قازاق پوەزياسى – ۇلتتىڭ رۋحاني وزەگى، ەلدىڭ ەڭسەسىن كوتەرىپ، ءسوز قۇدىرەتى ارقىلى ساناعا ساۋلە تۇسىرەتىن ۇلى ءسوز ونەرى. سول كيەلى ونەردى ومىرىنە سەرىك ەتىپ، ءومىرىن ولەڭمەن ورگەن اقىنداردىڭ ءبىرى – قوجاحمەتوۆ رينات قۇدايبەرگەنۇلى.

ءسوز زەرگەرى، اقىن ريناتتىڭ شىعارمالارىن زەردەلەگەندە، ەڭ الدىمەن كوزگە تۇسەتىنى – تازالىق پەن شىنايىلىق. ول جاساندىلىقتان ادا، ءومىردىڭ وزىنەن ءنار العان ولەڭدەر جازادى. ءار شۋماعىنان اۋىل ءومىرىنىڭ شىندىعى، ەڭبەك ادامدارىنىڭ بەينەسى، تۋعان جەرگە دەگەن ىڭكار سەزىم انىق اڭعارىلادى. سول سەبەپتى ريناتتىڭ پوەزياسى – قاراپايىم اۋىل تىرشىلىگىنىڭ فيلوسوفياسىن كوركەم تىلمەن ورنەكتەگەن ەرەكشە پوەزيالىق الەم. قاي داۋىردە دە ەلدىڭ ءسوزىن سويلەپ، حالىقتىڭ مۇراتىن ولەڭمەن ورنەكتەگەن اقىندار بولعان، بولاتىنى زاڭدىلىق. بۇگىنگى قازاق ادەبيەتىندە سول ءداستۇردى جالعاپ، جاڭا مازمۇنمەن بايىتقان ءىنى بۋىننىڭ ءبىرى، كەزەكتى ماقالامىزدىڭ باس كەيىپكەرى اقىن رينات قوجاحمەتوۆ. كەيىپكەرىمىزدىڭ ءومىر جولى، شىعارماشىلىعى تۋرالى قىسقاشا ءومىربايانىنا توقتالىپ وتەيىك.

سۋرەت: اۆتوردىڭ مۇراعاتىنان الىندى.

اقىن، ازامات رينات 1985 جىلدىڭ 7 شىلدەسىندە شىعىس قازاقستان وبلىسى، تارباعاتاي اۋدانى، جەتىارال ەلدى-مەكەنىندە دۇنيەگە كەلگەن. 2003 جىلى اۋىلىنداعى ورتا مەكتەپتى اياقتاپ، ەڭبەك جولىن الماتى قالاسىندا قۇرىلىس سالاسىندا باستاعان. ەكى جىل بويى الماتىدا ءتۇرلى نىسانداردىڭ سالىنۋىنا اتسالىسىپ، ەڭبەكپەن شىڭدالدى.

2005 جىلى استانا قالاسىنا قونىس اۋدارىپ، ەلوردا قۇرىلىسىنىڭ قارقىندى ءجۇرىپ جاتقان كەزەڭىندە قالانىڭ ينفراقۇرىلىمىنىڭ دامۋىنا ءوز ۇلەسىن قوستى. ون بەس جىلعا جۋىق ۋاقىت بويى باس قالادا ءتۇرلى مەملەكەتتىك عيماراتتاردىڭ بوي كوتەرۋىنە قاتىسىپ، تاجىريبە جيناقتادى. قۇرىلىس سالاسىندا ەڭبەك ەتە ءجۇرىپ، كوكشەتاۋ قالاسىنداعى كاسىبي ءبىلىم بەرەتىن ارنايى كاسىپتىك وقۋ ورنىندا وقىپ، دانەكەرلەۋشى ماماندىعىن يگەردى.

2009 جىلى اۋىلداسى دۇنگەنەنوۆا دانا تىلەۋعازىقىزىمەن شاڭىراق كوتەرىپ، وتباسىلىق ءومىرىن استانادا جالعاستىردى. ۋاقىت وتە تۋعان جەرگە دەگەن ساعىنىش جەتەلەپ، 2018 جىلى وتباسىمەن اۋىلعا قايتا ورالىپ، اتا-اناعا قامقور بولىپ، قولعابىس ەتىپ، اۋىل تىرشىلىگىنە بەلسەنە ارالاستى. ريناتتىڭ زايىبى – قازاق ءتىلى مەن ادەبيەتى ءپانىنىڭ مۇعالىمى، جەتىارال ورتا مەكتەپ-بالاباقشا كەشەنىندە قىزمەت ەتەدى. ەرلى-زايىپتىلار ءتورت ۇل تاربيەلەپ وتىر. ۇلكەن ۇلى – مەكتەپ پرەزيدەنتى ءارى وبلىستىق ۆولەيبول چەمپيونى، ەكىنشى ۇلى – ۇزدىك وقۋشى، ءۇشىنشى ۇلى – بيىل ءبىرىنشى سىنىپ تابالدىرىعىن اتتاسا، كەنجەسى – بالاباقشا دايارلىعىندا.

