وتكەندە Abai.kz اقپاراتتىق پورتالىندا قاراعاندى وبلىسىنا قاراستى تەمىرتاۋ قالاسىنداعى تۇڭعىش پرەزيدەنتتىڭ تاريحي-مادەني ورتالىعىنىڭ باسشىسى س.سارگيزوۆاعا قاتىستى ماقالا جاريالانعان ەدى. ءبىز سول جولى عاليا اقپانبەكوۆا اتتى قىزمەتكەردىڭ ايتقاندارىن ەش وزگەرىسسىز وقىرمان نازارىنا ۇسىنىپ، قارسى تاراپتىڭ ايتار ءۋاجى بولسا، ولارعا دا مىنبەر بەرەتىنىمىزدى ەسكەرتكەنبىز. مىنە، بۇگىن ورتالىق باسشىسىنىڭ "مۇراجاي باسشىسى قىزمەتكەرىن ۇرىپ، جۇمىستان شىعارىپ جىبەردى" دەگەن ءسوز - جالعان!" اتتى قارسى ماقالاسىن جاريالاپ وتىرمىز. اۆتور پورتال رەداكتورىنان «تۇڭعىش پرەزيدەنت مۇراجايىنىڭ باسشىسى قىزمەتكەرىن ۇرىپ، جۇمىستان شىعارىپ جىبەردى» اتتى ماقالانى تەرىسكە شىعارۋدى تالاپ ەتىپتى. ولاي بولماعان جاعدايدا سوتقا جۇگىنەتىنىن دە ەسكەرتكەن. ءبىز ءوز تاراپىمىزدان س.سارگيزوۆا حانىمنىڭ وسى ماتەريالدا ايتقان ۋاجدەرى گ.اقپانبەكوۆا جازعان ماقالاداعى ايىپتاۋلاردى تولىقتاي جوققا شىعاراتىنىن مالىمدەيمىز. 

Abai.kz اقپاراتتىق پورتالى

Abai.kz اقپاراتتىق پورتالىندا 2018 جىلدىڭ 28 تامىزىندا  گ.اقپانبەكوۆانىڭ «تۇڭعىش پرەزيدەنت مۇراجايىنىڭ باسشىسى  قىزمەتكەرىن ۇرىپ، جۇمىستان شىعارىپ جىبەردى» اتتى ماقالاسى جارىق كوردى. اتالعان ماتەريالداعى فاكتىلەر شىندىققا جاناسپايتىنىن، مەنىڭ ارىم مەن نامىسىما، ىسكەرلىك بەدەلىمە نۇقسان كەلتىرەتىنىن ەسكەرتەمىن. 

باستى تاقىرىپتا ايتىلعان «مەن ازاماتشا اقپانبەكوۆانى  ۇرىپتى» دەگەن ءسوز شىندىققا جاناسپايدى. بۇل جايت اقىلعا سىيمايدى، ەشبىر دالەلسىز ايتىلىپ وتىر. اقپانبەكوۆانىڭ مەنىڭ ۇرعانىم جايلى قۇقىق قورعاۋ ورگاندارىنا تۇسىرگەن ارىزى جوق. سوققى ىزدەرى جايلى سوت-مەديتسينالىق ساراپتاماسى ءھام كۋاگەرى جانە جوق. ءتىپتى، ول ازاماتشا بۇل فاكتىنى اۋديو، بەينەجازبالار ارقىلى دا دالەلدەي المايدى.

