قازاقستاندا BYD Destroyer 05 ماركالى گيبريد اۆتوكولىكتەرىنە قاتىستى كەدەندىك جانە سالىقتىق داۋ تۋىنداۋدى. ماسەلە تەك ازاماتتاردىڭ شاعىم دەڭگەيىندە قالىپ قويماي، ەندى پارلامەنت ءماجىلىسى دەپۋتاتىنىڭ رەسمي دەپۋتاتتىق ساۋالى ارقىلى باس كولىك پروكۋراتۋراسىنىڭ قاراۋىنا ۇسىنىلدى.

قازاقستاننىڭ ءبىر توپ ازاماتى، ناقتىراق ايتقاندا 51 كولىك يەسى ءماجىلىس دەپۋتاتى ابزال قۇسپانعا رەسمي حات جولداپ، BYD Destroyer 05 ماركالى گيبريد اۆتوكولىكتەرىنە قاتىستى مەملەكەتتىك كىرىستەر ورگاندارىنىڭ ارەكەتتەرىنە قۇقىقتىق باعا بەرۋدى سۇرادى. ولار ءوز وتىنىشتەرىندە BYD Destroyer 05 كولىكتەرىن اكەلۋ كەزىندە بارلىق راسىمدەر قولدانىستاعى زاڭناماعا تولىق سايكەس جۇرگىزىلگەنىن، كەدەندىك تولەمدەر سول ۋاقىتتا بەكىتىلگەن ەرەجەلەر بويىنشا تولەنگەنىن العا تارتقان.

DESTROYER نەنى بۇزىپ كەتتى؟

كولىك يەلەرىنىڭ مالىمەتىنشە، 2025 جىلدىڭ اقپان مەن قىركۇيەك ايلارى ارالىعىندا قازاقستانعا BYD Destroyer 05 ۇلگىسىندەگى 5000-نان استام اۆتوكولىك اكەلىنگەن.

ولار كەدەندىك راسىمدەۋدە سول كەزەڭدە قولدانىستا بولعان زاڭناما مەن الدىن الا سىنىپتاۋ شەشىمدەرىنە (اسش) سۇيەنگەنىن ايتادى. ياعني، يمپورتتاۋشىلار بارلىق تولەمدەردى رەسمي تاريفتەر بويىنشا تولەپ، راسىمدەردى تولىق اياقتاعان. سول كەزەڭدە يمپورتتاۋشىلار الدىن الا سىنىپتاۋ شەشىمدەرىنە (اسش/پكر) سۇيەنىپ، تن ۆەد 8703603099 كودى بويىنشا ءراسىم جۇرگىزگەن. بۇل كود سول ۋاقىتتا جەڭىلدەتىلگەن سالىق رەجيمىن قولدانۋعا مۇمكىندىك بەرگەنى ايتىلعان. ودان كەيىن تن ۆەد كودى وزگەرتىلىپ، 8703603098 نۇسقاسى ەنگىزىلگەن جانە بۇرىنعى راسىمدەرگە قاتىستى قوسىمشا سالىق ەسەپتەۋلەرى جاسالا باستاعان.

«2025 جىلدىڭ قىركۇيەك ايىنان كەيىن اتالعان كولىك قۇرالدارىن سىنىپتاۋ ءتاسىلى وزگەرتىلدى. كەيىننەن قازاقستان رەسپۋبليكاسى قارجى مينيسترلىگىنىڭ مەملەكەتتىك كىرىستەر كوميتەتى اۋماقتىق مەملەكەتتىك كىرىستەر دەپارتامەنتتەرىنە ازاماتتارعا كەدەندىك تولەمدەر مەن سالىقتاردى قوسىمشا ەسەپتەۋ تۋرالى تالاپتارمەن بۇزۋشىلىقتاردى جويۋ جونىندەگى حابارلامالار جولداۋدى تاپسىردى.

حابارلامالاردى العاننان كەيىن ازاماتتاردىڭ باسىم بولىگى بەلگىلەنگەن مەرزىمدە جازباشا تۇسىنىكتەمەلەر مەن قارسىلىقتارىن ۇسىندى. سوعان قاراماستان، اۋماقتىق مەملەكەتتىك كىرىستەر ورگاندارى ۇسىنىلعان دالەلدەردى تيىسىنشە قاراستىرماي جانە ءۋاجدى جازباشا جاۋاپ بەرمەستەن، حابارلامالاردىڭ ورىندالماعانى تۋرالى شەشىمدەر شىعاردى»، - دەلىنگەن دەپۋتاتقا جولدانعان حاتتا.