جوعارىدا ماقالامىزدىڭ كەيىپكەرى اقىن ر.قوجاحمەتوۆتىڭ ون ساۋساعىنان ونەر تامعان ازامات ەكەنىن ايتىپ وتتىك. ءوزىنىڭ تۋعان ەلدى-مەكەنى جەتىارال اۋىلىنا كىرەبەرىس قاقپانىڭ ءساندى، سالتاناتتى ورناتىلۋىن – اۋىل ازاماتتارىنىڭ ەلدىك رۋحىنىڭ ايعاعى دەپ بىلەمىز. اۋىلدىڭ تۋماسى، اقىن ر.قوجاحمەتوۆ تۋعان جەرىنىڭ كوركەيۋى ءۇشىن ەڭبەك ەتىپ، قاقپانىڭ تەمىرىن كەسىپ، دانەكەرلەپ جاساپ شىققان. قاجەتتى ماتەريالداردى اۋىل جاستارى بىرىگىپ جيناپ، قارجىسىن جۇمىلا كوتەرگەن. ناتيجەسىندە شامامەن 800 مىڭ تەڭگە كولەمىندە عانا قاراجات جۇمسالىپ، ۇلكەن ءىس جۇزەگە اسقان. ال كەي اۋىلدار مۇنداي جۇمىستاردى مەردىگەرلەرگە تاپسىرىپ، بىرنەشە ميلليون تەڭگە شىعىندايتىنى بار. بۇل مىسال – ءبىر جاعىنان ۇلتجاندىلىقتىڭ، ەكىنشى جاعىنان ۇقىپتىلىق پەن ۇيىمداسقان ەڭبەكتىڭ كورىنىسى دەپ بىلەمىز. ر.قوجاحمەتوۆ كەيبىر كەلەڭسىز ماسەلەلەردى دە اشىق ايتىپ، الەۋمەتتىك جەلىدە باتىل كوتەرىپ كەلەدى. ونىڭ بۇل ارەكەتى – ناعىز ەلجاندىلىق پەن ازاماتتىق ۇستانىمنىڭ ۇلگىسى. «اۋىلىمىزدىڭ ابىرويىن ويلاپ، تۋعان جەرگە ۇلەس قوسۋ – ءار ازاماتتىڭ پارىزى»، – دەيدى اقىن، ازامات رينات. شىنىندا دا، ەل يگىلىگى ءۇشىن تەر توككەن ازاماتتىڭ ءىسى كوپكە ۇلگى، ال تۋعان جەرگە تاعزىم – رۋحاني كەمەلدىلىكتىڭ بەلگىسى.

ءسوز زەرگەرى ر.قوجاحمەتوۆ – شىعىس ايماعىنا تانىمال اقىنداردىڭ ءبىرى. ولەڭگە جانى جاقىن ول بوس ۋاقىتىندا جىر جازۋمەن اينالىسىپ، ءتۇرلى مۇشايرالارعا قاتىسىپ ءجۇر. اقىننىڭ قىرىق جاسقا تولۋ مەرەيتويىنا وراي، «سىرلاسىم» اتتى جىر جيناعى جارىق كورگەن. كىتاپ كسرو، قازاق كسر حالىق اعارتۋ ءىسىنىڭ ۇزدىگى، كسرو مەملەكەتتىك سىيلىعىنىڭ يەگەرى، «قازاقستان ءبىلىم بەرۋ ءىسىنىڭ قۇرمەتتى قىزمەتكەرى»، «قازاقستاننىڭ ەڭبەك سىڭىرگەن قايراتكەرى»، قازاقستان ۇلتتىق پەداگوگيكا عىلىمدارى اكادەمياسىنىڭ قۇرمەتتى اكادەميگى، پروفەسسور، ەلى «حان اپا» اتاعان قانيپا ومارعاليقىزى بىتىباەۆا اتىنداعى عىلىمي-زەرتتەۋ ورتالىعىنىڭ (الماتى قالاسىنداعى) قولداۋىمەن باسىلىپ شىققان. جىر جيناعىنىڭ جارىق كورۋىنە باقىتگۇل بىتىباەۆا زور ۇلەس قوسقان، ال بەلگىلى ايتىسكەر اقىن اسىلان عافۋروۆ العىسوز جازىپ، اۆتوردىڭ شىعارماشىلىعىنا جوعارى باعا بەرگەن.

