عابباس قابىشۇلى. قاي جەرى ارتىق؟
وسىدان تۇپ-تۋرا ءبىر اپتا بۇرىن مىنا مەنى كسك-ءمىزدىڭ جاڭا باستىعى كيىك ساۋلىقۇلى شاقىرتىپ الدى دا:
-قۇرمەتتى نوكە، ءبىزدىڭ شاعىن اۋدانىمىزدا وزگە سەگىز ۇيدەن شەتىرەك تۇرعان ءۇش ءۇي بارىن باياعىدان بىلەسىز، ول ۇشەۋدىڭ ورتاسىنداعى ءۇي سىزدىكى، سولاي عوي؟ - دەدى، سول جاق ەزۋىندەگى سيگارەتىنىڭ ءتۇتىنىن وڭ جاق ەزۋىنەن سىزدىقتاتا شىعارىپ وتىرىپ. مەن ءوزى كىمنىڭ بولسىن وزىممەن «قۇرمەتتى نوكە» دەپ سويلەسكەنىن مەكتەپتىڭ قاي جاقتا ەكەنىن بىلمەيتىن كەزىمنەن جاقسى كورەتىنمىن، ال زەينەتكە شىققان ون جىلدا ونى ەستۋىم سيرەپ كەتسە دە، ءبارىبىر، جاقسى كورۋىمدى قويماي ءجۇرمىن. كيەكەڭ كوڭىلىمنىڭ وسى پەرنەسىن ءدوپ باسقان سوڭ مەنىڭ ءىشى-سىرتىم بىردەي جىلىپ-ىسي قالدى دا:
-سولاي، كيەكە، سولاي! ورنىڭىز قۇتتى بولسىن، دەنساۋلىعىڭىز مىقتى بولسىن! ءوزىم ىزدەپ كەلىپ قۇتتىقتاپ ۇلگىرمەگەنىمە رەنجىمەڭىز، ءبىز شالمىز عوي، شال كيىنگەنشە كەمپىر تەرلەپ كەتەتىن زامان،- دەي قويدىم. ول جىميدى. بۇعاعى يەگىنەن بەس ەلى ءتۇسىپ، قارنىنىڭ جارتىسى ۇستەلىندە جاتسا دا، ارينە، دەنساۋلىق كەرەك، سول تىلەگىمە ريزا بولدى-اۋ دەيمىن.
جاڭا ورىنعا باستىق بولىپ، قۇتتىقتاۋ ءسوزدى كوبىرەك ەستۋ جالپى جاقسى، ءوزىم دە تالاي جەرگە باستىق بولىپ كورگەنمىن، قۇدايعا شۇكىر، ءومىر تاجىريبەم جەتكىلىكتى.
وسىدان تۇپ-تۋرا ءبىر اپتا بۇرىن مىنا مەنى كسك-ءمىزدىڭ جاڭا باستىعى كيىك ساۋلىقۇلى شاقىرتىپ الدى دا:
-قۇرمەتتى نوكە، ءبىزدىڭ شاعىن اۋدانىمىزدا وزگە سەگىز ۇيدەن شەتىرەك تۇرعان ءۇش ءۇي بارىن باياعىدان بىلەسىز، ول ۇشەۋدىڭ ورتاسىنداعى ءۇي سىزدىكى، سولاي عوي؟ - دەدى، سول جاق ەزۋىندەگى سيگارەتىنىڭ ءتۇتىنىن وڭ جاق ەزۋىنەن سىزدىقتاتا شىعارىپ وتىرىپ. مەن ءوزى كىمنىڭ بولسىن وزىممەن «قۇرمەتتى نوكە» دەپ سويلەسكەنىن مەكتەپتىڭ قاي جاقتا ەكەنىن بىلمەيتىن كەزىمنەن جاقسى كورەتىنمىن، ال زەينەتكە شىققان ون جىلدا ونى ەستۋىم سيرەپ كەتسە دە، ءبارىبىر، جاقسى كورۋىمدى قويماي ءجۇرمىن. كيەكەڭ كوڭىلىمنىڭ وسى پەرنەسىن ءدوپ باسقان سوڭ مەنىڭ ءىشى-سىرتىم بىردەي جىلىپ-ىسي قالدى دا:
-سولاي، كيەكە، سولاي! ورنىڭىز قۇتتى بولسىن، دەنساۋلىعىڭىز مىقتى بولسىن! ءوزىم ىزدەپ كەلىپ قۇتتىقتاپ ۇلگىرمەگەنىمە رەنجىمەڭىز، ءبىز شالمىز عوي، شال كيىنگەنشە كەمپىر تەرلەپ كەتەتىن زامان،- دەي قويدىم. ول جىميدى. بۇعاعى يەگىنەن بەس ەلى ءتۇسىپ، قارنىنىڭ جارتىسى ۇستەلىندە جاتسا دا، ارينە، دەنساۋلىق كەرەك، سول تىلەگىمە ريزا بولدى-اۋ دەيمىن.
