ءدىن – اللاعا جاقىنداۋدىڭ، يمان كەلتىرۋدىڭ جولى. يسلام ءدىنىنىڭ اسىل قۇندىلىقتارىمەن بىتە قايناسقان قازاق حالقىنىڭ سالت-داستۇرلەرى قاشاندا ۇلتتى ۇيىستىرىپ، حالىقتى ىنتىماعىمەن باۋراپ كەلەدى. تالاي عاسىر قورعاندارىن بۇزىپ شىعىپ، ءبىرشاما ۇرپاققا كوركەم مىنەز بەن تاعىلىمدى تاربيە سىيلاعان ءدىن مەن ءداستۇر ءوزارا ساباقتاسىپ، بۇگىندە تولىق ادام جاسايتىن رۋحانياتتىڭ كوزى رەتىندە ۇلكەن ماڭىزعا يە بولدى. ويتكەنى، كەشەگى اتا-بابالارىمىزدىڭ ءجۇرىپ وتكەن سارا جولى مەن قالىپتاستىرعان قالىبى– حالقىمىزدىڭ  سالت-داستۇرلەرى  بولسا، حالىق قامىن قاراستىرعان  ادەپ-يبادان باستالاتىن ادەت-عۇرىپتارىنىڭ باستاۋى يسلامعا  بارىپ تىرەلەدى. قاراپ وتىرساق، ءتىپتى، ارداقتى پايعامبارىمىز  مۇحاممەدتىڭ (وعان اللانىڭ سالاۋاتى مەن سالەمى بولسىن) سۇننەتى مەن حاديستەرى  ادەت-عۇرىپ  سالت-سانا رەتىندە قالىپتاسىپ، حالقىمىزدى ادامي، يماني-رۋحاني جاعىنان تاربيەلەپ كەلەدى.

