مامىردىڭ 16-سىندا مەملەكەت باسشىسى قاسىم-جومارت توقاەۆ «كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى شارالار تۋرالى» جارلىققا قول قويدى.

وسىعان بايلانىستى قر پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا عالىمقىزى بالاەۆا كىتاپ وقۋ مادەنيەتىن قالىپتاستىرۋ بويىنشا ەلىمىزدە اتقارىلىپ جاتقان جۇمىستار جايلى باياندادى.

«بۇل – ەل بولاشاعىنا باعىتتالعان ستراتەگيالىق شەشىم. سەبەبى كىتاپ وقۋ مادەنيەتى – ۇلتتىڭ وي-ءورىسىن كەڭەيتەتىن، بىلىمگە قۇشتارلىعىن ارتتىراتىن، قوعامنىڭ ينتەللەكتۋالدىق الەۋەتىن كۇشەيتەتىن ماڭىزدى قۇندىلىق.

پرەزيدەنتىمىز كىتاپ پەن ءبىلىمنىڭ ادام ومىرىندەگى، ۇلت دامۋىنداعى ايرىقشا ءرولىن ۇنەمى ايتىپ كەلەدى. وسى جارلىق ارقىلى كىتاپ وقۋ مادەنيەتىن دامىتۋ مەملەكەتتىك ساياساتتىڭ ماڭىزدى باعىتتارىنىڭ ءبىرى رەتىندە جاڭا دەڭگەيگە كوتەرىلىپ وتىر»، - دەدى ايدا عالىمقىزى.

بۇگىندە ەلىمىزدە 12 مىڭنان استام كىتاپحانا جۇمىس ىستەيدى ەكەن. ولاردىڭ قىزمەتىن جىل سايىن ميلليونداعان ازامات پايدالانادى.

«كەيىنگى جىلدارى كىتاپحانالاردىڭ تسيفرلىق مۇمكىندىكتەرى دە ارتىپ كەلەدى. ەلەكتروندى كىتاپحانا رەسۋرستارىن پايدالانۋشىلار سانى 30 پايىز ءوسىپ، 718 مىڭ ادامعا جەتتى. ال كەيىنگى بەس جىلدا ەلەكتروندى فورماتتاعى كىتاپتاردى 9 ميلليوننان استام ادام پايدالانعان.

ەڭ باستىسى، قوعامدا كىتاپقا دەگەن قىزىعۋشىلىق ارتىپ كەلە جاتقانى ءبارىمىزدى قۋانتادى. اسىرەسە بالالار ادەبيەتىنە سۇرانىس ەسەلەنە ءتۇستى. تەك سوڭعى جىلدىڭ وزىندە بۇل كورسەتكىش 75 پايىز ءوستى. قازاق كلاسسيكاسىنا جانە قازاق تىلىنە اۋدارىلعان الەم ادەبيەتىنىڭ تاڭداۋلى تۋىندىلارىنا دەگەن سۇرانىس تا 50 پايىز ءوستى. ەندىگى مىندەت – وسى وڭ ءۇردىستى جۇيەلى تۇردە قولداۋ جانە ودان ءارى دامىتۋ»، - دەيدى بالاەۆا حانىم.

مەملەكەت باسشىسىنىڭ تاپسىرمالارىن ورىنداۋ اياسىندا جاڭا فورماتتاعى كىتاپحانالار قۇرۋ، ولاردى كوپفۋنكتسيونالدى قوعامدىق كەڭىستىك رەتىندە دامىتۋ، تسيفرلىق قۇرالداردى كەڭىنەن ەنگىزۋ جانە ازاماتتاردىڭ ساپالى ءبىلىم مەن اقپاراتقا قولجەتىمدىلىگىن ارتتىرۋ جۇمىستارى جالعاساۋدا.

«پرەزيدەنتتىڭ «كىتاپ وقيتىن ۇلت» تۇجىرىمداماسى اياسىندا ەلىمىزدە 36 قالالىق جانە اۋىلدىق كىتاپحانا جاڭعىرتىلدى. 2026 جىلى تاعى 30 كىتاپحانانى جاڭعىرتۋ جوسپارلانىپ وتىر.

بۇل باعىتتاعى ماڭىزدى جوبالاردىڭ ءبىرى – جالپىعا قولجەتىمدى ۇلتتىق تسيفرلىق كىتاپحانا پلاتفورماسىن قۇرۋ. اتالعان پلاتفورما ەلىمىزدەگى كىتاپحانا قورلارىن ءبىر جۇيەگە بىرىكتىرىپ، وڭىرلەردەگى وقىرماندارعا قاجەتتى ادەبيەت پەن ءبىلىم رەسۋرستارىنا ەركىن قول جەتكىزۋگە مۇمكىندىك بەرەدى.

سونىمەن قاتار وتاندىق جازۋشىلار مەن اقىنداردى قولداۋ، كىتاپ شىعارۋ ءىسىن دامىتۋ، باسپالار مەن كىتاپ تاراتۋشىلاردىڭ جۇمىسىن ىنتالاندىرۋ، ۇلتتىق ادەبي مۇرامىزدى ەل ىشىندە جانە شەتەلدە كەڭىنەن ناسيحاتتاۋ ماسەلەلەرىنە ەرەكشە كوڭىل بولىنەدى»، - دەيدى ايدا بالاەۆا.

ءمينيستردىڭ ايتۋىنشا، الداعى ۋاقىتتا «كىتاپحانا جانە باسپا ءىسى تۋرالى» قازاقستان رەسپۋبليكاسىنىڭ جاڭا زاڭى ازىرلەنەدى. كىتاپ وقۋ مادەنيەتىن دامىتۋعا ۇلەس قوسقان ازاماتتار مەن ۇيىمدارعا ارنالعان ۇلتتىق سىيلىق تاعايىندالادى. سونىمەن بىرگە «جىلدىڭ 10 وقىرمانى» رەسپۋبليكالىق جوباسى ىسكە قوسىلىپ، جاساندى ينتەللەكت داۋىرىندەگى كىتاپ پەن كىتاپ وقۋ مادەنيەتىنىڭ جاڭا باعىتتارىن ايقىندايتىن 2027-2031 جىلدارعا ارنالعان «زەردەلى ۇلت» تۇجىرىمداماسى بەكىتىلەدى.

«مەملەكەت باسشىسىنىڭ جارلىعى كىتاپحانا مەن كىتاپ ءىسى سالاسىنا تىڭ سەرپىن بەرەدى دەپ سەنەمىن. ەڭ باستىسى، بۇل كىتاپ وقيتىن، ويلاناتىن، ىزدەنەتىن، ءبىلىمدى ءارى جاسامپاز ۇلت قالىپتاستىرۋ جولىنداعى ناقتى قادام بولماق. ۇكىمەت مەملەكەت باسشىسى جارلىعىندا بەلگىلەنگەن مىندەتتەردى ساپالى ورىنداۋعا اتسالىسادى»، - دەيدى بالاەۆا.

Abai.kz