ال، اقيقاتىندا قالاي بولدى؟ اقپانبەكوۆا تۇڭعىش پرەزيدەنتتىڭ تاريحي مادەني ورتالىعىندا  جۇمىس ىستەپ جۇرگەن كەزىندە مەنى ايىپتاپ، «ۇنەمى كابينەتىمە كەلىپ، نە جۇمىس جاساپ جاتقانىن سۇراپ، بوگەت  جاساي بەرەدى» دەگەن سەكىلدى ءوزى ويلاپ تاپقان جەلەۋمەن پوليتسيا شاقىرعانى راس. ارتىنشا، بۇل اقىلعا سىيمايتىن، ورىنسىز ايىپتاۋ ەكەنىن ءتۇسىنىپ، پوليتسيا بولىمىنەن جازعان ارىزىن قايتىپ الدى. وكىنىشكە وراي، ازاماتشا اقپانبەكوۆا  جۇمىس ۋاقىتىنىڭ كوبىن ءوزىنىڭ وتباسىلىق ماسەلەلەرىن شەشۋگە جۇمساپ، ۇنەمى ۇيالى تەلەفونىمەن سويلەسۋمەن جۇرەتىن. مىنە، سول سەبەپتەن مەن باسشى رەتىندە ونىڭ نە جۇمىسپەن اينالىسىپ وتىرعانىن ۇنەمى باقىلاپ وتىرۋىما تۋرا كەلەدى...

اقپانبەكوۆا شىن مانىندە ەكسپوزيتسيالىق زالدا ەتيكەتاجدى قايتا راسىمدەۋمەن اينالىستى. بىراق ايتىپ ءوتۋ كەرەك، بىزدە  ەكسپوزيتسياداعى كوپتەگەن مالىمەتتەر ەلەكتروندى تۇردە بەرىلگەن، ستاتسيونارلىق سورەلەردە زاتتاڭبالارى ەكسپوزيتسيانى قۇرۋ بارىسىندا ازىرلەنەدى، سوندىقتان دا قايتا راسىمدەۋ جۇمىسى ونىڭ ازعانتاي بولىگىندە عانا جۇرگىزىلدى. بۇل ىستە ءماتىندى اعىلشىن تىلىنە اۋدارۋمەن، رەداكتسيالاۋمەن ورتالىقتىڭ كوپتەگەن قىزمەتكەرلەرى اينالىستى. ولاي بولسا، بۇل ۇجىمدىق جۇمىستى تەك قانا اقپانبەكوۆانىڭ ەڭبەگى دەۋگە كەلمەيدى.

ال كورمە وتكىزۋ - ع.ر.اقپانبەكوۆا اتقارعان ەكسپوزيتسيالىق-كورمە ءبولىمى باسشىسىنىڭ تىكەلەي مىندەتىنە جاتادى. جاريالانعان ماتەريالدا ايتىلعانىنداي ول بۇل ماسەلەگە ەرەكشە قۇلشىنىس تانىتتى دەپ تە ايتا المايمىن. قابىلداۋ-وتكىزۋ اكتىلەرى راسىمدەلمەي، سونىڭ  ناتيجەسىندە «جۇزىك جوعالدى» دەپ كەلۋشىلەر الدىندا جانجال شىعارىپ، اۋلا تازالاۋشىعا دورەكى تۇردە ۇرلانعان جۇزىكتى قايتارۋىن تالاپ ەتكەن. مادەنيەت مەكەمەسىندە مۇندايعا جول بەرىلمەيتىنى جايلى تۇسىندىرگەندە اقپانبەكوۆا ەشكىمگە ەسكەرتپەي قاراعاندى وبلىستىق مادەنيەت باسقارماسىنا  بارعان. ءبىز ەكى كۇن بويى قىزمەتكەردىڭ قايدا جۇرگەنىننەن بەيحابار بولدىق. وسىلايشا  ەڭبەك ءتارتىبىن بۇزۋىنا وراي، اقپانبەكوۆا جۇمىستان بوساتىلدى.

وسىدان كەيىن، ول سوتقا جۇگىنىپ، ماسەلەنى كەلىسىم كوميسسياسىنىڭ وتىرىسىندا قاراۋ تۋرالى سوت شەشىمىنە وراي، ءبىز اقپانبەكوۆانى ماتەريالدىق قيىن جاعدايىن ەسكەرىپ، قايتادان جۇمىسقا قابىلدادىق.

