قازاقستاندا وتكەن جىلى 12 توننادان استام ەسىرتكى تاركىلەندى. بۇل جونىندە قر ىشكى ىستەر مينيسترلىگى ءباسپاسوزى مالىمدەدى. 

– 2025 جىلى 1 توننا 189 كەلى سينتەتيكالىق ەسىرتكى، 10,1 توننا ماريحۋانا، 857 گرامم كوكاين، 715 كەلى گاشيش، 466 گرامم گەروين تاركىلەندى، - دەلىنگەن حابارلامادا.

سونداي-اق ەسىرتكى قىلمىسىن جاساعانى ءۇشىن 5 758 ادام قىلمىستىق جاۋاپكەرشىلىككە تارتىلعان. ولاردىڭ 74-ءى كامەلەتكە تولماعاندار. ايتا كەتەيىك مۇنداي قىلمىس ءۇشىن ازاماتتارعا 16 جاستان باستاپ قىلمىستىق جاۋاپكەرشىلىك قاراستىرىلعان.

– 2025 جىلى 13 ەسىرتكى زەرتحاناسى انىقتالىپ جويىلدى. بىلتىر 1 ناۋرىزدا ەسىرتكى بيزنەسىن ۇيىمداستىرۋشىلارعا قاتىستى زاڭنامانىڭ كۇشەيتىلگەنىنە بايلانىستى ولاردىڭ سانى الدىڭعى جىلدارمەن سالىستىرعاندا ازايعان. 2021 جىلى 17, 2022 جىلى 20, 2023 جىلى 29, 2024 جىلى 37 ەسىرتكى زەرتحاناسى جويىلعان بولاتىن، - دەلىنگەن رەسمي جاۋاپتا.

سونىمەن بىرگە 2025 جىلى ەسىرتكىنى جارنامالاۋمەن جانە ساتۋمەن اينالىسقان 10 289 ونلاين-رەسۋرس جويىلعان.

Abai.kz