قازاقتىڭ رۋحاني دۇنيەتانىمىندا اللانى ەسكە الۋ، ءسوزدى اللا اتىمەن باستاۋ – ەجەلدەن قالىپتاسقان ءداستۇر بولسا، «اللا اتىمەن باستادىم ءسوز ءالىبىن، جارىلقاعان، جاراتقان، ءبىر ءتاڭىرىم» دەپ ءسوز باستاپ، حاس قاجىب اتانعان ءجۇسىپ بالاساعۇني بابامىزدان بەرى ءسوز باستاعان جىراۋ، شەشەندەرىمىزدىڭ ەشقايسىسىنىڭ اۋزىنان اللاسى تۇسپەي ءوز ويلارىن، وسيەت سوزدەرىن، تولعاۋلارىن كوبىنە يماندىلىققا، ادىلدىككە، ادامگەرشىلىككە نەگىزدەپ جەتكىزگەن. ۇلى حاكىم ابايدىڭ «اللانىڭ، پايعامباردىڭ جولىندامىز، ىنتامىزدى بۇزباستىق يمانىمىز» دەۋى – قازاق حالقىنىڭ يسلام ءدىنىن جۇرەكپەن قابىلداپ، ونى ومىرلىك قاعيداعا اينالدىرعانىن ايعاقتايدى. بۇل جەردە اباي ءدىندى تەك سىرتقى عيبادات رەتىندە ەمەس، ادام بويىنداعى ىزگىلىك پەن رۋحاني تۇتاستىقتىڭ ولشەمى رەتىندە تۇسىندىرەدى. ءيا،تاريح پاراعىن پاراقتاساق، ۇشقىر ويمەن پارىقتاساق، زەرتتەۋشىلەردىڭ پايىمداۋىنشا، ەلىمىزگە يسلام ءدىنى VII عاسىردىڭ باسىندا كەلسە، سول كەزەڭنەن-اق قازاق حالقى ۇستانعان سالت-داستۇرلەردىڭ بىرقاتارى بۇگىنگى كۇنگە دەيىن جالعاسىپ كەلەدى. يسلام ءدىنى مەن مادەنيەتىنە دەيىن دە حالقىمىزدىڭ وزىندىك ادەت-عۇرىپتارى بولدى. ماسەلەن، «تاساتتىق»، «بەسىك قۇدا»، «قارسى قۇدا»، «سۇيەك جاڭعىرتۋ»، «قالىڭدىق الىپ قاشۋ» سىندى داستۇرلەر ەل اراسىندا كەڭ تاراعان. يسلام ءدىنى ەنگەننەن كەيىن بۇل ادەت-عۇرىپتار  جويىلىپ كەتپەي، شاريعات قاعيدالارىمەن جاندانىپ، ءارى قاراي ۇيلەسىم تاپتى. سەبەبى، حانافي ءمازھابىنىڭ نەگىزىن قالاعان يمام  ابۋ حانيفا حالىقتىڭ ادەت-عۇرپىنا ەرەكشە ءمان بەرىپ، ولاردى ەسكەرگەنىن كورۋگە بولادى. سوندىقتان بۇل جول اتا-بابالارىمىز ءۇشىن قولايلى ءارى ۇيلەسىمدى بولدى. مىسالى، حالقىمىزدىڭ سالت-داستۇرىندە كورشى اقىسىنا ەجەلدەن ەرەكشە ءمان بەرىلگەن. بۇل – حالىقتىڭ مادەنيەت پەن پايىم-پاراساتىنىڭ ايقىن كورىنىسى. سوندىقتان دا ەزۋىمەن ەنشى بەرگەن اتا-بابامىز: «كورشى اقىسى – ءتاڭىر اقىسى»، «ءۇي الما، كورشى ال» دەپ كەلەسىگە كەلىمدى سوزىمەن وسيەت قالدىرعان. ونىڭ تۇپكى توركىنى  پايعامبارىمىزدىڭ (وعان اللانىڭ سالاۋاتى مەن سالەمى بولسىن) «كورشىسى اش بولىپ، ءوزى توق جاتقان كىسى ءمۇمين ەمەس»، «ۇيدەن بۇرىن كورشى ال»، «جولعا شىقپاس بۇرىن جولداس تاپ» دەگەن حاديستەرىندە بەيادەپتىك پەن بەيبەرەكەتسىزدىكتى بايلاپ ۇستاپ، ادامي بولمىستى بايىتاتىن بارومەتر بارىن باعامدايمىز. سونداي-اق، حالقىمىز كۇندەلىكتى تۇرمىس-تىرشىلىگىندە، ومىرلىك ۇستانىمدا اۋەلدەن جاراتۋشىنى ەسكە الىپ، «اللا ساقتاسىن»، «اللا جار بولسىن»، «اللا الدىنان جارىلقاسىن»، «اللاعا امانات» دەپ ايتۋدى ادەتكە اينالدىرعان. بۇنىڭ ءبارى – رۋحاني ءتالىم-تاربيەنى بويعا شۋاق قىپ دارىتىپ بەرىپ، مادەنيەتىمىزدىڭ قالىپتاسۋىنا ىقپال ەتەتىن ىزگى داستۇرلەر.قاراپايىم سالەمدەسۋدەن باستالاتىن سىپايىلىق تا مۇسىلماندىق ادەپپەن ساباقتاس. سوندىقتان دا قازاق حالقىنىڭ ادەپتىلىك قاعيدالارى قاسيەتتى قۇران مەن حاديستەردەن دە ءنار الىپ، ءومىر تاجىريبەسىنە اينالعان مازمۇندى ماقال-ماتەلدەردە دە كورىنىس تاپقان.

ءيا،  كەز كەلگەن ۇلتتىڭ ەڭ باستى قۇندىلىعى – ونىڭ ءتىلى، سالت-ءداستۇرى جانە مادەنيەتى بولسا،  بۇلاردى ءبىر-بىرىنەن ءبولىپ قاراۋعا بولمايدى، سەبەبى ولار ءوزارا ۇيلەسىپ، تۇتاس حالىقتىڭ بولمىسى مەن مۇراتىن ايقىندايدى، ءبىر ەمەس بىرنەشە بۋىندى تاربيەلەيدى. وسى تۇرعىدان العاندا، قازاقتىڭ ۇلتتىق ءارى ءدىني داستۇرلەرىنىڭ جاس ۇرپاقتى تاربيەلەۋدەگى ءرولى وراسان زور. ءبىر شىندىق بار: كەشەگى جەتپىس جىل بويى ۇستەمدىك قۇرعان كەڭەستىك يدەولوگيا قازاقتىڭ وشاعىنان ءدىندى ىعىستىرعانىمەن، ءداستۇرىن جويا المادى. شىندىعىندا، قازاق ءۇشىن ءدىن مەن ءداستۇر ەگىز ۇعىمعا اينالدى. ءداستۇردىڭ ساقتالۋىنىڭ ارقاسىندا حالقىمىز سول كەزەڭدە دە مۇسىلماندىق بولمىسىن جوعالتپادى. قاراپ وتىرساق، ءار حالىقتىڭ عاسىرلار بويى قالىپتاسقان وزىندىك ادەت-عۇرپى مەن سالت-ءداستۇرى بار. ادامزات بالاسى سان الۋان ۇلتتار مەن ۇلىستاردان قۇرالعان. ارقايسىسىن ەرەكشەلەندىرەتىن ءوز ءتىلى، مادەنيەتى، ءداستۇرى جانە ءدىني سەنىمدەرى بار. بۇل الۋانتۇرلىلىك – اللا تاعالانىڭ قۇدىرەتتى دانالىعى.

