وزبەكستان مەن تاجىكستان ءوز مۇددەلەرىن قاتاڭ قورعاپ، بۋكمەكەرلىك بيزنەس پەن وعان قاتىستى قارجىلىق اعىمداردى ءبىر ورتالىقتان رەتتەۋدى ۇسىنعان ۋمار كرەملەۆتىڭ (لۋتفۋللوەۆ) باستاماسىنان باس تارتتى. ەكى ەل دە دەرەكتەردىڭ كورشىلەس مەملەكەتتىڭ ارنايى قىزمەتتەرىنىڭ قولىنا ءوتىپ كەتۋ قاۋپىن ءتۇسىنىپ، ۇلتتىق باقىلاۋ تەتىكتەرىن دامىتۋدى ءجون كوردى. ال قازاقستاننىڭ قازىرگى پوزيتسياسى ءالى كۇنگە دەيىن تۇسىنىكسىز.

كوتيول باسىلىمى ۋمار كرەملەۆتىڭ سوڭعى جىلدارى ورتالىق ازيانى اينالشىقتاپ جۇرگەنىن جازادى. ول تاشكەنتتە كەڭەستىك بوكسشىلارعا ەسكەرتكىش اشىپ، دۋشانبە قالاسىندا جوعارى لاۋازىمدى تۇلعالارمەن كەزدەسىپ، وزبەك وليمپياداشىلارىنا قوماقتى سىيلىقتار ۇلەستىردى. بىراق مۇنىڭ ءبارى ونىڭ تۇپكى ماقساتىن ىسكە اسىرۋعا كومەكتەسپەدى. ول ايماقتىڭ بۋكمەكەرلىك نارىعىن باقىلاۋعا الىپ، رەسەيدىڭ ۇستەمدىگىن ورناتۋعا تالپىنعان ەدى.

كرەملەۆكە جاقىن دەرەككوزدەردىڭ باعالاۋىنشا، ونىڭ ورتالىق ازيا ايماعىن ارالاۋىنا 3 ميلليون دوللاردان استام قاراجات جۇمسالعان. دەگەنمەن، وزبەكستاندا بۇل جوبا تولىق كۇيرەدى. رەسمي تاشكەنت قۇمار ويىن بيزنەسىن زاڭداستىرۋ ماسەلەسىن ۇزاق تالقىلاپ، ناتيجەسىندە مونوپوليانى ءوزىنىڭ ۇلتتىق پەرسپەكتيۆالىق جوبالار اگەنتتىگىنىڭ (ناپپ) قاراۋىنا بەردى.

تاجىكستاندا دا ۇقساس جاعداي قالىپتاستى. كرەملەۆتىڭ پرەزيدەنتتىڭ ۇلى رۋستام ەموماليمەن جىلى قارىم-قاتىناسىنا جانە تۋعان گيسسار اۋدانىندا جول سالۋ جوباسىنا قاراماستان، ەلدەگى بۋكمەكەرلىك نارىقتى رەتتەۋ قارجى مينيسترلىگىنىڭ قۇزىرىندا قالا بەردى.

وسى ساتسىزدىكتەردەن كەيىن كرەملەۆتىڭ قازاقستان مەن قىرعىزستاننان باسقا امالى قالماي وتىر. تۇركىمەنستان ونى مۇلدە جولاتپاعان. ءبىزدىڭ ەلىمىزدە بىرنەشە جىلدان بەرى ءباس تىگۋلەردى ەسەپكە الۋدىڭ بىرىڭعاي جۇيەسىن (ەسۋ) ەنگىزۋ ماسەلەسى تالقىلانىپ كەلەدى. ەلدەگى ساراپشىلار مەن دەرەككوزدەر بۇل پروتسەستى رەسەيدىڭ تسۋپيس جۇيەسىمەن تىكەلەي بايلانىستىرادى. تسۋپيس بۇگىندە رەسەيدەگى بۇكىل بۋكمەكەرلىك نارىقتى باقىلاپ وتىر جانە ميللياردتاعان تابىس اكەلۋدە. ساراپشىلاردىڭ پىكىرىنشە، «قۇمار ويىنعا تاۋەلدىلىكپەن كۇرەس» پەن «كولەڭكەلى سحەمالاردى جويۋ» دەگەن رەسمي ۇراننىڭ استارىندا الدەقايدا قاۋىپتى ارەكەت جاتىر. بۇل – قازاقستاننىڭ قارجى ينفراقۇرىلىمىنا سانكتسيا استىنداعى رەسەيلىك قۇرىلىمداردى كىرىكتىرۋ امالى.

قازاقستان ازىرگە كرەملەۆتىڭ ۇسىنىسىنا رەسمي تۇردە «جوق» دەمەدى. دەگەنمەن جۇمىس توپتارىندا وتىرعان كەيبىر مەملەكەتتىك قىزمەتشىلەر مۇنداي «بىرىزدەندىرۋدىڭ» تاۋەكەلدەرىنە الاڭداۋشىلىق ءبىلدىرىپ ءجۇر. ال قىرعىزستاندا ماسەلە ءالى كۇنگە دەيىن تالقىلانىپ جاتىر. بىشكەك تە تۇپكىلىكتى شەشىمىن قابىلداعان جوق.

Abai.kz