جاڭا ورىنعا باستىق بولىپ، قۇتتىقتاۋ ءسوزدى كوبىرەك ەستۋ جالپى جاقسى، ءوزىم دە تالاي جەرگە باستىق بولىپ كورگەنمىن، قۇدايعا شۇكىر، ءومىر تاجىريبەم جەتكىلىكتى.
-قۇرمەتتى نوكە، ءوزىمدى اۋدان اكىمى ۇسىنىپ، قالا اكىمى بەكىتكەن سوڭ كەلىپ، مارتەبەلەرى بيىك ول كىسىلەردىڭ سەنىمىن اقتاۋ ءۇشىن دەرەۋ زەرتتەۋ جۇمىستارىن جۇرگىزسەم، سىزدەردىڭ ول ءۇش ۇيلەرىڭىزگە جەكە باسشى كەرەك ەكەن. مىندەتتى تۇردە كەرەك! وسى ماسەلەنى ءسىز قولىڭىزعا الىڭىز، كەلىستىك پە؟ - دەدى.
-سوندا، كيەكە... «جەكە باسشى» دەيسىز... ول كىم بولۋى كەرەك، نە ىستەۋى كەرەك؟ كىمگە باعىنۋعا ءتيىس، كىمگە باعىنباۋعا ءتيىس؟ - دەدىم، شاماسى كەنجە بالاممەن قۇرداس كيىكپەن «سەن» دەپ سويلەسۋدى كەيىنگە قالدىرعانىمنىڭ دۇرىستىعىنا كوزىم جەتىپ. ول نىق تا تۋرا سويلەيدى ەكەن. بۇل زاماندا ويتىپ سويلەيتىندەر قالايدا ازايىپ كەتتى عوي.
-قۇرمەتتى نوكە، جەكە باسشى - سول ءۇش ءۇيدىڭ قوجاسى. ءۇش ءۇيىڭىز سەكسەن پاتەردەن جيىنى ەكى ءجۇز قىرىق پاتەر، وندا جيىنى ءبىر مىڭ ەكى ءجۇز الپىس ءبىر كىسى تۇرادى ەكەن، ال ءسىز، بىلايشا ايتقاندا، سولاردىڭ تامىرىن ۇستاپ وتىراسىز: ىستىق سۋدىڭ اقىسىن، سۋىق سۋدىڭ اقىسىن، ەلەكتردىڭ اقىسىن، جىلۋدىڭ اقىسىن جانە تەلەفون مەن راديونىڭ، ينتەرنەتتىڭ اقىسىن، ءيا، مەن ايلىق تولەمدەرىن ايتىپ وتىرمىن، سولاردى قايسىسى مەزگىلىندە تولەيدى، قايسىسى كەشىكتىرىپ تولەيدى، قايسىسى تولەمەي ءجۇرىپ الادى، - ءسىز سونى قاداعالايسىز، سودان كەيىن: كوريدوردىڭ، پودەزدىڭ، اۋلانىڭ تازالىعىن باقىلايسىز، ءتۇسىندىڭىز بە؟ - دەدى كيەكەڭ، تەمەكىسىنىڭ ءتۇتىنىن ەندى مايمۇرنىنىڭ سول جاق ارناسىنان اقىرىن شىعارا باستاپ. ويپىرىم-اي، تەمەكى تارتۋ دا ونەر ەكەن عوي! كورشى پودەزدەگى شىلىمقور قۇرداسىم كەڭەسحان: «تەمەكىنى تارتقان دا - ارمان، تاپتپاعان دا - ارمان» دەي بەرەدى، سول بىردەڭەنى بىلەدى ەكەن.
