تاۋەلسىزدىكتىڭ العاشقى جىلدارىندا ىرگەسى قالانعان قارا شاڭىراقتىڭ 30 جىلدىق مەرەيتويى — ەل عىلىمى مەن ۇلت رۋحانياتىنىڭ مەرەكەسى.

ءۇش ونجىلدىق ىشىندە ۋنيۆەرسيتەت تەك ءبىلىم ورداسى عانا ەمەس، مەملەكەتىمىزدىڭ ينتەللەكتۋالدىق قۋاتىن قالىپتاستىرعان ىرگەلى عىلىمي ورتالىققا اينالدى. مىڭداعان بىلىكتى ماماندار، عالىمدار مەن قوعام قايراتكەرلەرى وسى قاسيەتتى شاڭىراقتان قانات قاعىپ، بۇگىندە ەل دامۋىنا، الەم وركەنيەتىنە قىزمەت ەتىپ ءجۇر.

سوڭعى جىلدارى ۋنيۆەرسيتەت حالىقارالىق ءبىلىم بەرۋ كەڭىستىگىندە ءوز ورنىن ايقىن نىعايتىپ كەلەدى. گەرمانيا، فرانتسيا، پولشا، چەحيا، يتاليا، وڭتۇستىك كورەيا، قىتاي، تۇركيا جانە امەريكا قۇراما شتاتتارىنىڭ جەتەكشى ۋنيۆەرسيتەتتەرىمەن ورناعان ستراتەگيالىق بايلانىستار — سونىڭ جارقىن دالەلى. بۇل — ەۇۋ-دىڭ ابىرويى مەن الەۋەتىنىڭ الەمدىك دەڭگەيدە مويىندالۋى.

بۇگىنگى زامان تالابىنا ساي جاڭارعان ۋنيۆەرسيتەتتە يننوۆاتسيالىق ءبىلىم بەرۋ باعدارلامالارى باتىل ەنگىزىلىپ، عىلىم مەن ءوندىرىستىڭ اراسىنداعى التىن كوپىر بەكي ءتۇستى. عالىمداردىڭ ىرگەلى زەرتتەۋلەرى ناقتى سەكتورعا ەنىپ، ەل يگىلىگىنە قىزمەت ەتە باستادى.

ال ۋنيۆەرسيتەتتىڭ ەڭ باستى بايلىعى — ونىڭ ادامدارى، ونىڭ ۇجىمى. ۇستازداردىڭ پاراساتى، عالىمداردىڭ ىزدەنىسى، ستۋدەنتتەردىڭ تالپىنىسى — ەۇۋ مەرەيىن اسقاقتاتىپ تۇرعان قۇندىلىقتار.

امەريكا قۇراما شتاتتارىنا مەرەيتويمەن تۇسپا-تۇس كەلگەن ارنايى ساپارىمدا، Miami قالاسىندا،  فلوريدا- اتلانتا ۋنيۆەرسيتەتىنىڭ ستۋدەنتتەرىمەن ەۇۋ-دىڭ 30 جىلدىعىنا وراي ۋنيۆەرسيتەت جالاۋىن تىكتىك.

بۇل — تەك مەرەيتويلىق ءسات ەمەس، بۇل — قازاق ءبىلىمىنىڭ ابىرويى الەم تورىندە جەلبىرەگەن ەرەكشە كۇن.

وسىنداي بيىك بەلەستەرگە جەتۋدە ۋنيۆەرسيتەت رەكتورى، اكادەميك ەرلان سىدىقوۆتىڭ ەڭبەگى ايرىقشا. كورەگەن باسشى رەتىندە ول ۋنيۆەرسيتەت ۇجىمىن جاڭا بەلەستەرگە باستاپ، ەۇۋ-دىڭ حالىقارالىق بەدەلىن نىعايتۋ جولىندا ايانباي ەڭبەك ەتىپ كەلەدى. ونىڭ ءبىلىم مەن عىلىمعا دەگەن ادالدىعى، ۇلت بولاشاعىنا دەگەن جاناشىرلىعى ۋنيۆەرسيتەتتىڭ بۇگىنگى تابىستارىنان انىق كورىنەدى.

ەۇۋ-دىڭ 30 جىلدىعى قۇتتى بولسىن! ۇلتتىق رۋح پەن عىلىمنىڭ شامشىراعى بيىكتەي بەرسىن!

Abai.kz