اقىن رينات قازاقستان اۆتورلار قوعامىنىڭ، سونداي-اق «بارقىتبەلدە جىر-جەبە» رۋحاني-شىعارماشىلىق بىرلەستىگىنىڭ جەتەكشىسى ءارى شىعارماشىلىق باعىتتاعى رۋحتاس اعاسى، ونەرپاز ازامات، سازگەر، اقىن باقىتبەك ارىمبەكوۆپەن بىرگە وسى بىرلەستىكتىڭ قۇرىلۋىنا ۇيىتقى بولعانداردىڭ ءبىرى. جوعارىدا تىلگە تيەك ەتكەن شىعارماشىلىق بىرلەستىكتىڭ بەلدى مۇشەسى. كوپتەگەن ءان ولەڭدەردىڭ تۋىندىگەرى.

شىعارماشىلىق، اقىندىق باعىتتا كوپتەگەن جەتىستىكتەرگە قول جەتكىزگەن. ول جەتىستىكتەرىن تىزە بەرسەك ماقالا اۋقىمى كوتەرمەيتىنى بەلگىلى. تەك باستى، نەگىزگىلەرىنە عانا توقتالىپ وتەيىك. باقىت يحسانوۆتىڭ 90 جىلدىعىنا ارنالعان ءمۇشايرادا باس جۇلدە،

مۇقاعالي ماقاتاەۆ اتىنداعى رەسپۋبليكالىق، تارباعاتاي اۋدانىنىڭ قايتا قۇرىلعانىنا (اۋدان ورتالىعى ستاتۋسىن قايتا يەلەنۋى) ارنالعان بايقاۋلاردا، حاكىم، اقىن اباي قۇنانبايۇلىنىڭ 175, 180 جىلدىعىنا ارنالعان ءمۇشايرالاردا جۇلدەلى ورىنداردى (ونىڭ ءبىرى تور تاي ءمىنۋى. اقىن ريناتتىڭ وسى وقيعاعا ارنالعان «حالقىم بەرگەن تور تايىم...» اتتى ولەڭ جازعانىن شىعارماشىلىق باعىتتاعى ارىپتەستەرى بىلەدى) يەلەنۋى ريناتتىڭ اقىندىق الەۋەتىن ايشىقتايتىن دەرەكتەر.

بۇگىندە اقىن رينات ءوزى دە شىعارماشىلىق باعىتتاعى ۇستاز قىزمەتىن اتقارىپ جۇرگەن ازاماتتاردىڭ ءبىرى. تۋعان اۋىلىندا ەل يگىلىگىنە قىزمەت ەتىپ، جاس ورەندەردىڭ شىعارماشىلىق قابىلەتىن دامىتۋعا اتسالىسىپ ءجۇر. ءوزى ايتقانداي، ەلىنىڭ «اقىن» اتاۋى – حالىقتىڭ بەرگەن باعاسى، ال ءوزى ءۇشىن ەڭ قىمبات ماراپات – تۋعان جەر مەن شاكىرتتەرىنىڭ جەتىستىگى.

بيىل «قامال الاتىن» قىرىق جاسقا تولعان اقىن الداعى ۋاقىتتا دا شابىتىن شىڭداپ، تۋعان ەلىنىڭ رۋحىن كوتەرەتىن جىرلارىمەن وقىرمانىن سۋسىنداتۋدى ماقسات تۇتادى. ءوزى تاعىلىم بەرگەن شاكىرتتەرى اۋداندىق، وبلىستىق، رەسپۋبليكالىق (استانا، الماتى، وسكەمەن، سەمەي قالالارىندا) دارەجەدە وتكىزىلگەن، وتكىزىلىپ تۇراتىن ءتۇرلى جىر ءمۇشايرالارىنا قاتىسىپ، ولار دا بيىك بەلەستەردى باعىندىرىپ جۇرگەن شىعارماشىلىق يەلەرى. ءبىر شاكىرتى استانا قالاسىندا وتكەن رەسپۋبليكالىق بايقاۋدا قاتارىنان ەكى جىل بويى باس جۇلدە يەلەنسە، تاعى ءبىر شاكىرتى الماتى قالاسىندا وتكەن رەسپۋبليكالىق ءمۇشايرادا باس جۇلدە الىپ، شىعىس ەلىنىڭ، تارباعاتاي ءوڭىرىنىڭ مەرەيىن اسىرىپ، ۇستاز ءۇمىتىن اقتاعان شاكىرتتەر بولدى.