-كيەكە-اۋ، ونىڭ بارىنە مەنىڭ ۋاقىتىم جەتسە دە، كۇشىم جەرتپەيدى، سوندا ول قالاي بولادى؟
-قۇرمەتتى نوكە، مەن ءسىزدى سول ءۇشىن شاقىردىم. ءسىزدىڭ ءۇش ۇيىڭىزدە جيىنى ون سەگىز پودزد بار، سونىڭ ارقايسىسىنان ءبىر كىسىنى كومەكشى ەتىپ الىڭىز دا، ىسكە كىرىسىڭىزدەر. باسقا ۇيلەردى دە سولايشا باسقارۋعا كوشەمىز، ءسويتىپ ءتارتىپ ورناتپاي بولمايدى. پرەزيدەنتىمىزدىڭ ەلدى باسقارۋ جۇيەسىن جەتىلدىرۋ جونىندەگى تەزيسىمەن تانىسسىز با؟ - دەدى ول، تەمەكىسىنىڭ ءتۇتىنىن ەندى مۇرنىنىڭ ەكى ارناسىنان جارىستىرا شىعارىپ. ويپىرىم-اي، قۋىن-اي، ماعان دۇزاق تاستاعانىن قاراشى! جاي دۇزاق تا ەمەس، ساياسي دۇزاق! ۇستارسىڭ... اتاڭنىڭ باسىن!
-كيەكە، «ءسىزدىڭ ءۇيىڭىز، قاداعالايسىز، باقىلايسىز، كومەكشى ەتىپ الىڭىز» دەگەنىڭىزگە قاراعاندا، مەنى سول ءۇش ۇيگە، ءوزىڭىز ايتقانداي، «قوجا» ەتىپ سايلادىڭىزدار ما؟
-قۇرمەتتى نوكە، سايلاۋ-مايلاۋدى قايتەسىز، مەن، مىنە، ايتتىم، ەرتەڭ بۇيرىق شىعادى، ءسىز قوعامدىق نەگىزدە ىستەيسىز، تۇسىنىكتى مە؟ - دەپ ول سيگارەتىنىڭ تۇقىلىن كۇلسالعىشىنا مىجعىلادى. كوزى سىعىرايىپ الىپ، ءوزى، ءسىرا، قاتال-اۋ دەيمىن.
-كيەكە، سەنىم بىلدىرگەنىڭىزگە راحمەت! ال سوندا مەن دە كومەكشىلەرىمدى بۇيرىقپەن بەكىتىپ الامىن با، قالاي بولادى؟
-قۇرمەتتى نوكە، ءبىزدىڭ ەلدە دەموكراتيا ورناعالى جيىرما جىل بولدى ەمەس پە، دەموكراتيانىڭ قادىرىن ءبىلۋىمىز كەرەك، ءسىز كومەكشىلەرىڭىزدى سايلاپ الاسىز. قازىر ۇيىڭىزگە بارىڭىز، ويلانىڭىز، سودان كەيىن، ايتالىق، «پالەن كۇنى، پالەن ساعاتتا، پالەن جەردە №6, №7, №8 ءۇش ءۇيدىڭ باسقارۋ جۇيەسى تۋرالى جينالىس بولادى، جينالىسقا مىنالار قاتىسۋعا مىندەتتى» دەپ، تاڭداپ العان كومەكشىلەرىڭىزدىڭ اتى-ءجونى كورسەتىلگەن حابارلاندىرۋ جازىپ، كوبەيتىپ، ءار پودەزگە ءبىر-بىردەن ءىلىپ قويىڭىز. ءسويتىپ، كومەكشىلەرىڭىزدى سول ءبىرىنشى جينالىستا سايلاپ، بەكىتىپ الىڭىز، سايلاۋ - دەموكراتيامىزدىڭ سارا جولى. جۇمىسىڭىزعا جەمىس تىلەيمىن، ساۋ بولىڭىز! ءيا، تاعى ايتارىم: سىزدەردە زەينەتكەرلەر كوپ ەكەن، سولاردىڭ ەڭ سەنىمدىلەرىن كومەكشى ەتىپ سايلاپ الىڭىز! - دەپ ورنىنان باياۋ تۇرىپ، قولىن ۇسىندى. بويى الاسا بولسا دا، الاقانى جالپاق ەكەن.
