ەڭكەيمەي، الەم الدىندا ەڭسەسىن تىك ۇستاپ، ەركىن سويلەسە الۋى ءۇشىن وزىمىزگە جاڭا تالاپتار جۇكتەۋ قاجەتتىگىن بولجاعان كەزەڭدەمىز. اسىرەسە، تسيفرلى ءداۋىردىڭ سىيقىرلى ءتىلىن، ءدىلى مەن سىرىن مەڭگەرۋدىڭ وزەكتىلىگى العا وزدى.

پرەزيدەنتىمىز الداعى 3 جىل ىشىندە قازاقستان تولىقتاي تسيفرلى ەلگە اينالۋى ءتيىس دەگەن ناقتى تۇجىرىم ايتتى. بۇل ارقايسىمىزعا بەرىلگەن تاپسىرما، جۇكتەلگەن مىندەت دەپ قابىلداۋىمىز قاجەت. تسيفرلى تەحنولوگيالاردى ءوندىرۋشى جانە ونى وزا قولدانۋشى مەملەكەتتەر قاتارىنا قوسىلۋعا قۋاتتى قادام جاسالدى. بۇل – تۇتىنۋشىلىق مەنتاليتەتتەن ارىلىپ، جاسامپازدىققا ۇمتىلدىراتىن وتە ماڭىزدى يدەولوگيا. جاساندى ينتەللەكت مينيسترلىگى قۇرىلىپ، جەدەل ىسكە كىرىسسە، ەلىمىز تسيفرلى جولمەن دامۋدىڭ وڭاي دەيتىندەي دە ەمەس، ءبىلىمپاز ءۇشىن قيىن دا ەمەس دامۋ جولىنا تۇسەدى. دەسەك تە، ۇلتتىق جاساندى ينتەللەكت ءداۋىرى جاڭا تالاپتار دا قوياتىنى بەلگىلى. تولىقتاي تسيفرلى ەلگە اينالۋ ءۇشىن لاتىن گرافيكاسىنا كوشۋ ماسەلەسى وزەكتى بولايىن دەپ تۇرعان سياقتى. ويتكەنى لاتىن گرافيكاسى جاھاندىق تسيفرلىق ينفراقۇرىلىمنىڭ نەگىزگى گرافيكالىق بازاسىن قۇرايتىنى بەلگىلى. باعدارلامالاۋ تىلدەرىنىڭ باسىم بولىگى لاتىن الفاۆيتىنە نەگىزدەلگەن. وسىعان بايلانىستى، لاتىن ءالفاۆيتىن  مەڭگەرۋ – تەك الفاۆيت تۇرعىسىنان عانا ەمەس، سونىمەن قاتار قازاقستاننىڭ IT سالاسىندا جاھاندىق كوممۋنيكاتسياعا تولىققاندى ەنۋىنىڭ العىشارتتارىنىڭ ءبىرى بولادى دەپ ويلايمىن. الەمدىك تسيفرلى نارىقتىڭ ءتىلى، ءسىرا، اعىلشىنشا. قازىرگى جاستاردىڭ جاپپاي اعىلشىن ءتىلىن ۇيرەنۋگە دەگەن ۇمتىلىسىنىڭ توركىنىندە تسيفرلى الەمگە ەنۋ جانە جاساندى ينتەللەكت تابيعاتىن يگەرۋگە دەگەن قۇشتارلىعى جاتىر. بۇل قۋانتارلىق جاعداي.

جالپى العاندا بۇگىنگى جولداۋ قوعامىمىزعا جاڭا ءبىر سەرپىلىس بەردى. ءار سالا ماماندارىنىڭ وي-ساناسىندا جاڭاشا ءبىر كوزقاراستاردىڭ پايدا بولعانى انىق. ينۆەستيتسيا تارتۋ ماسەلەسى دە، ءبىر پالاتالى پارلامەنت ماسەلەسى دە، كاسپي تاعدىرى تۋرالى ويلار دا ەلىمىزدىڭ دامۋىنىڭ ەڭ ماڭىزدى تەتىكتەرىنە نازار اۋدارتتى. كەيدە داۋ-داماي شىعارىپ، جوق جەردەن ەلدى شۋلاتاتىن ايەلدەر ماسەلەسى دە ىشكى مادەنيەتىمىزدىڭ جۇتاڭدانىپ بارا جاتقاندىعىنىڭ كورىنىسى رەتىندە اتالدى.

قالاي بولعاندا دا، بۇل جولداۋ ءبىزدىڭ قوعامنىڭ دامۋدىڭ جاڭاشا ءبىر تابالدىرىعىنان اتتاعالى تۇرعاندىعىن كورسەتتى.

وڭايگۇل تۇرجان

Abai.kz