قاراعاندىدا وبلىستىق تاريحي-ولكەتانۋ مۇراجايىن اۋقىمدى جاڭعىرتۋ جۇمىستارى اياقتالدى. ءبىر جارىم جىل ىشىندە ەكسپوزيتسيالىق زالدار تولىق جاڭارتىلىپ، عيماراتقا جوندەۋ جۇرگىزىلدى. ەندى ءوڭىر تاريحى زاماناۋي فورماتتا — مۋلتيمەديالىق جانە تسيفرلىق شەشىمدەر، جاساندى ينتەللەكت مۇمكىندىكتەرى ارقىلى ۇسىنىلعان. بۇل جوبا سوڭعى جىلدارى وبلىستاعى مۋزەي كەڭىستىگىن جاڭعىرتۋ باعىتىنداعى ەڭ ءىرى وزگەرىستەردىڭ ءبىرى بولدى.

جاڭارتىلعان مۇراجايدى العاشقىلاردىڭ ءبىرى بولىپ قاراعاندى وبلىسىنىڭ اكىمى ەرماعانبەت بولەكپاەۆ، قوعام وكىلدەرى، عالىمدار مەن مادەنيەت قايراتكەرلەرى تاماشالادى.

ءوڭىر باسشىسىنىڭ ايتۋىنشا، مۇراجاي بۇگىندە تاريح جاڭا فورماتتا ۇسىنىلاتىن زاماناۋي كەڭىستىككە اينالعان.

— ۇسىنىلعان ءتاسىل ەرەكشە ۇنادى. جوبا تانىستىرىلىمىندا كورگەنىمىز بۇگىن تولىق جۇزەگە اسقان. مۇندا وبلىسىمىز بەن ەلىمىزدىڭ تاريحى ەجەلگى داۋىردەن بۇگىنگى كۇنگە دەيىن قامتىلعان، ءارى جاساندى ينتەللەكت پەن زاماناۋي تەحنولوگيالار قولدانىلعان. كەلۋشىلەر مۇنى جوعارى باعالايدى دەپ سەنەمىن. جوبانى جۇزەگە اسىرۋعا قاتىسقان بارلىق ماماندارعا — قۇرىلىسشىلارعا، ساراپشىلارعا جانە مۋزەي قىزمەتكەرلەرىنە العىس ايتامىن، — دەدى ەرماعانبەت بولەكپاەۆ.

ە. بوكەتوۆ اتىنداعى قاراعاندى ۋنيۆەرسيتەتىنىڭ تاريح فاكۋلتەتىنىڭ دەكانى جاراس كەنجەعالي جاڭارتىلعان ەكسپوزيتسيا ءبىلىم بەرۋ جۇمىستارى ءۇشىن ماڭىزدى الاڭ بولاتىنىن اتاپ ءوتتى.

— ەكسپوزيتسيا كولەمدى تۇردە ۇسىنىلعان، قاراعاندى وبلىسىنىڭ تاريحىنا قاتىستى كوپتەگەن جاڭا ماتەريالدار قوسىلعان. ءبىز بۇعان دەيىن دە مۋزەيمەن تىعىز جۇمىس ىستەپ كەلدىك: ستۋدەنتتەردى اكەلىپ، تاجىريبەدەن وتكىزدىك. ەندى بۇل جۇمىس جاڭا فورماتتا جالعاسادى — ستۋدەنتتەر مەن ماگيسترانتتار ءۇشىن بۇل وقۋ مەن تاعىلىمدامادان وتۋگە وتە جاقسى بازا، — دەدى ول.

مادەنيەت سالاسىنىڭ ارداگەرى رىمبالا وماربەكوۆانىڭ پىكىرىنشە، مۇراجاي كەلۋشىلەر ءۇشىن اناعۇرلىم زاماناۋي ءارى تارتىمدى بولا تۇسكەن.

— مەن مۇراجايدىڭ بۇرىنعى قالپىن جاقسى بىلەمىن — ول دا جاقسى بولاتىن. بىراق بۇگىن كورگەنىمىز مۇلدە باسقا فورمات. زاماناۋي تەحنولوگيالاردىڭ ارقاسىندا كونە ەكسپوناتتار ءتىرىلىپ كەتكەندەي اسەر قالدىرادى. ەڭ باستىسى — ەكسپوزيتسيا جاستاردىڭ قىزىعۋشىلىعىن وياتادى، — دەدى مادەنيەت قايراتكەرى.

قاراعاندى تاريحي-ولكەتانۋ مۋزەيى 1932 جىلى قۇرىلعان. سوڭعى رەەكسپوزيتسيا شامامەن 15 جىل بۇرىن جۇرگىزىلگەن. جاڭا ديزاين-جوبا كونكۋرس نەگىزىندە تاڭدالدى. جۇمىستار باستالار الدىندا مۇراجاي قىزمەتكەرلەرى ەلىمىزدەگى جانە شەتەلدەگى جەتەكشى مۇراجايلاردىڭ تاجىريبەسىن زەرتتەگەن.

Abai.kz