سونىمەن ءسويتىپ، جارتى ساعاتتا مەن - ءنولباس بازارباەۆ - «قۇرمەتتى نوكە» دەگەن قوشەمەت ءسوزدى التى رەت ەستىپ، ءبىر مىڭ ەكى ءجۇز الپىس ءبىر كىسىگە «قوجا» بولىپ قايتىپ، كەرەك جينالىستى اۋلامىزدا وتەتىن ەتىپ تەز ۇيىمداستىرا ءبىلدىم. پارتيا مەن كومسومولدىڭ قالالىق، وبلىستىق كوميتەتتەرىندە تالاي جىل قىزمەت ىستەدىم ەمەس پە، قينالا قويمادىم. وزىمە كومەكشى بولۋعا ءتيىستى ون سەگىز زەينەتكەردىڭ ءتىزىمىن جاساپ، كومپيۋتەرشى نەمەرەمە ون سەگىز بيۋللەتەن جاساتىپ الىپ، جينالىستى ۋاقىتىنان جيىرما ءتور ءمينوت قانا كەش باستاپ جىبەردىم. ماسەلەنى كسك-ءمىزدىڭ، ياعني، قازاقشا ايتسام: جپك-ءمىزدىڭ - جەكەمەنشىك پاتەرلەر كووپەراتيۆىمىزدىڭ - جاڭا باسشىسىنىڭ ۇسىنىسىمەن قولعا العانىمدى، ارينە، ەسكەرتتىم. ويتپەي بولمايدى. كوپشىلىكتىڭ سەنىمىن الداماۋ ءۇشىن دەموكراتيا شارتتارىن ساقتاۋ كەرەك.
-نوكە اعا، ءۇش ءۇيدى بىرىكتىرە ءبىر جۇيە جاساۋ يدەياڭىز دۇرىس، بىراق جوعارىداعى باسشىلاردىڭ «قوجا» دەۋىمەن كەلىسۋگە بولماس، «قوجا» دەگەننىڭ ماعىناسى كوپ، ونى قويايىق، جاڭا جۇيەگە جاڭاشا ات قويۋىمىز كەرەك، سولاي ەمەس پە، حالايىق؟ - دەگەن بايباقتىڭ سوزىنە جۇرت دۋ قولشاپالاقتادى.
-سوندا نە دەۋىمىز كەرەك؟ كانە، كىمدە قانداي وي بار؟ - دەدىم. كوپتىڭ ويى ساپىرىلىسىپ جونەلدى. بارسىن. دەموكراتيا.
-وقىس شارۋا بولدى، ويلانۋ كەرەك.
-ءيا، ويلانايىق، ۋاقىت جەتەدى.
-نوكەڭنىڭ ءوزى نە دەر ەكەن؟
-ءۇش ءۇيدىڭ بىرلەستىگى دەيىك.
-دۇرىس، تەك ءۇش ءۇيدىڭ دەگەن ەكى ءسوزدى تىرناقشاعا الايىق! تىرناقشا اشىلادى، ءۇش ءۇيدىڭ، تىرناقشا جابىلادى، بىرلەستىگى.
-جوق، ولاي بولمايدى، ءۇش ءۇيدىڭ بىرلەستىگى دەگەندى تۇگەلدەي تىرناقشا ىشىندە جازۋ كەرەك.
-قالاي؟ ۇشەۋىن جەكە-جەكە مە؟
-جو-عا. ءۇشىنىڭ الدىنان اشىپ، بىرلەستىگىنىڭ ارتىنان جابامىز.
-قادىرلى قاۋىم، جالپى وسى «بىرلەستىك» دەگەن ءسوز دۇرىس بولا ما؟
-بولماعاندا شە؟
-بىزدە «بىرلەستىك» دەگەن ءسوز ءوشىرىلدى عوي، قازىردە: كومپانيا، فيرما، كورپوراتسيا، دەپارتامەنت، تاعى نەمەنە، ءبارى باسقا تىلدە، سونى ەسكەرۋ كەرەك.
-ءيا، اناۋ استانا قالاسىنداعى سالتانات سارايىمىز «كونگرەسس حولل» دەلىندى، قازاقستاننىڭ تاۋەلسىزدىگىنە شەت ەلدىڭ سول سوزدەرى جەتپەي تۇرعانداي.
-ە، ولارعا ەرسەڭ... ماسكەۋدىڭ ورىستارى «بەلايا موگيلا» دەپ كۇلدى دەگەن قايداعىبىر قاعىندى سىلتاۋمەن قالامىزدىڭ تاريحي «اقمولا» اتىنان دا بەزگەن جوق پا؟
-وۋ، اعايىندار، ول جاقتى قويىڭدار، بەرى قايتىڭدار، ءوزىمىزدىڭ ىشكى ماسەلەمىزدى شەشىپ الايىق! - دەپ جۇرتتى ءيىردىم. دەموكراتيانىڭ دا ورنى، جەرى، مەزگىلى بار.