بۇعاۋ ما، بۇعاتتاۋ ما؟

داۋدىڭ ماڭىزدى بولىگى – قارجىلىق شەكتەۋلەر. كەيبىر ازاماتتار مەن جەكە كاسىپكەرلەردىڭ بانكتىك شوتتارى بۇعاتتالعانى، تولەم جاساۋ مۇمكىندىگى شەكتەلگەنى، ءتىپتى قارجىلىق قوسىمشالارعا قولجەتىمدىلىككە كەدەرگى كەلگەنى ايتىلادى.

سونىمەن قاتار ءبىر سۋبەكتكە ورتا ەسەپپەن شامامەن 1 ميلليون تەڭگەگە دەيىن قوسىمشا سالىقتار مەن تولەمدەر ەسەپتەلگەن جاعدايلار تىركەلگەن.

«مەملەكەتتىك كىرىستەر دەپارتامەنتتەرى جەكە كاسىپكەرلەردىڭ بانكتىك شوتتارىن بۇعاتتاپ، جەكە تۇلعالاردىڭ، ونىڭ ىشىندە Kaspi Bank قوسىمشالارىنا قولجەتىمدىلىگىن شەكتەدى. اتالعان ارەكەتتەردى ءبىزدىڭ كونستيتۋتسيالىق قۇقىقتارىمىز بەن زاڭدىلىق قاعيداتتارىن ورەسكەل بۇزۋ دەپ ەسەپتەيمىز»، - دەلىنگەن حاتتا.

DESTROYER داۋى – دەپۋتات ساۋالى

وسى داۋعا بايلانىستى ءماجىلىس دەپۋتاتى ابزال قۇسپان باس كولىك پروكۋراتۋراسىنا دەپۋتاتتىق ساۋال جولدادى. دەپۋتات ءوز ساۋالىندا كولىك پروكۋراتۋراسى مەن مەملەكەتتىك كىرىستەر ورگاندارىنىڭ ارەكەتتەرىنە كەشەندى قۇقىقتىق باعا بەرۋدى، سونداي-اق قابىلدانعان شەشىمدەردىڭ زاڭدىلىعىن تەكسەرۋدى تالاپ ەتتى.

دەپۋتاتتىق ساۋالدا نەگىزگى نازار بىرنەشە ماسەلەگە اۋدارىلعان. بىرىنشىدەن، 2025 جىلى اكەلىنگەن كولىكتەردىڭ بارلىعى سول كەزەڭدەگى زاڭناماعا سايكەس راسىمدەلگەنى جانە الدىن الا سىنىپتاۋ شەشىمدەرى رەسمي تۇردە قولدانىلعانى ايتىلعان. ەكىنشىدەن، كەيىنگى وزگەرىستەردىڭ بۇرىنعى مامىلەلەرگە كەرى كۇشپەن قولدانىلۋى قۇقىقتىق نورمالارعا قايشى ەكەنى كورسەتىلگەن. ۇشىنشىدەن، بانكتىك شوتتاردى جاپپاي بۇعاتتاۋ مەن قوسىمشا سالىق سالۋ تاجىريبەسى بيزنەسكە قىسىم رەتىندە باعالانعان.

سونىمەن قاتار دەپۋتات پروكۋراتۋرادان تەكسەرۋ ناتيجەلەرىن 5 جۇمىس كۇنى ىشىندە ۇسىنۋدى، زاڭسىز شەشىمدەر انىقتالعان جاعدايدا ولاردى جويۋدى، شوتتاردى بۇعاتتاۋدى توقتاتۋدى جانە جاۋاپتى تۇلعالاردىڭ ارەكەتتەرىنە قۇقىقتىق باعا بەرۋدى سۇرادى. ساۋالدا بۇل جاعدايدىڭ جۇيەلى سيپات العانى جانە مەملەكەتتىك ورگاندارعا دەگەن سەنىمگە اسەر ەتۋى مۇمكىن ەكەنى دە اتاپ وتىلگەن.

قازىرگى تاڭدا بۇل جاعدايدىڭ قالاي شەشىلەتىنى پروكۋراتۋرانىڭ تەكسەرۋ قورىتىندىسىنا بايلانىستى بولماق. ەگەر زاڭ بۇزۋشىلىقتار راستالسا، اتالعان ءىس قازاقستانداعى كەدەندىك رەتتەۋ تاجىريبەسىنە قاتىستى ماڭىزدى قۇقىقتىق پرەتسەدەنتكە اينالۋى مۇمكىن.

Abai.kz