الماتى اكىمى دارحان ساتىبالدى مەملەكەت باسشىسىنىڭ اتىنان اقىن ءارى قوعام قايراتكەرى ولجاس سۇلەيمەنوۆتى 90 جاس مەرەيتويىمەن قۇتتىقتادى.

دارحان ساتىبالدى قازاقستاننىڭ حالىق جازۋشىسىنىڭ شاڭىراعىنا بارىپ، ەل پرەزيدەنتى قاسىم-جومارت توقاەۆتىڭ قۇتتىقتاۋ حاتىن وقىپ بەردى.

«ءسىز قازاقستاندا عانا ەمەس، حالىقارالىق دەڭگەيدە دە كورنەكتى اقىن، تەرەڭ ويلى قالامگەر ءارى بەدەلدى قوعام قايراتكەرى رەتىندە سىي-قۇرمەتكە يە بولدىڭىز. ءسىزدىڭ گۋمانيستىك يدەيالارىڭىز ۇلتتىق مادەنيەت پەن قوعامدىق-ساياسي ويدىڭ اسىل مۇراسىنا اينالىپ، الەمگە كەڭىنەن تانىلدى. بىرەگەي شىعارماشىلىعىڭىز ارقىلى قازاق حالقىنىڭ تاريحي ساناسىنىڭ جاڭعىرۋىنا ولشەۋسىز ۇلەس قوستىڭىز»، — دەلىنگەن مەملەكەت باسشىسىنىڭ قۇتتىقتاۋىندا.

الماتى اكىمى ولجاس سۇلەيمەنوۆكە ادەبيەتتى، قوعامدىق وي مەن يادرولىق قارۋعا قارسى قوزعالىستى دامىتۋعا قوسقان ولشەۋسىز ۇلەسى ءۇشىن العىس ءبىلدىردى. ول قالامگەردىڭ باستاماسىمەن قۇرىلعان «نەۆادا-سەمەي» قوزعالىسى يادرولىق سىناقتارعا قارسى كۇرەستىڭ سيمۆولىنا اينالىپ، سەمەي يادرولىق پوليگونىنىڭ جابىلۋىنا ماڭىزدى ءرول اتقارعانىن جەتكىزدى.

ولجاس سۇلەيمەنوۆتىڭ ەسىمى تاۋەلسىز قازاقستان تاريحىنا التىن ارىپپەن جازىلعان. XX-XXI عاسىرلارداعى كورنەكتى اقىن، زاڭعار جازۋشى ءوزىنىڭ ادەبي مۇراسىمەن عانا ەمەس، بەلسەندى قوعامدىق-ساياسي قىزمەتىمەن دە الەمگە كەڭ تانىلدى. ونىڭ شىعارمالارى كوپتەگەن تىلگە اۋدارىلىپ، كوپ تارالىممەن جارىق كورىپ، وقىرمان قاۋىمنىڭ زور سۇرانىسىنا يە بولىپ كەلەدى.

Abai.kz