پرەمەر-مينيستر ولجاس بەكتەنوۆ مەملەكەت باسشىسىنىڭ ەكونوميكانى ءارتاراپتاندىرۋ جانە وتاندىق ءوندىرىستى دامىتۋ جونىندەگى تاپسىرمالارى شەڭبەرىندە جەڭىل ونەركاسىپتى دامىتۋ ماسەلەلەرى بويىنشا كەڭەس وتكىزدى. جيىنعا ۇلتتىق ەكونوميكا، ونەركاسىپ جانە قۇرىلىس، اۋىل شارۋاشىلىعى، قارجى مينيسترلىكتەرىنىڭ، «سامۇرىق-قازىنا» ۇاق، «اتامەكەن» ۇكپ، «بايتەرەك» ۇكپ باسشىلىعى جانە ت.ب. قاتىستى. 

پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين سالانىڭ الەۋمەتتىك ماڭىزدىلىعىن اتاپ ءوتىپ، جەڭىل ونەركاسىپتە جۇمىس ىستەيتىندەردىڭ 60%-ىن ايەلدەر قۇرايتىنىن جەتكىزدى.

جيىندا ونەركاسىپ جانە قۇرىلىس ءمينيسترى ەرسايىن ناعاسپاەۆتىڭ سالاداعى بۇگىنگى احۋال، ورىن الىپ وتىرعان كەدەرگىلەر مەن دامۋ پەرسپەكتيۆالارى تۋرالى بايانداماسى تىڭدالدى. وقم دەرەكتەرى بويىنشا 2025 جىلدىڭ قورىتىندىسىندا سالاداعى ءوندىرىس كولەمى 260 ملرد تەڭگەگە جەتكەن. وسى جىلدىڭ باسىنان بەرى ونەركاسىپتەگى وڭدەۋشى سەكتوردىڭ ءوسۋى 9,9%-دى قۇراعان، بۇل رەتتە جەڭىل ونەركاسىپ ءوندىرىسىنىڭ كولەمى 2,2 ەسەگە ۇلعايعان. دەسە دە سالادا يمپورتتىڭ جوعارى ۇلەسى ساقتالۋدا.

سونىمەن قاتار دايىن ونىمدەر شىعارۋ جانە قايتا وڭدەۋ ۇلەسىن ۇلعايتۋ شارالارى تالقىلاندى. وندىرىستەردى جاڭعىرتۋ، قايتا وڭدەۋ قۋاتىن كەڭەيتۋ، لوكاليزاتسيالاۋ دەڭگەيىن ارتتىرۋ، كادرلار دايارلاۋ جانە وتاندىق تاۋار وندىرۋشىلەردىڭ باسەكەگە قابىلەتتىلىگىن نىعايتۋ قاجەتتىلىگىنە باسا نازار اۋدارىلدى.

قازاقستاندىق وندىرۋشىلەردى قولداۋ ماسەلەسى ءوز الدىنا بولەك قاراستىرىلدى. اتاۋلى قولداۋ شارالارىن ۇسىنۋ ماقساتىندا تاۋارلاردى، جۇمىستاردى، كورسەتىلەتىن قىزمەتتەردى وتاندىق وندىرۋشىلەردىڭ ءتىزىلىمى جۇمىس ىستەيدى.

«اتامەكەن» ۇكپ تورالقا توراعاسى قانات شارلاپاەۆ قاۋىپسىزدىك نورمالارىنا سايكەستىگىن باقىلاۋ ءۇشىن ارنايى ماقساتتاعى جەڭىل ونەركاسىپ ونىمدەرىن سەرتيفيكاتتاۋ بويىنشا ۇسىنىستارىن ايتتى.

«قاسىم-جومارت توقاەۆ ەكونوميكالىق الەۋەتتى نىعايتۋ مىندەتىن قويدى. جاڭا كونستيتۋتسيانىڭ قابىلدانۋىمەن ۇكىمەت وڭدەۋ سەكتورىن دامىتۋ جۇمىستارىن كۇشەيتە ءتۇستى. بيىلعى ءتورت ايدىڭ قورىتىندىسى بويىنشا وڭدەۋ سالاسى تۇراقتى ءوسىم كورسەتىپ وتىر. ونىڭ ىشىندە جەڭىل ونەركاسىپتىڭ الەۋمەتتىك ماڭىزى زور. ءبىز وتاندىق تاۋار وندىرۋشىلەردى قولداۋ شارالارىن كەڭەيتۋىمىز قاجەت», — دەپ اتاپ ءوتتى ولجاس بەكتەنوۆ.

كەڭەس قورىتىندىسى بويىنشا پرەمەر-مينيستر قازاقستاندىق وندىرۋشىلەرگە وتكىزۋ نارىقتارىنا شىعۋعا كەپىلدىك بەرە وتىرىپ، ءوندىرىستى ۇلعايتۋ ءۇشىن قوسىمشا ىنتالاندىراتىن مودەل قالىپتاستىرۋ قاجەتتىگىنە نازار اۋداردى.

Abai.kz