بۇگىن، 2025 جىلعى 5 قاراشادا، استاناداعى «قازمەديا» ورتالىعىندا Astana Media Week 2025 فورۋمى ءوز جۇمىسىن باستادى.

توعىز جىل ىشىندە فورۋم قازاقستانداعى مەديا سالاسىن دامىتۋعا ارنالعان باستى الاڭعا اينالىپ، حالىقارالىق جانە وتاندىق مەديا كاسىبي ماماندارىن، مەديابيزنەس وكىلدەرى مەن مەملەكەتتىك ورگانداردى بىرىكتىرەتىن ماڭىزدى پلاتفورما بولىپ قالىپتاستى.

سۋرەت: قر مادەنيەت جانە اقپارات مينيسترلىگىنىڭ ءباسپاسوز قىزمەتىنەن الىندى.

مەديااپتانىڭ العاشقى كۇنى «جاساندى ينتەللەكت پەن تسيفرلاندىرۋ كەزەڭىندەگى جۋرناليستيكانىڭ جاڭا باعىتتارى: قوعام سەنىمى جانە وركەندەۋ» اتتى پلەنارلىق سەسسيامەن اشىلدى. فورۋم قاتىسۋشىلارىنا قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆانىڭ قۇتتىقتاۋ حاتى وقىلدى.

«اقپارات باستى رەسۋرسقا اينالعان زاماندا ءبىزدىڭ وسىنداي باسقوسۋلارىمىزدىڭ ماڭىزى ەرەكشە. سەبەبى ءدال وسىنداي الاڭدا عانا ءبىز وزەكتى ماسەلەلەردى اشىق تالقىلاپ، قورىتىندى جاساپ، سونىڭ نەگىزىندە بيزنەس پەن مەملەكەتتىك باسقارۋ جۇيەسىنە قاتىستى ماڭىزدى شەشىمدەر قابىلداي الامىز. بۇگىندە قازاقستان كەڭىستىك پەن ۋاقىت توعىسىنداعى ەرەكشە كەزەڭدى باستان وتكەرۋدە. مەملەكەت، قوعام جانە مەديا ازاماتتاردىڭ سۇرانىسىنا ساي، ەلدىڭ الداعى دامۋىنىڭ زاماناۋي باعىت-باعدارىن ايقىنداپ كەلەدى. مەملەكەت باسشىسىنىڭ «ادىلەتتى قازاقستاندى» قۇرۋ ىسىندە وسىنداي ءوزارا بەكەم بايلانىس بەرىك ىرگەتاسقا اينالۋعا ءتيىس دەگەنى دە بەكەر ەمەس»، – دەدى ايدا بالاەۆا.

سۋرەت: قر مادەنيەت جانە اقپارات مينيسترلىگىنىڭ ءباسپاسوز قىزمەتىنەن الىندى.

مينيستر Digital News Report زەرتتەۋىنە سايكەس، قازاقستان ازاماتتارىنىڭ بۇقارالىق اقپارات قۇرالدارىنا دەگەن سەنىم دەڭگەيى ورتالىق ازياداعى باسقا ەلدەرمەن سالىستىرعاندا ايتارلىقتاي جوعارى ەكەنىن ايتتى. ايدا بالاەۆانىڭ ايتۋىنشا، بۇل – مەدياسالانى رەفورمالاۋ بويىنشا مەملەكەت جۇرگىزىپ كەلە جاتقان جۇيەلى ساياساتتىڭ ناتيجەسى.

مينيستر قۇتتىقتاۋىندا اتاپ وتكەندەي، قازاقستان وڭىردە العاشقىلاردىڭ ءبىرى بولىپ حالىقارالىق ستاندارتتارعا، سونىڭ ىشىندە Digital Services Act قاعيداتتارىنا نەگىزدەلگەن «ونلاين-پلاتفورمالار جانە ونلاين-جارناما تۋرالى» زاڭ قابىلدادى. سونىمەن قاتار جاڭا «ماسس-مەديا تۋرالى» زاڭ رەداكتسيالاردىڭ قۇقىقتىق مارتەبەسىن كۇشەيتىپ، جۋرناليستەردى قورعاۋ تەتىكتەرىن كەڭەيتتى جانە اقپاراتقا قول جەتكىزۋ ءتارتىبىن ناقتى ايقىندادى. ايدا بالاەۆا وسى باعىتتاعى جۇمىس جالعاسىن تاباتىنىن ايتا كەلە، مينيسترلىك بىرقاتار زاڭنامالىق اكتىلەرگە وزگەرىستەر ەنگىزۋدى كوزدەيتىن تۇزەتۋلەر ازىرلەپ جاتقانىن اتاپ ءوتتى. بۇل تۇزەتۋلەر اقپاراتتىق كەڭىستىكتەگى جىلدام وزگەرىستەرگە لايىقتى جاۋاپ بولماق.