اقىن ريناتتىڭ پوەزياسىندا تۋعان ولكە، حالىق ءداستۇرى، ەڭبەك ادامى، تابيعات قۇبىلىسى جانە ەل بىرلىگى سەكىلدى ماڭگىلىك تاقىرىپتار ايقىن كورىنىس تابادى. ونىڭ شىعارمالارى – كوركەمدىك ءداستۇر مەن قازىرگى زامان پوەزياسىنىڭ ساباقتاستىعىن ايشىقتايتىن قۇندىلىق.

اقىن جىرلارىنا تۋعان جەر، ەل، وتانشىلدىق، اتا-انانى، اينالاڭداعى جانداردى قۇرمەتتەۋ، پەرزەنتتىك پارىز، ادامدىق قادىر-قاسيەت ماسەلەلەرى ارقاۋ بولعان. قولىما اقىننىڭ: «حالقىم بەرگەن تور تايىم...»، «اۋىلدى اڭساۋ»، «جەتىارال شاباندوزدارىنا»، «قىس مىنەزى»، «ابىر-سابىر» اتتى تۋىندىلارى ءتۇستى. بۇل شىعارمالار قازاقتىڭ اۋىلىنىڭ ءومىرىن بوياماسىز بەينەلەيتىن كوركەم شەجىرە ىسپەتتى.

رينات ءوز پوەزياسىن بيىك ۇعىمدارعا قۇرعان، اتاپ ايتقاندا، رۋح، نامىس، ەلدىك سانا، ىزگىلىك، قۇرمەت، ەڭبەك جانە تاعى باسقا نەگىزگى قۇندىلىقتار. ول ولەڭىنە ءومىردىڭ شىندىعىن ارقاۋ ەتەدى. سول سەبەپتى اقىن ريناتتىڭ جىرلارىندا شىنايىلىق، قاراپايىمدىلىق پەن ۇلتتىق دۇنيەتانىم قاتار ورىلەدى. ولەڭ ءسوز يەسىنىڭ «حالقىم بەرگەن تور تايىم...» ولەڭى وسى تۇجىرىمىمىزدىڭ جارقىن مىسالى. بۇل ولەڭىندە اقىن جۇلدە العانداعى قۋانىشىن عانا ەمەس، حالىقتىڭ ىقىلاسىن، ەل سەنىمىن، ونەرگە دەگەن قۇرمەتتى جىرىنا ارقاۋ ەتەدى.

«...قالىپ ەدى كوزىمنەن ءسال جاس شىعا،

اسلان اعا ارقامنان كەپ قاقتىدا.

مىناۋ ساعان جۇرتتىڭ بەرگەن جۇلدەسى،

دەپ مىنگىزدى تورى تايدى استىما.

قيالىما ەرىپ كەتتتى وي مۇلدە،

مىڭ راحمەت، ونەرىمە ساي بىلگەن...

مۇراتحاننىڭ باس جۇلدەسى ارعىماق،

ال مەنىكى، ودان كەيىن «تاي جۇلدە»... بۇل ولەڭ جولدارىندا قاناعات پەن كىشىپەيىلدىلىك، ەلىنە دەگەن ريزاشىلىق پەن العىس سەزىمى جاتىر. ولەڭنىڭ تۇپكى يدەياسى – ەڭبەكتىڭ قادىرىن، ەل سەنىمىنىڭ سالماعىن، جاۋاپكەرشىلىگىن سەزىنۋ.

قازاقتىڭ ءداستۇرلى بولمىسىندا تۇلپار مەن ەردىڭ ورنى ەرەكشە. اقىن رينات وسى ءداستۇردى جاڭعىرتىپ، وقىرمانىنا، جاستارعا رۋح بەرەتىن، شابىتتى شىعارماشىلىعىنىڭ جەمىسى سانالاتىن «جەتىارال شاباندوزدارىنا» اتتى ولەڭىن جازدى.

«...قورعاپ جۇرگەن اۋىلىنىڭ نامىسىن،

تۇلپار سەنىڭ، سەن سايگۇلىك باعىسىڭ.