قاراپ وتىرساق، قاسيەتتى قۇران كارىمنىڭ «حۋجۋرات» سۇرەسىنىڭ 13-اياتىندا بىلاي دەلىنگەن:«ەي، ادام بالاسى! ءبىز سەندەردى ءبىر ەر مەن ايەلدەن جاراتتىق. سونداي-اق ءبىر-بىرلەرىڭدى تانىپ-ءبىلۋ ءۇشىن سەندەردى ءتۇرلى ۇلتتار مەن رۋلارعا بولدىك. شىندىعىندا، اللانىڭ قۇزىرىندا ەڭ قادىرلىلەرىڭ – تاقۋالارىڭ. اقيقاتىندا، اللا ءبارىن ءبىلۋشى، ءار نارسەدەن حاباردار».

بۇل اياتتان تۇيگەنىمىز: اللا تاعالا ادامزاتتى ءارتۇرلى حالىق ەتىپ جاراتىپ، ولاردى ءوزارا تانىسۋعا، تۇسىنىسۋگە شاقىرعان. وزگەنى تانۋ ارقىلى ادام ءوزىن تاني الادى، ال ءوزىن تانۋ ارقىلى جاراتۋشىنى ياعني اللانى تانيدى. جەر جۇزىندە قانشاما ميلليونداعان حالىقتار ءومىر سۇرسە دە، ولاردىڭ ءتۇبى ءبىر – ءبارى ادام اتادان تارايدى. مۇسىلمان ۇمبەتى دە ءارتۇرلى ۇلتتار مەن ۇلىستاردان تۇرادى. ءاربىر مۇسىلمان حالىق ءوزىنىڭ قونىستانعان جەرىنە، ءومىر سۇرگەن ايماعىنا قاراي ايرىقشا تىلدىك، ناسىلدىك، مادەني جانە ۇلتتىق ەرەكشەلىكتەرگە يە. مىسالى حالقىمىزداعى يسلام دىنىمەن ۇندەسەتىن مىناداي داستۇرلەرىن ەرەكشە اتاۋعا بولادى.

