كولىك مينيسترلىگى تەمىرجول جانە سۋ كولىگى كوميتەتىنىڭ توراعاسى نۇرجان كەلبۋعانوۆ الماتى-1 تەمىرجول ۆوكزالىنىڭ قايتا جاڭعىرتۋ جۇمىستارىنىڭ بارىسىمەن تانىستى.

كوشپەلى كەڭەسكە مەردىگەر ۇيىمنىڭ، قازاقستان تەمىر جولى ۇك» اق-نىڭ، تەحنيكالىق قاداعالاۋ قىزمەتىنىڭ جانە قالا اكىمدىگىنىڭ وكىلدەرى قاتىستى.

قۇرىلىس-مونتاج جۇمىستارى بەكىتىلگەن كەستەگە سايكەس جۇرگىزىلىپ جاتىر. جوبا اياسىندا ۆوكزال عيماراتى مەن كەشەننىڭ بۇكىل ينفراقۇرىلىمىن كەشەندى جاڭعىرتۋ كوزدەلگەن. ينجەنەرلىك جەلىلەر جاڭارتىلىپ، زاماناۋي ەنەرگيامەن جابدىقتاۋ، جەلدەتۋ، تسيفرلىق باقىلاۋ جانە قاۋىپسىزدىك جۇيەلەرى ەنگىزىلۋدە.

- جوبانىڭ نەگىزگى باسىمدىعى – نىساننىڭ سەيسميكالىق توزىمدىلىگىن ارتتىرۋ. تىرەك كونسترۋكتسيالارى كۇشەيتىلىپ، عيمارات ءوڭىردىڭ سەيسميكالىق ەرەكشەلىكتەرىن ەسكەرە وتىرىپ، قولدانىستاعى قۇرىلىس نورمالارىنا سايكەستەندىرىلۋدە، - دەلىنگەن اقپاراتتا.

سونىمەن قاتار ءورت قاۋىپسىزدىگى جانە بەينەباقىلاۋ جۇيەلەرى جاڭارتىلىپ جاتىر.

قايتا جاڭعىرتۋ ناتيجەسىندە ۆوكزالدىڭ وتكىزۋ قابىلەتى ارتىپ، جولاۋشىلارعا قىزمەت كورسەتۋ ساپاسى جاقسارادى جانە تولىققاندى كەدەرگىسىز ورتا قالىپتاستىرىلادى. جاڭارتىلعان نىسان قاۋىپسىز، تەحنولوگيالىق ءارى جايلى بولماق.

قايتا جاڭعىرتۋ جۇمىستارىن اعىمداعى جىلدىڭ سوڭىنا دەيىن اياقتاۋ جوسپارلانىپ وتىر.

ايتا كەتەيىك، ۆوكزالداردا مۇگەدەكتىگى بار جولاۋشىلارعا ارنالعان جاڭا سۇيەمەلدەۋ قىزمەتى ىسكە قوسىلدى.

Abai.kz