دودالاردا توپتى جارىپ كەلىڭدەر،

وزدەرىڭدى الاش جۇرتى تانىسىن...». اقىن بۇل تۋىندىسىندا جىگىتتىك نامىستى، اۋىل بالاسىنىڭ سەرىلىگىن، ەل نامىسىن قورعاۋ سەزىمىن دارىپتەيدى. ولەڭدە تۇلپار – باتىلدىقتىڭ، ال شاباندوز – ەل نامىسىن ارقالاعان جاس ۇرپاقتىڭ سيمۆولى.

عىلىمي تۇرعىدان العاندا، بۇل پوەتيكالىق ءماتىن قازاق ەتنومادەني كودىنىڭ كوركەم بەينەلەۋ تاسىلىمەن جاڭعىرتىلۋى دەپ بىلەمىز. اقىننىڭ رۋحتى ءسوزى جاستاردىڭ بويىنداعى نامىس پەن اردىڭ وتىن مازداتادى. قازاقتىڭ ءار اقىنى ءۇشىن تۋعان اۋىل – شىعارماشىلىق باستاۋى، رۋحاني مەكەنى. ءسوز شەبەرى ر.قوجاحمەتوۆتىڭ «اۋىلدى اڭساۋ» ولەڭى سونىڭ ايقىن دالەلى. اقىن بۇل تۋىندىسىندا اۋىلعا دەگەن ساعىنىشتى، وتكەن شاقتىڭ ەستەلىگىن، ادام مەن جەر اراسىنداعى تىلسىم بايلانىستى نازىك پوەتيكالىق فورمادا بەينەلەيدى.

«...كوزىمە الىس كەتسەم جاس الامىن،

ءبىر ساعان قۇستاي ۇشىپ جەتە الامىن.

بايلاۋلى ءبىر وزىڭە مەندىك جۇرەك،

مەكەنىم – قاسيەتتى جەتىارالىم!». وسى قاراپايىم ولەڭ جولدارىندا تۇتاس ءومىر فيلوسوفياسى بار. ءوزى تۋىپ-وسكەن جەتىارال اۋىلى – تەك گەوگرافيالىق ۇعىم عانا ەمەس، ول اقىن ءۇشىن جۇرەكتىڭ وتى، رۋحتىڭ مەكەنى سانالادى. اۋىلدى اڭساۋ ارقىلى رينات ۇلتتىڭ ۇمىت بولا باستاعان رۋحاني تامىرلارىنا قان جۇگىرتىپ، ءتىرىلتىپ، وقىرمانى مەن جاس بۋىنعا تۋعان ەل، تۋعان جەر قادىرىن ناسيحاتتاپ، ولاردى اتالعان قۇندىلىقتاردى قۇرمەتتەۋگە ۇندەيدى، شاقىرادى. بۇل تۇرعىدان ولەڭنىڭ مازمۇنىندا فيلوسوفيالىق، اكسيولوگيالىق، ەكولوگيالىق سانا، ۇلتتىق تانىم، ءداستۇرلى دۇنيەتانىم جانە ەموتسيالىق ەستەتيكا قاتار توعىسادى.

ءسوز زەرگەرى ر.قوجاحمەتوۆتىڭ تابيعاتتى سۋرەتتەۋ ءتاسىلى قازاقى ءومىر سالتىمەن ەتەنە استاسقان. اقىننىڭ «قىس مىنەزى» ولەڭىندە اقىن اۋىل تىرشىلىگىندەگى ەڭبەك تىنىسىن، تابيعاتپەن ەتەنە ءومىر سۇرەتىن ادامداردىڭ ىشكى ليريكالىق جاي-كۇيىن پوەزيالىق تىلمەن ورنەكتەيدى:

«اعام ءجۇر ۇيگە كىرمەي، ءشوپ قورادا...

انام ءجۇر كوجەقاتىق ەتىن شايىپ...

قولعابىن اكەم وتىر پەشكە جايىپ...». بۇل جولدار ءبىر وتباسىنىڭ عانا ەمەس، تۇتاس اۋىل تىرشىلىگىنىڭ «ولەڭمەن سالىنعان سۋرەتتى بەينەسى». ال «ابىر-سابىر» ولەڭىندە كۇزگى ناۋقاننىڭ قاربالاسى، ادامدار اراسىنداعى سىيلاستىق پەن بىرلىك سيپاتتالادى.

«...انام دا جايعاپ قويدى قۇرت پەن مايىن.