قازاقتىڭ ەڭ ۇلكەن ءداستۇرلى تويلارىنىڭ ءبىرى – شىلدەحانا بولسا، نارەستەنىڭ دۇنيەگە كەلۋى – ءبىر عانا اۋلەتتىڭ ەمەس، بۇكىل اۋىلدىڭ قۋانىشى سانالعان. وسى تۇستا «شىلدەحانا» ءسوزىنىڭ قايدان شىققاندىعىنا توقتالا كەتسەك. «شىلدەحانا» ءسوزى پارسى تىلىنەن ەنگەن. ءشىل — «40»، حانا — «توي» دەگەن ماعىنانى بىلدىرەدى. ياعني بوسانعان ايەلگە 40 كۇن تولعان كۇنى ەل-جۇرت جينالىپ، ۇلكەن توي جاساپ، نارەستەنى بەسىككە سالادى. بالا – ءومىردىڭ ءسانى، قىزىعى. وسىعان بايلانىستى حالقىمىز «بالالى ءۇي – بازار، بالاسىز ءۇي – مازار» دەپ كوسەم سوزبەن كوسىلە  ايتىپ، شەشەن سوزبەن شەبەر تارقاتقان. سول سەبەپتى اتا-بابالارىمىز نارەستە دۇنيەگە كەلگەندە ارنايى قوي سويىپ، ءداستۇرلى ىرىمىن جاساعان. بۇل ءراسىم شاريعاتتا «اقيقا» دەپ اتالسا، قازاق داستۇرىندە «قالجا» دەگەن اتاۋمەن بەلگىلى. اتاۋلارى بولەك بولعانىمەن، ەكەۋىنىڭ دە ءسابيدىڭ اماندىعىن تىلەپ، جاڭا بوسانعان انانىڭ ساۋىعىپ، الدەنۋىنە جاعداي جاساۋداعى ءمانى ءبىر. شاريعات بويىنشا اقيقا قۇرباندىعى ەر بالاعا – ەكى قوي، قىز بالاعا – ءبىر قويدان شالىنسا، قازاق سالتىندا قالجا ءۇشىن كوبىنە ءبىر قوي سويىلعان. ايتپاقشى، شاريعات پەن قازاق ءداستۇرى بويىنشا اقيقا قۇرباندىعىنا شالىناتىن مالدىڭ جاعدايى سەمىز ءارى كۇتىمدى بولۋى ءتيىس دەگەن تالاپ بار.ەر بالا قىزعا قاراعاندا قوماعايلاۋ (اناسىن كوبىرەك ەمەتىن) بولعاندىقتان، اقيقاعا ەكى قوي شالىنعان دەگەن تۇسىنىك بار. سونىمەن قاتار، بۇل ءداستۇردىڭ ءمانى – جاڭا بوسانعان ايەلدىڭ ساۋىعىپ، ىستىق سورپا ءىشىپ، اياق-قولىن باۋىرىنا الىپ، كۇش جيناۋىنا جاعداي جاساۋ بولسا،  مۇنداي قامقورلىق انا دەنساۋلىعىنىڭ مىقتى بولۋىنا ءارى بالانىڭ دۇرىس ءوسىپ-جەتىلۋىنە وڭ ىقپال ەتكەن. اتا-بابامىز ايەلدى بوسانعاننان كەيىن 40 كۇن بويى جىلى ۇيدە ۇستاپ، ەرەكشە كۇتىم جاساعان.

قازاق حالقىنىڭ ەرەكشە سالتتارىنىڭ ءبىرى – ازان شاقىرىپ ات قويۋ ءداستۇرى.

جاڭا تۋعان نارەستەگە ەسىم بەرۋ – حالقىمىزدا اسا ماڭىزدى ءراسىم سانالعان. ءسابي دۇنيەگە كەلگەن ساتتە ونىڭ باسىن قۇبىلاعا قاراتىپ، وڭ قۇلاعىنا ازان ايتىلىپ، اتا-اناسى تاڭداعان ەسىم ءۇش رەت قايتالانىپ جاريا ەتىلەدى. سول  سەبەپتى حالىق اراسىندا «ازان شاقىرىپ قويعان اتى» دەگەن ۇعىم كەڭ تاراعان.بۇل امال ارداقتى پايعامبارىمىزدىڭ (وعان اللانىڭ سالاۋاتى مەن سالەمى بولسىن) سۇننەتىنەن باستاۋ الادى. شاريعات بويىنشا نارەستەنىڭ وڭ قۇلاعىنا ازان، ال سول قۇلاعىنا قامات ايتۋ مۇستاحاپ ءىس بولىپ ەسەپتەلەدى. بۇل جايىندا ساحابا ۋبايدۋللا يبن ءابۋ رافيع (اللا وعان رازى بولسىن) اكەسىنەن مىناداي دەرەك جەتكىزەدى:«فاتيما انامىز ۇلى حاساندى دۇنيەگە اكەلگەندە، اللا ەلشىسى (وعان اللانىڭ سالاۋاتى مەن سالەمى بولسىن) ونىڭ قۇلاعىنا نامازعا شاقىرعانداي ازان ايتقانىن كوردىم» (يمام تيرميزي ريۋاياتى).

