يۋنيسەف «قازاقستان بالالارى» (2026–2030) ۇلتتىق باعدارلاماسىنىڭ قابىلدانۋىن قۇپتايدى. بۇل — ەل حالقىنىڭ شامامەن 34 پايىزىن قۇرايتىن 6,9 ميلليون بالانىڭ ءال-اۋقاتىن جاقسارتۋعا باعىتتالعان كەشەندى ۇلتتىق ستراتەگيا.

قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ باستاماسىمەن ازىرلەنگەن باعدارلاما بالالار مۇددەسىندەگى مەملەكەتتىك ساياساتتىڭ بىرىڭعاي ستراتەگيالىق كوزقاراسىن قالىپتاستىرادى جانە 2026–2030 جىلدار ارالىعىندا بالالاردى الەۋمەتتىك قورعاۋ، دەنساۋلىق ساقتاۋ، ءبىلىم بەرۋ جانە قاۋىپسىزدىك سالالارىن نىعايتۋعا باعىتتالعان 158 ناقتى ءىس-شارانى قامتيدى. باعدارلامانىڭ جالپى بيۋدجەتى 2,6 ملرد اقش دوللارىن قۇرايدى.

باعدارلاما وتباسىلاردى قولداۋعا جانە ءپوزيتيۆتى اتا-انا تاربيەسىن دامىتۋعا، بالالاردىڭ تسيفرلىق قاۋىپسىزدىگىن قامتاماسىز ەتۋگە، سونداي-اق بالاعا باعدارلانعان ينفراقۇرىلىمدى دامىتۋعا، ونىڭ ىشىندە جاڭا مەديتسينالىق جانە وڭالتۋ مەكەمەلەرىن سالۋعا، ينكليۋزيۆتى جانە بالاعا قولايلى قىزمەتتەردى كەڭەيتۋگە ەرەكشە نازار اۋدارادى. سونىمەن قاتار، وڭىرلىك دەڭگەيدە بالالاردى قورعاۋ جۇيەسىن كۇشەيتۋ، مامانداردىڭ كاسىبي ستاندارتتارىن ارتتىرۋ جانە مەكتەپتەردە پسيحولوگيالىق قولداۋدى دامىتۋ ماڭىزدى باسىمدىقتاردىڭ ءبىرى بولىپ تابىلادى.

يۋنيسەف قازاقستان ۇكىمەتىمەن بىرلەسە وتىرىپ باعدارلامانى ازىرلەۋ بارىسىندا نەگىزگى ستراتەگيالىق ارىپتەس رەتىندە ارەكەت ەتتى جانە بالالار قۇقىقتارى تۋرالى كونۆەنتسيانىڭ حالىقارالىق نورمالارى مەن ستاندارتتارىنىڭ، بۇۇ-نىڭ جاھاندىق ستراتەگيالارىنىڭ جانە وزىق حالىقارالىق تاجىريبەلەردىڭ ۇلتتىق ساياساتقا ەنگىزىلۋىن قامتاماسىز ەتتى. يۋنيسەف ساراپشىلارى باعدارلامانىڭ ارحيتەكتۋراسىن قالىپتاستىرۋعا، ونىڭ ىشىندە تۇجىرىمدامالىق نەگىزدەردى، ناتيجەلىك كورسەتكىشتەردى، سالاارالىق ۇيلەستىرۋ تەتىكتەرىن، سونداي-اق ىسكە اسىرۋدى مونيتورينگتەۋ جانە باعالاۋ تاسىلدەرىن ازىرلەۋگە جۇيەلى قولداۋ كورسەتتى.

يۋنيسەف سونداي-اق باعدارلامانىڭ نەگىزگى كومپونەنتتەرىن ازىرلەۋگە قولداۋ كورسەتتى، ونىڭ ىشىندە بالالار مەن وتباسىلاردى ەرتە انىقتاۋ جانە سۇيەمەلدەۋ جۇيەلەرىن دامىتۋ، بالالاردى قورعاۋعا ارنالعان تسيفرلىق شەشىمدەر، الەۋمەتتىك جانە پسيحولوگيالىق قولداۋ قىزمەتتەرىن كەڭەيتۋ، سونداي-اق بالالار قۇقىقتارىن قورعاۋ سالاسىنداعى مامانداردىڭ كادرلىق الەۋەتىن نىعايتۋ بار. باعدارلاما بالالاردىڭ ناقتى قاجەتتىلىكتەرىنە باعدارلانۋىن قامتاماسىز ەتۋ ءۇشىن يۋنيسەف جاھاندىق دالەلدى تاجىريبەلەرگە، MICS1 دەرەكتەرىنە جانە اناليتيكالىق زەرتتەۋلەرگە سۇيەندى.

باعدارلاما قازاقستان رەسپۋبليكاسىنىڭ مەملەكەتتىك كەڭەسشىسىنىڭ، بالا قۇقىقتارى جونىندەگى ۋاكىلدىڭ، وقۋ-اعارتۋ مينيسترلىگىنىڭ، بالالاردىڭ قۇقىقتارىن قورعاۋ كوميتەتىنىڭ، سونداي-اق ازاماتتىق سەكتور مەن ۇلتتىق كونسۋلتاتسيالار بارىسىندا پىكىرلەرى ەسكەرىلگەن بالالاردىڭ قاتىسۋىمەن جۇزەگە اسقان تىعىز ۆەدومستۆوارالىق ىنتىماقتاستىقتىڭ ناتيجەسى بولىپ تابىلادى.

«قازاقستان بالالارى» باعدارلاماسىنىڭ قابىلدانۋى تۇراقتى دامۋ ماقساتتارىنا، ونىڭ ىشىندە تدم 3 «دەنساۋلىق پەن ءال-اۋقات»، تدم 4 «ساپالى ءبىلىم» جانە تدم 10 «تەڭسىزدىكتى قىسقارتۋ» ماقساتتارىنا قول جەتكىزۋگە ماڭىزدى ۇلەس قوسىپ، بالالاردىڭ قۇقىقتارىن قورعاۋدىڭ ۇلتتىق جۇيەسىن نىعايتادى.

يۋنيسەف باعدارلامانى ىسكە اسىرۋ بارىسىندا قازاقستان ۇكىمەتىمەن ستراتەگيالىق ارىپتەس رەتىندە ىنتىماقتاستىقتى جالعاستىرا وتىرىپ، حالىقارالىق ساراپتامانى جۇمىلدىرۋدى، ۇلتتىق جانە وڭىرلىك دەڭگەيلەردە رەفورمالاردى ەنگىزۋگە قولداۋ كورسەتۋدى، تۇراقتى قارجىلاندىرۋ جانە ەسەپتىلىك جۇيەلەرىن دامىتۋدى، سونداي-اق بالالار مەن جاستاردىڭ ساياساتتى قالىپتاستىرۋعا قاتىسۋىن كۇشەيتۋدى قامتاماسىز ەتەدى.

Abai.kz