استانادا ەلىمىزدىڭ بارلىق وڭىرىنەن كەلگەن 60 بەلسەندى ايەل «AMANAT» پارتياسىنىڭ «Tomiris» ايەلدەردىڭ ساياسي كوشباسشىلىعىن دامىتۋ جوباسى اياسىنداعى وقۋ كۋرستارىن باستادى.

جوبانىڭ اشىلۋ راسىمىنە «AMANAT» پارتياسىنىڭ اتقارۋشى حاتشىسى داۋلەت كارىبەك، قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى ءلاززات سۇلەيمەن، كونراد ادەناۋەر قورىنىڭ قازاقستانداعى وكىلدىگى ديرەكتورىنىڭ مىندەتىن اتقارۋشى ۆيكتور فرانك، سونداي-اق «AMANAT» پارتياسىنىڭ اباي وبلىستىق فيليالىنىڭ توراعاسىنىڭ مىندەتىن اتقارۋشى مايرا مۇرساحان جانە باسقا دا قوناقتار قاتىستى.

جيىندى اشقان پارتيانىڭ اتقارۋشى حاتشىسى داۋلەت كارىبەك ايەلدەردىڭ قۇقىقتارىن قورعاۋ، وتباسىلىق قۇندىلىقتاردى نىعايتۋ جانە گەندەرلىك تەڭدىكتى ىلگەرىلەتۋ ماسەلەلەرى مەملەكەت باسشىسى قاسىم-جومارت توقاەۆتىڭ ايرىقشا نازارىندا ەكەنىن اتاپ ءوتتى.

(سۋرەت:https://amanatpartiasy.kz/)

«بۇگىندە ايەلدەر قوعامدىق ومىرگە بەلسەنە ارالاسىپ قانا قويماي، ادىلەتتى قازاقستاننىڭ بولاشاعىن قالىپتاستىرىپ وتىرعان نەگىزگى قوزعاۋشى كۇشكە اينالدى. ولار باسشىلىق لاۋازىمداردا قىزمەت ەتىپ، قوعامدى وزگەرتۋگە باعىتتالعان باستامالاردى جۇزەگە اسىرىپ كەلەدى. ايەلدەردىڭ ەكونوميكا، ساياسات جانە الەۋمەتتىك سالالاردىڭ دامۋىنا قوسقان ۇلەسى ايتارلىقتاي ارتىپ وتىر. ەڭ ماڭىزدىسى – ولار شەشىم قابىلداۋ ۇدەرىسىنە قاتىسىپ، ازاماتتاردىڭ ءومىر ساپاسىن جاقسارتۋعا باعىتتالعان وڭ وزگەرىستەردىڭ باستاماشىسى بولۋدا. ەل حالقىنىڭ شامامەن جارتىسىن (51%) ايەلدەر قۇراسا، «AMANAT» پارتياسىندا ولاردىڭ ۇلەسى بۇدان دا جوعارى – 62%»، – دەدى ول.

سونداي-اق داۋلەت كارىبەك پارتيانىڭ ايەلدەر قاناتىنىڭ تىكەلەي قاتىسۋىمەن ايەلدەر مەن بالالارعا جاسالاتىن زورلىق-زومبىلىقتىڭ الدىن الۋ تۋرالى زاڭ ازىرلەنگەنىن، پارتيالىق تىزىمدەرگە گەندەرلىك كۆوتا ەنگىزىلگەنىن جانە وڭىرلەردە «جانۇيا» وتباسىن قولداۋ ورتالىقتارى اشىلعانىن ايتتى. سونىمەن قاتار ايەلدەر قاناتىنىڭ مۇشەلەرى پسيحولوگيالىق قىزمەت تۋرالى زاڭ جوباسى بويىنشا جۇمىسىن جالعاستىرۋدا.

ءوز كەزەگىندە قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى ءلاززات سۇلەيمەن پارلامەنتتە جانە ۇكىمەتتە ايەلدەر ۇلەسىن ارتتىرۋدىڭ ماڭىزىنا توقتالدى.

«بۇگىندە ەلىمىزدە ءتورت ايەل مينيستر بار، ال ماجىلىستەگى ايەلدەردىڭ ۇلەسى – 19 پايىز. ەندىگى ماقسات – بۇل كورسەتكىشتى 30 پايىزعا جەتكىزۋ. الداعى ۋاقىتتا ءدال وسى «Tomiris» جوباسىنىڭ قاتىسۋشىلارى ساياسات پەن قوعامدىق ومىردە ءوز الەۋەتىن جۇزەگە اسىراتىن تۇلعالارعا اينالار»، – دەدى ول.

كونراد ادەناۋەر قورىنىڭ قازاقستانداعى وكىلدىگى ديرەكتورىنىڭ مىندەتىن اتقارۋشى ۆيكتور فرانك «Tomiris» جوباسى ايەل كوشباسشىلارى ءۇشىن تاجىريبە مەن يدەيالار الماساتىن ماڭىزدى الاڭعا اينالعانىن اتاپ ءوتتى.

«ورنىقتى دامۋدى قامتاماسىز ەتۋ ءۇشىن ايەلدەردىڭ شەشىم قابىلداۋ، ساياسات قالىپتاستىرۋ جانە قوعامدىق ۇدەرىستەرگە تەڭ دارەجەدە قاتىسۋى ماڭىزدى. سوڭعى جىلدارى قازاقستاندا ايەلدەردىڭ قۇقىقتارى مەن مۇمكىندىكتەرىن كەڭەيتۋ باعىتىندا ايتارلىقتاي ىلگەرىلەۋ بايقالادى. وسى تۇرعىدا «Tomiris» جوباسى ايەلدەردىڭ الەۋەتىن اشۋعا جانە جاڭا كاسىبي بەلەستەرگە جەتۋىنە مۇمكىندىك بەرەدى»، – دەدى ول.

«AMANAT» پارتياسىنىڭ اباي وبلىستىق فيليالى توراعاسىنىڭ مىندەتىن اتقارۋشى، «Tomiris» جوباسىنىڭ تۇلەگى مايرا مۇرساحان بۇل باستاما ايەلدەر ءۇشىن جاڭا مۇمكىندىكتەرگە جول اشاتىنىن ايتىپ، ءوز تاجىريبەسىمەن ءبولىستى.

ۇيىمداستىرۋشىلاردىڭ ايتۋىنشا، قاتىسۋشىلار ءۇشىن مازمۇندى ءارى تاجىريبەگە باعىتتالعان باعدارلاما ازىرلەنگەن. ولار قازاقستان مەن گەرمانيانىڭ بەلگىلى ساياساتكەرلەرىمەن جانە قوعام قايراتكەرلەرىمەن كەزدەسىپ، تانىمال جاتتىقتىرۋشىلار – ايگەرىم تارباعاتاەۆا، اسەل مۇراتوۆا، تاتيانا حاسانوۆا جانە باسقا دا سپيكەرلەردىڭ دارىستەرىن تىڭدايدى. بيىل جوبا تۇلەكتەرىنىڭ جالپى سانى 172 ادامعا جەتپەك.

جوبا «AMANAT» پارتياسىنىڭ ايەلدەر قاناتى مەن ساياسي مەنەدجمەنت اكادەمياسىنىڭ ۇيىمداستىرۋىمەن، قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا جانە كونراد ادەناۋەر قورىنىڭ قولداۋىمەن جۇزەگە اسىپ جاتىر.

Abai.kz