كومەككە كورشى-قولاڭ كەلدى، انە،

بايبىشەم دەمدەپ جاتىر كۇرەڭ شايىن.

تىرشىلىك توقتامايدى بۇگىنمەنەن،

اعايىن تاتۋلىعىن قۇنىم دەر ەم.

اۋىلىم ابىر-سابىر، ناۋقان كەزدە،

جۇك كولىك سابىلادى گۇرىلدەگەن». ريناتتىڭ بۇل ولەڭىندە ەڭبەك – ەستەتيكالىق قۇندىلىققا اينالادى. اقىن قازاق ءومىرىنىڭ كۇندەلىكتى كورىنىستەرىن فيلوسوفيالىق تەرەڭدىكپەن جەتكىزەدى. ولەڭ ءسوز يەسى اقىن ر.قوجاحمەتوۆتىڭ پوەزياسىن تالداۋ بارىسىندا ونىڭ ءتىلىنىڭ تازالىعى مەن بەينەلىلىگى ايرىقشا نازار اۋدارتادى. ول پوەتيكالىق قۇرىلىمدا قاراپايىم قازاق ءسوزىن كوركەم ماعىناعا اينالدىرادى. اقىننىڭ مەتافورالارى تابيعي، بەينەلەرى ناقتى ومىردەن الىنعان. مىسالى، «اق تۇتەك، بەت قاراتپاس تۇمان دالام» نەمەسە «ءون بويدان قوڭىر سالقىن وتەتىندەي» دەگەن جولداردا تابيعات قۇبىلىسى مەن ادام سەزىمى تۇتاسىپ كەتەدى. بۇل – قازىرگى قازاق پوەزياسىنا ءتان رەاليستىك-پوەتيكالىق باعىتتىڭ ايقىن ۇلگىسى دەپ بىلەمىز. ءسوز شەبەرى. ر.قوجاحمەتوۆ تۋعان ەلىن، جەرىن جىرلاۋدى ازاماتتىق بورىشىم، ماقستۇىم دەپ ۇعىنعان اقىن. ول ولەڭ ارقىلى ەلگە سۇيىسپەنشىلىكتى، ەڭبەكتى قادىرلەۋدى، نامىستى بيىك ۇستاۋدى ۇيرەتەدى. اقىننىڭ شىعارماشىلىعى – ۇلتتىق رۋحتىڭ، ادامدىق پاراساتتىڭ جانە پوەزيالىق ءداستۇردىڭ توعىسۋ نۇكتەسى، ەل مەن جەرگە دەگەن سۇيىسپەنشىلىكتىڭ كوركەم كورىنىسى. ولەڭدەرى ارقىلى تۋعان جەردىڭ قادىرىن، ەڭبەك ادامدارىنىڭ بولمىسىن، تابيعات پەن ادام ۇيلەسىمىن جاڭاشا قىرىنان ايشىقتايدى. قازاق ادەبيەتىندە اۋىل تاقىرىبى ۇمىت بولعان جوق – ونى بۇگىنگى بۋىن جاڭا تۇرعىدان جىرلاپ ءجۇر. سول بۋىننىڭ الدىڭعى قاتارىندا اقىن ر.قوجاحمەتوۆ ەسىمى تۇراتىنى زاڭدىلىق. اقىننىڭ ءاربىر ولەڭى ەلدىك رۋحتىڭ ءۇنى، ۇلتتىق مىنەزدىڭ ايعاعى،

تۋعان جەردىڭ ءيىسىن، اتا-انانىڭ مەيىرىمىن، حالىقتىڭ ىقىلاسىن جەتكىزەتىن رۋحاني قۇندىلىق رەتىندە ءوز باعاسىن الاتىنىنا سەنىمىمىز كامىل. «تۋعان جەرىن سۇيە بىلگەن اقىن – حالقىنىڭ رۋحىن بيىكتەتەدى» سول سەبەپتى ءسوز زەرگەرى، اقىن رينات قوجاحمەتوۆ شىعارماشىلىعى قازىرگى قازاق ادەبيەتىندە حالىقتىق رۋح پەن ادامدىق قۇندىلىقتىڭ كوركەم كورىنىسى بولىپ قالا بەرەدى دەپ تۇجىرىمدايمىز.

داۋرەن باقداۋلەتۇلى،

اقىن، ادەبيەت زەرتتەۋشى، قازاقستان جازۋشىلار وداعىنىڭ، قازاقستان جۋرناليستەر وداعىنىڭ مۇشەسى

Abai.kz