ال، ورتالىق عيماراتىنا جوندەۋ قاجەتتىلىگى جايلى ماسەلەنى جوعارى جاقتاعىلار وزدەرى شەشتى. ءوز ۋاقىتىندا ورتالىقتىڭ كوپتەگەن جۇمىستارى شالا  اياقتالعان كۇيدە تاپسىرىلعان، سوندىقتان كىرەبەرىستىڭ اجارى قاشىپ، شاتىردان سۋ اعاتىن ەدى، كەي جەرلەردىڭ قاپتامالارى ءتۇسىپ جاتتى. ونىمەن قوسا، ءبىزدىڭ نىسان قازاقستاننىڭ  كيەلى ورىندارى تىزىمىنە  ەنۋىنىڭ ماڭىزدىلىعى ەسكەرىلىپ،  جوندەۋ جاساۋ تۋرالى شەشىم قابىلداندى. ورتالىققا الىس-جاقىن ەلدەردەن  كوپتەگەن قادىرمەندى قوناقتار  كەلەتىنىن دە ۇمىتپاعانىمىز  جون. ارينە،  ەشكىم بۇل ماسەلەنى قاتارداعى قىزمەتكەر اقپانبەكوۆامەن اقىلداسىپ، شەشپەيتىنى بەلگىلى.

ءبىزدىڭ ورتالىقتىڭ ءبىر ەرەكشەلىگى، شاعىن ۇجىم بولعاندىقتان ءىس-شارالاردى، كورمەلەردى  بىرلەسىپ، كۇش سالىپ وتكىزەدى. اقپانبەكوۆا  ءوزىنىڭ ەڭبەگى سانايتىن كيىز ءۇيدى دە فويەگە ۇجىم مۇشەلەرى  بىرلەسىپ قۇرىپ، وعان قورداعى ەكسپوناتتار  قويىلىپ، تۇرمىستىق  بۇيىمدار ۇيلەرىنەن اكەلىندى. ايتا كەتۋ قاجەت، اقپانبەكوۆا كەزەكتى كورمە الدىندا دەنساۋلىعىنا بايلانىستى ەمدەلۋگە شىعىپ، ءوزىنىڭ ەڭبەگى سانايتىن ماسەلەلەردىڭ بارلىعىن ونىڭ ورنىنا ادىسكەر شەشتى.

ونىڭ كورمەنى ازىرلەۋ قاعيداسى دا قىزىق: «وتسە بولدى..»-مەن جۇرە بەرەتىن.  ول ايتىپ وتىرعان قوردان  الىنعان ماتەريالدار جىلجىمالى كورمەدە بىرنەشە مارتە كورسەتىلگەن، تالاي كوپشىلىكتىڭ نازارىنا ۇسىنىلعان زاتتار ەدى. نەگىزىنەن بالالاردىڭ قولىنان جاسالعان بۇيىمداردى قولدانادى. دەگەنمەن، بۇل جۇمىسقا شىعارماشىلىق تۇرعىدا ىزدەنىپ، ەرەكشە ەتىپ جاساۋىنا بولاتىن ەدى. ماسەلەن،  «قازاقستانداعى 100 جاڭا ەسىم» كورمەسىن ازىرلەۋدە فينالعا قاتىسۋشى جەرلەستەرىمىزبەن حابارلاسىپ، ولاردان قانداي دا ءبىر ەكسپوناتتتار سۇراۋعا بولاتىن ەدى. ونىڭ ءبىرىن دە جاساعان جوق. ايتپاقشى، ولاردىڭ ءبىرى س.ۆ.ان كورمەگە قاتىسقاننان كەيىن، ءوز باستاماسىمەن قورعا بىرنەشە ماتەريالدارىن  قالدىرىپ كەتتى.

