اۋىل شارۋاشىلىعى مينيسترلىگى ءىرى قارا مال ەتىن شىعارۋعا قاتىستى جاڭا شەكتەۋلەردى قولدانۋ ءتارتىبىن ءتۇسىندىردى.

2025 جىلعى 31 جەلتوقساننان باستاپ ىقم ەتىن قازاقستان اۋماعىنان ءۇشىنشى ەلدەرگە جانە ەاەو مەملەكەتتەرىنە اكەتۋگە ارنالعان كۆوتالاردى ءبولۋ قاعيدالارى قولدانىسقا ەنگىزىلدى. بۇل نورما 2026 جىلعى 30 ماۋسىمعا دەيىن قولدانىلادى. ءىرى قارا مال ەتىن ەكسپورتتاۋعا ارنالعان كۆوتانىڭ جالپى كولەمى 20 000 توننا دەڭگەيىندە بەلگىلەندى.

كۆوتا مەنشىكتى بورداقىلاۋ الاڭىنداعى مال باسىن پايدالاناتىن ەت وڭدەۋشى كاسىپورىنداردىڭ ءىرى قارا مال ەتىنە بولىنەدى.

ءبىر تۇلعاعا بەرىلەتىن كۆوتا مولشەرى بورداقىلاۋ الاڭىنىڭ قۋاتىنا بايلانىستى. اتاپ ايتقاندا:

بورداقىلاۋ الاڭىنىڭ قۋاتى 5 000 باستان جوعارى بولعاندا — 1 000 توننا;

10 000 باستان جوعارى — 2 000 توننا;

15 000 باستان جوعارى — 3 000 توننا;

20 000 باستان جوعارى — 4 000 توننا;

50 000 باستان جوعارى — 10 000 تونناعا دەيىن ەت ەكسپورتتاۋعا رۇقسات ەتىلەدى.

بۇل تولىق تسيكلدى وندىرۋشىلەردى قولداۋعا جانە سىرتقى ساۋدا وپەراتسيالارىنىڭ اشىقتىعىن ارتتىرۋعا باعىتتالعان.

اتالعان شارالار، ەڭ الدىمەن، ىشكى نارىق مۇددەلەرى مەن مال شارۋاشىلىعىن دامىتۋدىڭ ستراتەگيالىق مىندەتتەرىنەن تۋىنداپ وتىر. ۋاقىتشا شەكتەۋلەردىڭ نەگىزگى ماقساتى — ازىق-تۇلىك قاۋىپسىزدىگىن قامتاماسىز ەتۋ، ءونىمدى تەرەڭ وڭدەۋدى ىنتالاندىرۋ، ستاتيستيكانىڭ ايقىندىعىن قالىپتاستىرۋ جانە ەتتىڭ شىعۋ تەگىن قاداعالاۋ.

شەكتەۋلەردى ەنگىزۋگە جەكەلەگەن كومپانيالار مەن شاعىن سويۋ تسەحتارىنىڭ مالدى بورداقىلاۋسىز قايتا ساتىپ، مەنشىكتى وندىرىستىك بازانى دامىتپاستان جۇمىس جۇرگىزۋ تاجىريبەسى سەبەپ بولدى. مۇنداي سحەما الىپساتارلىق دەلدالدىققا جول اشىپ، سۇرانىس پەن ۇسىنىستىڭ ناقتى تەڭگەرىمىن بۇرمالاپ، ىشكى باعالاردىڭ ءوسۋ فاكتورلارىنىڭ بىرىنە اينالدى.

سوندىقتان كۆوتالاۋ تەتىگى مال وسىرۋمەن جانە ونى بورداقىلاۋمەن اينالىسپايتىن ەكسپورتتىق دەلدالداردى جويۋعا ءارى وندىرىستىك ينفراقۇرىلىمعا ينۆەستيتسيا سالاتىن، تەحنولوگيا ەنگىزىپ، جۇمىس ورىندارىن قۇراتىن ناقتى وندىرۋشىلەردى قولداۋعا باعدارلانعان.

سىرتقى ساۋدا قىزمەتىنە قاتىسۋشىلار اراسىندا ساندىق شەكتەۋلەردى ءبولۋ، كۆوتانىڭ كولەمى مەن قولدانىلۋ مەرزىمدەرىن ايقىنداۋ ورتالىق مەملەكەتتىك ورگاندارمەن ءوز قۇزىرەتى شەگىندە، ۋاكىلەتتى ورگانمەن كەلىسۋ ارقىلى جۇزەگە اسىرىلادى. بۇل ىشكى نارىقتاعى احۋالعا يكەمدى جاۋاپ بەرۋگە جانە ىشكى تۇتىنۋدىڭ باسىمدىعىن قامتاماسىز ەتۋگە مۇمكىندىك بەرەدى.

جالپى العاندا، بۇيرىق قازاقستاندىق مال شارۋاشىلىعىن ۇزاق مەرزىمدى دامىتۋعا جانە تۇراقتى ىشكى نارىقتى قالىپتاستىرۋعا باعىتتالعان. بۇل وتاندىق فەرمەرلەر مەن ەت وڭدەۋشىلەردىڭ پوزيتسياسىن نىعايتىپ، تۇتىنۋشىلار ءۇشىن ساپالى سيىر ەتىنىڭ قولجەتىمدىلىگىن ارتتىرۋى ءتيىس.

Abai.kz