قازىرگى زاماندا بالالاردى تاربيەلەۋدىڭ ەڭ ءتيىمدى جولدارىنىڭ ءبىرى – ءدىن مەن ءداستۇردى ساباقتاستىرىپ، يماندىلىققا باۋلۋ. ويتكەنى جەتىلگەن ەكى دىنگەك –بالانى ىزگىلىككە، مەيىرىمگە، ادالدىققا شاقىرادى. ءاربىر اتا-انا ءوز ۇرپاعىنىڭ جاقسى ادام بولىپ ءوسۋىن قالايدى.  ول ءۇشىن بالا بويىنا ەڭ اۋەلى رۋحاني قۇندىلىقتاردى ءسىڭىرۋ قاجەت. ءدىن مەن ءداستۇر ارقىلى تاربيەلەۋ – بالانى قورقىتۋ نەمەسە مىندەتتەۋ ەمەس، كەرىسىنشە، وعان جۇرەك جىلۋىمەن، سۇيىسپەنشىلىكپەن دۇرىس جولدى كورسەتۋ. يماندىلىققا تاربيەلەنگەن بالا ۇلكەندى سىيلايدى، كىشىنى قۇرمەتتەيدى، وتىرىك ايتپايدى، جامان ادەتتەن بويىن اۋلاق ۇستايدى. الايدا ءبىر ەسكەرەتىن جايت بار ول – بالالاردى بەلگىلى ءبىر اعىمنىڭ جەتەگىنە ەرىپ كەتۋدەن ساقتاۋ. كەيدە شىنىن ايتۋ كەرەك، ءدىندى ۇستانعانسىپ، ۇلتتىق دىلىمىزدەن اجىراپ قالۋ جاعدايى دا كەزدەسەدى. كەرىسىنشە، ءداستۇردى عانا نەگىزگە الىپ، ءدىني قاعيدالارعا قايشى كەلەتىن جايتتارعا دا جول بەرىلىپ جاتادى. سوندىقتان ءداستۇر مەن ءدىندى ۇيلەستىرە ۇستانۋ – حالقىمىزدىڭ رۋحاني تۇتاستىعىن ساقتاۋدىڭ كەپىلى. سول سەبەپتى ءدىن تاربيەسى داستۇرمەن ساباقتاسىپ، اتا-انا باقىلاۋىمەن، رەسمي ءدىن ماماندارىنىڭ تۇسىندىرۋىمەن جۇرگىزىلگەنى دۇرىس. بۇرىن جالپى ءبىلىم بەرەتىن مەكتەپتەردە 9-سىنىپتا «ءدىنتانۋ نەگىزدەرى» اتتى ءپان مىندەتتى تۇردە جۇرگىزىلەتىن. بۇل ءپاننىڭ ماقساتى – وقۋشىلارعا ءدىننىڭ تاريحى، الەمدىك جانە ءداستۇرلى دىندەر، ولاردىڭ قۇندىلىقتارى، مادەنيەتتەگى ورنى تۋرالى عىلىمي نەگىزدە تۇسىنىك بەرۋ ەدى. ءپاندى قوعامدىق پاندەر مۇعالىمدەرى نەمەسە ارنايى دايىندىقتان وتكەن ۇستازدار جۇرگىزىپ، ساباقتىڭ مازمۇنى زايىرلى سيپاتتا بولاتىن، ياعني، بەلگىلى ءبىر ءدىندى ناسيحاتتاۋ ەمەس، اقپاراتتىق-اعارتۋشىلىق تۇرعىدا بەرىلەتىن. قازىر مەكتەپتە مۇعالىم بولسام دا ءدىني ساۋاتتىلىق جايىنداعى ءپاندى  كەزدەستىرمەيمىن. ال جوعارى وقۋ ورىندارىندا ۋنيۆەرسيتەت پەن كوللەدجدەردە ارنايى «ءدىنتانۋ»، «تەولوگيا»، «يسلامتانۋ» ماماندىقتارى، ساباقتارى  بار. سونىمەن قاتار، كەيبىر گۋمانيتارلىق جانە الەۋمەتتىك ماماندىقتاردا دىنتانۋعا بايلانىستى ەلەكتيۆتى پاندەر نەمەسە كۋرستار ۇسىنىلادى. سوندىقتان دا مەنىڭ ۇستاز رەتىندەگى ۇسىنىسىم: قازىرگى جاس بۋىندى ءدىن مەن داستۇرگە نەگىزدەلگەن كۋرسپەن وقىتۋ ارقىلى يماندىلىققا تاربيەلەۋ كەرەك. ءدىن– بالالارعا رۋحاني نەگىز بەرەتىن ۇلكەن مەكتەپ بولسا، ونى جۇمساق، دۇرىس جولمەن جانە  ۇلتتىق داستۇرمەن ساباقتاستىرىپ ۇيرەتكەندە عانا جەمىسىن بەرەدى. سونىمەن قاتار  ءدىندى تۇسىندىرۋدە وقۋشىلاردىڭ دەڭگەيىن ەسكەرۋ قاجەت دەپ ەسەپتەيمىن. كىشكەنتاي بالاعا اۋىر ءدىني مىندەتتەردى جۇكتەي بەرگەننەن گورى، الدىمەن ىزگىلىككە، ادامگەرشىلىككە باۋلۋ ماڭىزدى. بالانى قورقىتىپ ەمەس، سۇيىسپەنشىلىكپەن ۇيرەتۋ كەرەك. «قۇدايدان قورىق» دەپ ەمەس، «قۇداي جاقسى كورەتىن بالا بول» دەپ جەتكىزگەن الدەقايدا پايدالى بولا ما دەپ ويلايمىن. ەسكەرەتىن جايت: ءدىننىڭ اتىن جامىلىپ قاتالدىققا نەمەسە شامادان تىس تالاپقا بارۋعا بولمايدى. ءدىن تاربيەسى تەك ناماز، ورازامەن عانا شەكتەلمەيدى، ول كۇندەلىكتى ومىردەگى ادەپ-يبا، مىنەز-قۇلىق، قايىرىمدىلىقپەن دە ولشەنەدى.