سۋرەت: قر مادەنيەت جانە اقپارات مينيسترلىگىنىڭ ءباسپاسوز قىزمەتىنەن الىندى.

پلەنارلىق سەسسيادا سونداي-اق قر مادەنيەت جانە اقپارات ۆيتسە-ءمينيسترى قانات ىسقاقوۆ، Euronews-ءتىڭ قازاقستانداعى بيۋرو جەتەكشىسى بويان بركيچ، Euronews حالىقارالىق ءتىلشىسى (فرانتسيا) دەنيس لوكتە، وزبەكستان ۇلتتىق مەديا قاۋىمداستىعى باس ديرەكتورىنىڭ ورىنباسارى سانجار ۋستابوبوەۆ، تۇركيا راديوتەلەۆيزيالىق كورپوراتسياسىنىڭ (تۇركيا) قازاقستانداعى وكىلدىگىنىڭ ديرەكتورى مەحمەد زاحيد چالىشكان جانە "جەتىنشى ارنا" تەلەارناسىنىڭ باس ديرەكتورى يلحام يبراگيموۆ ءسوز سويلەدى.

ءىس-شارا «جۋرناليستيكا توعىسىندا: جاساندى ينتەللەكتى بار تسيفرلىق مەديانىڭ پايدا بولۋى» اتتى پانەلدىك سەسسيامەن جالعاستى. بۇل الاڭدا قازىرگى اقپاراتتىق كەڭىستىكتىڭ ترانسفورماتسياسىنداعى نەگىزگى ۇردىستەر تالقىلاندى. ايتا كەتەرلىگى، باعدارلامانىڭ ءبىر بولىگى ستريمينگتىك پلاتفورمالار نارىعىنا ارنالدى.

سۋرەت: قر مادەنيەت جانە اقپارات مينيسترلىگىنىڭ ءباسپاسوز قىزمەتىنەن الىندى.

الداعى ەكى كۇن ىشىندە مەدياورتالىق حوللىندا Astana Media Week 2025 كونتەنت-ماركەتى وتەدى. بۇل – جاڭا فورماتتار، كوپرودۋكتسيالار جانە حالىقارالىق كووپەراتسيالار تانىستىرىلاتىن الاڭ. كونتەنت-ماركەت پروداكشن-كومپانيالار، ديستريبيۋتورلار جانە پلاتفورمالار اراسىنداعى ىسكەرلىك كەزدەسۋلەر وتكىزۋگە مۇمكىندىك بەرەدى. مۇندا قىرعىزستان، وزبەكستان، قىتاي مەن قازاقستاننىڭ ىشكى جانە سىرتقى نارىقتارىنا ارنالعان جاڭا يدەيالار، پيلوتتىق جوبالار مەن بىرلەسكەن ءوندىرىس مۇمكىندىكتەرى ۇسىنىلادى.

Astana Media Week 2025 7 قاراشاعا دەيىن جالعاسىپ، ەلىمىزدىڭ بارلىق وڭىرلەرىنەن مەملەكەتتىك، تاۋەلسىز جانە جاڭا مەديا وكىلدەرى باس قوسادى. قاتىسۋشىلار ءۇشىن پلەنارلىق جانە پانەلدىك تالقىلاۋلار، جابىق پيتچينگ-سەسسيالار، سونداي-اق سالاداعى جەتەكشى ساراپشىلار وتكىزەتىن پراكتيكالىق ماستەر-كلاسستار ۇيىمداستىرىلادى.

مەديااپتا اياسىندا ەڭ بەلسەندى قاتىسۋشىلارعا ارنايى سىيلىقتار قاراستىرىلعان. ۇزدىك سۇراق قويعان اۆتورلار جەتەكشى ستريمينگتىك سەرۆيس، مەديامونيتورينگتىك كومپانيالاردىڭ جىلدىق جازىلىمىنا ارنالعان سەرتيفيكاتتار جانە باس جۇلدە – سامارقاندقا ساياحات ۇتىپ الۋ مۇمكىندىگىنە يە بولادى.

Abai.kz