-سوندا نە دەسەك ەكەن؟
-«ءۇش ءۇي قاۋىمى» دەيىك.
-«ءۇش ءۇي ۇجىمى» دەسەك شە؟
-«قاۋىم» دا، «ۇجىم» دا كەلمەيدى.
-«ۇيالى ءۇش ءۇي» دەۋگە بولار، ا؟
-باسە! كادىمگى قالتاتەلەفوندى «ۇيالى تەلەفون» دەپ شاتىسىپ جۇرگەنىمىز دە جەتەر!
-جولداستار، ە، ءا، مىرزالار! ءبىز اۋەلى ءوزىمىزدىڭ باسشىمىز بولاتىن نوكەڭدى كىم دەپ اتايتىنىمىزدى كەلىسىپ الايىق!
-دۇرىس! ءۇش ءۇيدى جەر جۇتىپ قويماس، ولاردىڭ ستاتۋسى تابىلار، ءبىز الدىمەن نوكەڭنىڭ ستاتۋ... نەسىن... الگى...
-«لاۋازىمىن» دەمەكسىڭ بە؟
-دۇرىس، ءيا، نوكەڭنىڭ لاۋازىمىن بەلگىلەپ، بەكىتىپ الايىق!
-ءبىز نوكەڭدى ەرەكشە اتايتىن بولايىق!
-ونىڭ قالاي؟
-ونىم سولاي! نوكەڭ زەينەتكە وبكومنىڭ ەكىنشى سەكرەتارلىعىنان شىقتى، ال وسى وتىرعان باسقامىزدىڭ بىرەۋىمىز ويتىپ شىعىپ كورگەن جوقپىز، مەن بىلەم عوي. ەڭ شىرەگەنىمىز گوريسپولكومدا زاۆوتدەلوم بولدىق. تاك چتو نوكەڭە جەتۋ قايداااا!
-پاتەراقى دەگەن ءبىر پالەكەت بولىپ الدى، قىمباتتاۋىن قويمايدى، ونى توقتاتۋدىڭ ءبىر امالىن نوكەڭ تاپپاسا...
-راس، راس، اناۋسى دا وسەدى، مىناۋسى دا وسەدى...
-نوكە، ونى ءوزىڭىز دە كورىپ ءجۇرسىز، ءبىر شارا قولدانباساڭىز بولمايدى!
-نە شارا قولدان دەيسىڭدەر؟ - دەدىم، پاتەراقىنىڭ ىزاسى وزىمە دە ءوتىپ جۇرگەنى شىداتپاي.
-قۇرمەتتى نوكە، ءسىز بۇرىن نەبىر ۇلكەن قىزمەتتەردە ىستەدىڭىز، بۇل پاتەراقىدان الدەقايدا كۇردەلى ماسەلەلەردى شەشتىڭىز...
-ءاي، حالايىق، نوكەڭدى كسك-مىزگە باستىقتىققا ۇسىنساق قايتەدى؟
-بۇل ماسەلەنى ەرتەرەك ويلاۋىمىز كەرەك ەدى، وعان جاڭا باستىقتىڭ كەلگەنى كەشە عانا.
-ءوي، بىزگە باستىق قۇتايىپ پا ەدى؟ ءبىرى كەلەدى، ءبىرى كەتەدى، مىناۋ دا ۇزامايدى، تاك چتو، نوكە، ءسىزدىڭ كانديداتۋراڭىز وتە دۇرىس!
-اي، اعايىندار، سەندەر مەنى مازالاماڭدار، مەن نومەنكلاتۋرادان كەتكەلى ءونبىر جىل، جاسى اسقان اداممىن، - دەدىم. دەسەم دە، ءبىر بۇيرەگىم بۇلك ەتتى. ىستەۋگە بولار ەدى، قايبىر قيىن جۇمىس، بىراق بەكىتپەيدى عوي. الدىڭعى جىلى دا اناۋ ءبىر ورىنعا بەكىتپەدى، «جاستارعا جۇمىس تاۋىپ بەرە الماي وتىرمىز» دەپ.
-قۇرمەتتى نوكە، مەن ءسىزدى كوپتەن بىلەمىن، ءسىز - وتە پاراساتتى ادامسىز!
-پاراساتتى بولماسا، اينالايىن-اۋ، ءبىزدىڭ نوكەڭ مىناۋ ءۇش ءۇيدىڭ جاعدايىن ويلاي ما؟!