بالانى ءداستۇر مەن دىنمەن تاربيەلەۋدىڭ پايدالى جاقتارى:

• بالانى يماندىلىققا، مەيىرىمگە، ادالدىققا ۇيرەتەدى.
• ۇلكەندى سىيلاۋ، كىشىنى قۇرمەتتەۋ، اماناتقا ادال بولۋ سياقتى قۇندىلىقتاردى قالىپتاستىرادى.
• جامان ادەتتەردەن (وتىرىك، جالقاۋلىق، زۇلىمدىق) ساقتاندىرادى.
• جاۋاپكەرشىلىك پەن ار-ۇيات سەزىمىن دامىتادى

(بۇل كەستەنى ءدىن مەن ءداستۇر تاربيەسىنە باعىتتاۋشى رەتىندە بولاشاقتا كومەگى بولار دەگەن ويمەن بەرىپ وتىرمىن)

ءدىن مەن ءداستۇردى ساباقتاستىرىپ تاربيەلەۋ – بالانى قورقىتۋ نەمەسە مىندەتتەۋ ەمەس، كەرىسىنشە، وعان جۇرەك جىلۋىمەن، سۇيىسپەنشىلىكپەن دۇرىس جولدى كورسەتۋ دەپ بىلەمىن. يماندىلىققا تاربيەلەنگەن بالا ۇلكەندى سىيلايدى، كىشىنى قۇرمەتتەيدى، وتىرىك ايتپايدى، جامان ادەتتەن بويىن اۋلاق ۇستايدى. مەنىڭ ويىم، قازىرگى  گيپەراكتيۆتى الفا وكىلدەرىن يماندىلىق ارقىلى تاربيەلەۋ كەرەك. قاسيەتتى رامازان ايىندا بالالاردىڭ دا ۇلكەندەردەن قالىسپاي ورازا ۇستاپ  بەس پارىزدىڭ ءبىرىن اتقارىپ جۇرگەنىن كورۋ – ولاردىڭ جۇرەگىندە يماندىلىقتىڭ نۇرى بار ەكەنىن كورسەتەدى. بۇل – قوعامىمىز ءۇشىن ۇلكەن قۋانىش. ويتكەنى يماندى ۇرپاق – بولاشاقتىڭ بەرىك نەگىزى.

قورىتىندىلاي كەلە، ءدىن  مەن ءداستۇر – بالالارعا بەرىلەتىن تاربيەنىڭ ەڭ اسىل باستاۋى. ولاردى ءدىن  مەن ءداستۇر ارقىلى بولاشاقتى باعامداۋعا ۇيرەتۋ، يماندىلىققا باۋلۋ ارقاشان وزەكتى بولماق.وسىلايشا  بىز جاۋاپكەرشىلىگى مول، ار-ۇياتتى، مەيىرىمدى ۇرپاق تاربيەلەي الامىز. سەبەبى، ءدىن مەن ءداستۇر – رۋحاني تاربيەنىڭ نەگىزگى دىڭگەگى ەمەس پە؟!

جەتكەنشەك مەڭدىعاليۇلى،

الماتى قالاسى، №174 مەكتەپ-گيمنازيانىڭ قازاق ءتىلى مەن ادەبيەتى ءپانىنىڭ مۇعالىمى

Abai.kz