ، ءتۇيسىنۋ، سەزىنۋ ايتۋعا عانا وڭاي. ول ءۇشىن ءار ۇستاز حال-قادىرىنشە ابايتانۋشى دا بولۋى كەرەك. قازىرگى كۇنى مۇعالىمنىڭ اباي مۇراسىنا جەتىك بولۋعا مۇرساتى كەلە بەرمەيدى. وسىنى ەسكەرگەندە، ابايدى ورتا مەكتەپتە قالاي وقىتۋ، قايتىپ ناسيحاتتاۋ كەرەكتىگى جونىندە مەملەكەت ارنايى قاۋلى قابىلدايتىن ۋاقىت جەتتى دەگەن ويدامىن. وبلىس باسشىسىنىڭ: «ابايدى وقىماي، ارمان-مۇراتىن سىڭىرمەي، قاعيدالارىن ەسكەرمەي كۇن كەشۋ –ۇلتتى ويلاعان ازاماتقا جات تىرلىك» دەگەن پايىمىنا تولىق قوسىلامىن. ابايدىڭ اتى اباي. وعان حالىقتىڭ قۇرمەتى دە ەرەكشە. وسى تويدان سونى اڭدادىم».
باقتاجاروۆ سەرىكبەك, سەمەي قالاسىنىڭ قۇرمەتتى ازاماتى: «اتا-اجەم، اكە-شەشەم ابايلىقتار، ءبارى دە ابايدى ءپىر تۇتقان ادامدار ەدى. سوندىقتان جاسىمنان «عىلىم ىزدە، كوپكە پايداڭ ءتيسىن» دەگەن سەكىلدى اباي قاعيدالارىنا ساي ءومىر سۇرۋگە تىرىسىپ باقتىم. اتامىز: «ءومىر جولى تار سوقپاق، يىلگەن جاق» دەمەي مە. سول تار سوقپاقتا قۇلاماي ءوتىپ كور. اتى جەر جارعان سەمەي ەت كومبيناتىنىڭ قازاقتان شىققان العاشقى ديرەكتورى بولدىم دەگەندەي، تالاي بيىكتەن كورىنسەم، وعان سەبەپكەر اباي اتام ەكەنىن جاقسى بىلەمىن. سوندىقتان اباي تويىنان شەت قالعان كىسى ەمەسپىن، قولدان كەلگەنشە دەمەۋشىلىك تە جاسادىم. وسى جولى دا ساپارعاليەۆ جاسۇلان دەگەن كاسىپكەر ازاماتپەن بىرلەسە وتىرىپ، كەرەكۋدەن 60 ورىندىق اۆتوبۋستى جالعا الدىق (400 مىڭ تەڭگە). سەمەي ارداگەرلەرىن تويعا جەتكىزگەن، مىنە، سول اۆتوبۋس».
گۇلقايشا اۋباكىروۆا, «احاۋ-سەمەي» ءانسامبلىنىڭ كوركەمدىك جەتەكشىسى: «ءبىزدىڭ ءانسامبلدىڭ رەپەرتۋارىندا اباي اندەرى ويىپ ورىن الادى. ولاردى حالىق قاشاندا جىلى قابىلدايدى، كوبىنە قوسىلا كەتەدى. مەن وسىدان وتىز جىل بۇرىن ابايدىڭ 150 جىلدىق تويىنا شۇبارتاۋلىق ونەرپازدار قاتارىندا قاتىسقان ەدىم. بۇگىنگى توي بارىسىنان كوپ ىلگەرىلەپ كەتكەنىمىزدى بايقادىم. ساحنادا ونەر كورسەتىپ جاتقان جۇلدىز جاستارىمىزدا ەسەپ جوق. وزىمە ەرەكشە اسەر قالدىرعان تاعى ءبىر نارسە – ەتنواۋىل كورمەلەرى بولدى. ون بەس شاقتى كيىز ۇيلەر قازاقستاننىڭ ءار وبلىسىنا ارنالىپ، وندا شىعاتىن ونىمدەر مەن بۇيىمدار قويىلعان ەكەن. كوركەمدەلۋ دەڭگەيى كەرەمەت، ەرتەگى الەمىنە كىرگەندەي سەزىنەسىڭ. ءاربىر ءۇيدى جاساقتاپ، كوركەمدەۋگە قانشاما كۇش پەن قارجى كەتكەنىن ويلاعاندا، تويدى ۇيىمداستىرۋشى ازاماتتارعا ەرىكسىز باسىڭدى يەسىڭ. ءبارى دە اباي ارۋاعى ءۇشىن دەپ تىندىرىلعان شارۋالار عوي. ارتىنىڭ بەرەكەسى مەن قايىرىن بەرسىن، ءبىر اللا تاعالا».
ءبۇبىحان ورازقىزى, «احاۋ-سەمەي» ءانسامبلىنىڭ مۇشەسى: «بىزدە باستى جۇمىس ءان ايتۋ ەمەس. ءدىن مەن ءداستۇردى دارىپتەيمىز، جاستارعا تاربيە بەرەمىز. ۇيلەنبەي جۇرگەن جاستارمەن سويلەسەمىز، اجىراسىمىز دەپ جۇرگەندەردى قايتا قوسامىز، تاتۋلاستىرامىز. مىنە، نەگىزگى قىزمەتىمىز وسى. ال بۇگىنگى اباي تويىنان العان جاقسى اسەرىم وتە كوپ. ءار ەلدەن، ءار جەردەن كەلگەن حالىق ءبىر ادامنىڭ بالاسىنداي سەزىندىك. بەرەكە-بىرلىكتىڭ، ىنتىماقتىڭ كۇنى بولدى. اباي اتامىز ايتقان باۋىرمالدىلىق، ادامزاتتىڭ ءبارىن ءسۇيۋ دەگەن وسى ەمەس پە. جوعارى دەڭگەيدە ءوتتى تويىمىز، تاماشا كوڭىل-كۇيمەن قايتىپ كەلە جاتىرمىز. ماڭعىستاۋ وبلىسى ءوز قاراجاتىنا سەمەيدە «دوستىق ءۇيىن» سالماقشى. مىنە، ءبىز شاشۋىمىزدى شاشىپ، وسىنداي جاقسىلىقتار قاسىندا جۇرەيىك. انالار بالاسىنا نەنى تىلەيدى، ءبىز حالقىمىزعا سونى تىلەيمىز. قۋانىش قۋانىشقا، توي تويعا ۇلاسسىن».
اسان وماروۆ
Abai.kz