-دۇرىس ايتاسىڭدار! نوكەڭ - ەسكى گۆارديانىڭ شىڭدالعان كادرى! نوكەڭ قالانىڭ، داجە وبلىستىڭ اكىمى بولىپ تا ەشبىر قينالماستان ىستەي الادى!
-اي، اعايىندار، مەن... - دەي بەرىپ ەدىم، ەپتەپ كوڭىلىم بوساپ، الدەكىم:
-نوكە، اعا-ەكە، ءسىز وتە قاراپايىم ادامسىز، ال قازىرگى كەزدە قاراپايىم ادامدى، ءتىپتى سىزدەي كەمەڭگەر بولسا دا، سيلاۋ دەگەن جوق قوي، جوق! - دەپ كيىپ كەتىپ ەدى، ودان ارعىلار ۆووبششە اۋزىمدى سوۆسەم اشتىرمادى:
-نوكەڭدەي قاسيەتتى ادام سيرەك!
-داناگوي عوي، داناگوي!
-شىركىن-اي، نوكەڭ قالانىڭ اكىمى بولسا، پاتەراقىنىڭ، تەلەفوننىڭ، تاعى باسقاسىنىڭ قىمباتشىلىعىنان قۇتىلار ەدىك!
-ە، اي سايىن قىسىپ بارا جاتقان قىمباتشىلىقتان كوزىمىز اشىلۋى ءۇشىن نوكەڭ وبلىستىڭ اكىمى بولسا دەسەڭدەرشى!
-دۇرىس! قالاعا، وبلىسقا كىم اكىم بولماي ءجۇر؟ وزدەرىنەن باسقا جۇرتتى جارىلقايىن دەيتىن بىرەۋى جوق!
-قۇرمەتتى ءبىزدىڭ نوكەڭ پرەزيدەنت بولسا عوي!
-ۆوت ماسەلە قايدا! ءبىزدىڭ نوكەڭنەن پرەزيدەنتتىڭ نەسى ارتىق؟! داۆايتە، نوكەڭدى پرەزيدەنتتىككە ۇسىنايىق!
-دۇرىس! الداعى سايلاۋعا وزدەرىن وزدەرى ۇسىنعان ۇشەۋ مە، تورتەۋ مە، بىرەۋلەر تىركەلىپتى عوي، گازەتتەن وقىدىم. سولاردىڭ بىرەۋىن دە بىلمەيمىن، ءبارى - پەشكا دا پەشكا!
-اتا، اتا! سەنى تەلەفونعا شاقىرىپ جاتىر، سروچنو دەيدى، اپام ايتتى! - دەپ ەڭ كىشى نەمەرەم جۇگىرىپ جەتىپ كەلدى. جينالعان كوپشىلىكتىڭ كوڭىل كۇيىن ءتۇسىنىپ، ءوزىنىڭ ەندى ەشقاشان ەشبىر قىزمەتكە الىنبايتىنىن، ەشقايدا سايلانبايتىنىن ءبىلىپ، قالايدا ىشتەي قىستىعىپ وتىرعان نوكەڭ سونىڭ ەسەسىن ۇيدەگى كەمپىرىنەن سىرتتاي الىپ:
-مەنىڭ قاتىنىم... جىگىتتەر، مەن قازىر قايتىپ كەلەم، توسا تۇرىڭدار، قاتىنىم تەلەفونعا شاقىرتىپتى، كورىپ، ەستىپ وتىرسىڭدار عوي، - دەپ نوكەڭ نەمەرەسىنىڭ جەتەگىنە ىلەستى.
-نوكە، ءسىزدى پرەزيدەنت ەتىپ سايلاساق، جەڭگەمىز قازاقستاننىڭ باس قاتىنى بولادى! - دەدى الدەكىم. جۇرت دۋ كۇلدى.
نوكەڭ مەزگىلىنەن بۇرىن شارىلداعان بار بولعىر دا جوق بولعىر تەلەفونىنا ىزا بولىپ، ىشتەي شيرىعىپ: «وسى جۇرت قىزىق. كەيدە كۇلمەسكە كۇلەدى. «ەل اعاسى... ەل باسى... كوش باسى... ۇلت باسى... حالىق كوسەمى... ەل اناسى... باس انا... كەمەڭگەر... دانىشپان... اۋليە...» دەپ جۇرگەندەرىنىڭ مەنىڭ قاتىنىمنان قاي جەرى ارتىق؟!» دەپ كۇڭكىلدەپ بارا جاتتى.
«اباي-اقپارات»
