مەملەكەت باسشىسىنىڭ تاپسىرماسى اياسىندا سۋ رەسۋرستارى جانە يرريگاتسيا مينيسترلىگى قازاقستاننىڭ سۋ شارۋاشىلىعىن دامىتۋعا ينۆەستيتسيا تارتۋ جۇمىستارىن بەلسەندى جۇرگىزىپ كەلەدى. 2024-2025 جىلدارى، ياعني مينيسترلىك قۇرىلعاننان كەيىنگى كەزەڭدە ينۆەستيتسيا كولەمى الدىڭعى ەكى جىلمەن سالىستىرعاندا 79%-عا ءوستى.

2024-2025 جىلدارى تارتىلعان ينۆەستيتسيانىڭ جالپى كولەمى شامامەن 677 ملرد تەڭگەنى قۇرادى. بۇل 2022-2023 جىلدارمەن سالىستىرعاندا شامامەن 300 ملرد تەڭگەگە كوپ. ول كەزدە سۋ سالاسىن دامىتۋعا 377,9 ملرد تەڭگە ينۆەستيتسيا تارتىلعان بولاتىن.

تارتىلعان ينۆەستيتسيالار ەڭ الدىمەن سۋ شارۋاشىلىعى ينفراقۇرىلىمىن سالۋعا جانە جاڭعىرتۋعا باعىتتالىپ جاتىر. اتاپ ايتقاندا، حالىق پەن اۋىل شارۋاشىلىعىن تۇراقتى سۋمەن قامتاماسىز ەتۋگە قاجەتتى سۋ قويمالارى، كانالدار، گيدروتەحنيكالىق قۇرىلىستار جانە باسقا دا نىساندار قامتىلعان.

بۇل جۇمىستار قولدانىستاعى ينفراقۇرىلىمدى كەزەڭ-كەزەڭىمەن جاڭارتۋعا جانە سۋدى جيناقتاۋ مەن ءبولۋ ءۇشىن جاڭا قۋاتتار قۇرۋعا مۇمكىندىك بەرەدى. ناتيجەسىندە ينۆەستيتسيالار سۋمەن جابدىقتاۋ سەنىمدىلىگىن ارتتىرىپ، سۋ شىعىنى كولەمىن ازايتۋعا جانە سۋ رەسۋرستارىن باسقارۋ تيىمدىلىگىن ارتتىرۋعا باعىتتالادى.

ينۆەستيتسيالار ەسەبىنەن ىسكە اسىرىلىپ جاتقان جوبالاردىڭ قاتارىندا يسلام دامۋ بانكىمەن بىرلەسىپ جامبىل، باتىس قازاقستان جانە قىزىلوردا وبلىستارىندا ءۇش سۋ قويماسىن سالۋ، ازيا دامۋ بانكىنىڭ قولداۋىمەن اقمولا وبلىسىندا ەسىل كونتررەتتەگىشىن سالۋ جانە باسقا دا اۋقىمدى جوبالار بار.

«ينۆەستيتسيالار سۋ شارۋاشىلىعى ينفراقۇرىلىمىن دامىتۋعا، ياعني سۋ قويمالارىن، كانالدار مەن باسقا دا نىسانداردى سالۋعا، رەكونسترۋكتسيالاۋعا جانە جاڭعىرتۋعا تارتىلادى. بۇل رەتتە حالىقارالىق ىنتىماقتاستىق قارجىلىق قولداۋمەن عانا شەكتەلمەيدى. ول سونداي-اق زاماناۋي تەحنولوگيالاردى ەنگىزۋدى، سالانى تسيفرلاندىرۋدى، كادرلىق جانە عىلىمي الەۋەتتى نىعايتۋدى، سونداي-اق وزىق تاجىريبە الماسۋدى كوزدەيدى»، – دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

Abai.kz