2026-2028 جىلدارعا ارنالعان رەسپۋبليكالىق بيۋدجەت جوباسى – ەل دامۋىنا جاڭا سەرپىن بەرەتىن ماڭىزدى قۇجات. ونىڭ 2030 جىلعا دەيىنگى الەۋمەتتىك-ەكونوميكالىق بولجامعا سۇيەنە وتىرىپ جاسالۋى – ۇزاقمەرزىمدى جوسپارلاۋدىڭ بەلگىسى.

وسى ورايدا 30 ملرد تەڭگە وڭىرلەردىڭ ينفراقۇرىلىمىنا باعىتتالۋى – وتە ورىندى قادام. بۇل قاراجات سۋ، جول، جىلۋ سەكىلدى ناقتى ماسەلەلەردى شەشۋگە، ءومىر ساپاسىن ارتتىرۋعا سەپ بولادى.

ال ءبىرىنشى كەزەكتەگى شىعىستارعا 4 ملرد تەڭگە ءبولىنۋى مەملەكەتتىڭ يكەمدى جانە جاۋاپتى قارجىلىق ساياساتىن كورسەتەدى. سونىڭ ارقاسىندا توتەنشە جاعدايلار مەن الەۋمەتتىك ماڭىزى بار سالالار قامتىلۋى ءتيىس.

ەڭ باستىسى 1,4 ترلن تەڭگە دامۋ باسىمدىقتارىنا قايتا ءبولىندى. بۇل قاراجات ءبىلىم، دەنساۋلىق، تسيفرلاندىرۋ، «جاسىل» ەكونوميكا سياقتى ەل بولاشاعىن ايقىندايتىن باعىتتارعا جۇمسالادى.

جالپى بۇل بيۋدجەت – تەك ساندار جيىنتىعى ەمەس، بۇل – بولاشاققا باعىتتالعان ناقتى قادام. ەندى باستىسى ءار تيىننىڭ ناقتى ناتيجەگە جۇمىس ىستەۋى!

Abai.kz