ونىڭ كورمەنى سىرتتان اكەلۋگە ۇمتىلۋى ءتىپتى تۇسىنىكسىز، ويتكەنى، بۇل ماتەريالدىق شىعىن اكەلەدى. بىراق بىزدە از دا بولسا دا ءوزىمىزدىڭ قورىمىز بار. قولدا ەكسپوزيتسيالىق جۇمىستى جانداندىرۋعا مۇمكىندىك بەرەتىن   كوپتەگەن تەحنيكالىق قۇرالدار بارلىعىن ەستەن شىعارماۋ كەرەك.

ازاماتشا اقپانبەكوۆا  ءوز ماتەريالىندا «مۋزەي» ءسوزىن ءجيى قولدانۋى ونىڭ ءالى كۇنگە ءبىزدىڭ مەكەمەمىزدىڭ ەرەكشەلىگىن تۇسىنبەگەنىنە دالەل. ءبىز ەكسپوزيتسيالىق جۇمىسپەن اينالىسۋمەن قاتار، ورتالىعىمىزدىڭ باستى ماقساتى -  اعارتۋشىلىق جۇمىس، مەملەكەت باسشىسىنىڭ ساياساتىن ناسيحاتتاۋ ءبىرىنشى كەزەكتەگى مىندەتىمىز سانالادى.

ورتالىعىمىزدىڭ ۇلكەن جانە كونفەرەنتس-زالىندا تۇراقتى تۇردە وبلىس جانە قالا اكىمىنىڭ قاتىسۋىمەن قالالىق، وبلىستىق شارالار،  سونداي-اق ، "نۇر-وتان" پارتياسى، ىشكى ساياسات ءبولىمى، ءبىلىم بەرۋ ءبولىمى، تەمىرتاۋ جاستار ورتالىعى، ۇكىمەتتىك ەمەس ۇيىمداردىڭ، جوعارى وقۋ ورىندارى مەن ت.ب ۇيىمداردىڭ ءىس-شارالارى وتكىزىلىپ تۇرادى.

ءبىز پرەزيدەنتىمىزدىڭ "نىساندار بوس تۇرماي ،ءتۇرلى شارالار وتكىزىلسىن" دەگەن تاپسىرماسىن  ورىندايمىز. پرەزيدەنتتىڭ ساياساتىن قولايمىز. ولاردىڭ تەگىن، نە اقىلى تۇردە وتكىزىلەتىنى ع.اقپانبەكوۆانىڭ قۇزىرەتىنە كىرمەيدى. قارجىلىق جوسپاردى ەشكىم وزگەرتكەن جوق!

ازاماتشا اقپانبەكوۆانى مەنىڭ ءومىربايانىم قىزىقتىرۋى دا ءتىپتى تۇسىنىكسىز. ونىڭ ايتقان وسەك-اياڭدارى بويىنشا كەلىسىم كوميسسياسىنا ارىز تۇسىرۋىمە تۋرا كەلدى. جانە مەنى باسشىلىق قىزمەتىنە تاعايىنداۋ تۋرالى شەشىمدى  وبلىستىق مادەنيەت باسقارماسى مەنىڭ قۇزىرەتىم مەن كاسىبي بىلىكتىلىگىمدى باعالاپ بارىپ قابىلداعانىن ەسكەرتكىم كەلەدى.

مەن سىزدەن جۋىق ارادا Abai.kz سايتىندا جوعارىدا ايتىلعان «تۇڭعىش پرەزيدەنت مۇراجايىنىڭ باسشىسى قىزمەتكەرىن ۇرىپ، جۇمىستان شىعارىپ جىبەردى» ماتەريالىنا بايلانىستى تەرىسكە شىعارۋ بەرۋىڭىزدى تالاپ ەتەمىن. ولاي بولماعان جاعدايدا، ءوزىمنىڭ  سوتقا جۇگىنۋ قۇقىعىمدى پايدالاناتىن بولامىن.

C.ج.سارگيزوۆا

Abai.kz