پرەزيدەنت ن.نازارباەۆتىڭ “پرەزيدەنتتىڭ بەس الەۋمەتتىك باستاماسى” اتتى حالىققا ۇندەۋىنىڭ ءۇشىنشى باعىتى - «جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋ» دەپ اتالادى.

پرەزيدەنت بۇل باستامانى جۇزەگە اسىرۋ ءۇشىن - جىل سايىن بولىنەتىن 54 مىڭ گرانتقا قوسىمشا 2018-2019 وقۋ جىلىندا تاعى 20 مىڭ گرانت ءبولۋ كەرەكتىگىن ايتتى. ونىڭ 11 مىڭى تەحنيكالىق ماماندىقتار بويىنشا باكالاۆرلىق ءبىلىم بەرۋگە تيەسىلى بولادى.

ياعني، ينجەنەرلەر، اقپاراتتىق تەحنولوگيا، روبوت تەحنيكاسى، نانوتەحنولوگيا سالاسىنىڭ بولاشاق ماماندارىنا ۇلكەن مۇمكىندىكتەر جاسالماق.

سونىمەن قاتار، مەملەكەت باسشىسى تەحنيكالىق جانە اۋىل شارۋاشىلىعى ماماندىقتارى بويىنشا بارلىق جوعارى وقۋ ورىندارى گرانتتارىنىڭ قۇنىن ۇلتتىق جوعارى وقۋ ورىندارىنىڭ گرانتتارى دەڭگەيىنە دەيىن كوتەرۋ تۋرالى ايتقان بولاتىن.

اتالعان شارالار ورتا مەكتەپ تۇلەكتەرىن جوعارى بىلىممەن نەعۇرلىم كوبىرەك قامتۋعا مۇمكىندىك بەرەدى، بۇل – جالپى الەمدىك ترەند.

سونداي-اق، ن.نازارباەۆ ستۋدەنتتەردى جاتاقحانامەن قامتاماسىز ەتۋ ءۇشىن ولارعا ارناپ كەمىندە 75 مىڭ ورىندىق جاڭا جاتاقحانا سالۋدى تاپسىردى. بۇل الداعى جىلداردا وسە تۇسەتىن سۇرانىستى ەسكەرگەننىڭ وزىندە جاتاقحانا تاپشىلىعىن ءبىرجولا شەشەدى.

پرەزيدەنتتىڭ وسى تاپسىرماسىنا سايكەس، تەحنيكالىق ءبىلىم بەرۋدەن رەسپۋبليكا كولەمىنە تانىمال وقۋ ورداسى – قاراعاندى مەملەكەتتىك تەحنيكالىق ۋنيۆەرسيتەتى بىرقاتار شارالاردى قولعا العان. بۇگىندە بۇل وقۋ ورداسىندا 12 مىڭنان استام ستۋدەنت ءبىلىم الادى. ونىڭ جارتىسىنا جۋىعى مەملەكەتتىك ءبىلىم گرانتتارىنىڭ يەگەرلەرى. بيىلعى وقۋ جىلىندا 1992 گرانت بولىنگەن.

بىلتىرعى جىلمەن سالىستىرعاندا 270 تۇلەك مەملەكەتتىك ءبىلىم گرانتى نەگىزىندە وقۋعا مۇمكىندىك العان. ال، جالپى ءبىلىم گرانتتارىنىڭ سانى جىل سايىن ارتىپ كەلە جاتقان كورىنەدى.

بۇل وقۋ ورنىنىڭ QS World University Ranking ۋنيۆەرسيتەتتەر اراسىنداعى بەدەلدى الەمدىك توپ-751+ رەيتينگىسىنە، سونداي-اق، RankPro ۋنيۆەرسيتەتتەردىڭ كاسىبي توپ600 رەيتينگىسىنە ەنگەن. بۇگىندە مۇندا  «يندۋستريا 4.0»، «تسيفرلىق ماشينا جاساۋ»، «مەتاللۋرگياداعى نانوتەحنولوگيالار» جانە «بيوينجەنەريا» ورتالىقتارى مەن جاڭا ءىت سىنىپتارى اشىلعان. تسيفرلىق ءوندىرىستى قولعا العان ايماقتىڭ يننوۆاتسيالىق كاسىپورىندارىمەن بىرلەسىپ باسەكەگە قابىلەتتى مامانداردى دايارلايدى.

سونداي-اق، وڭىردە «نۇر وتان» پارتياسى قاراعاندى وبلىسى بويىنشا فيليالىنىڭ باستاماسىمەن جەر-جەرلەردە ءىت سىنىپتارى كوپتەپ اشىلىپ جاتقان كورىنەدى. بۇل دا بولسا جاس بۋىننىڭ تەحنيكالىق باعىتقا بۇيرەگىنىڭ بۇرىپ تۇرۋىنا سەپتىگىن تيگىزەتىنى ءسوزسىز.

جاتاقحانامەن قامتىلۋ قانداي دەڭگەيدە؟

باستاما كوتەرگەن جانە ءبىر وزەكتى ماسەلە – ستۋدەنت جاستاردى جاتاقحانامەن قامتاماسىز ەتۋ. بۇل ورايدا ەلباسى «2022 جىلدىڭ سوڭىنا دەيىن ستۋدەنتتەرگە ارناپ كەمىندە 75 مىڭ ورىندىق جاڭا جاتاقحانا سالۋدى تاپسىرامىن» دەپ ناقتى كورسەتتى.

قاراعاندى مەملەكەتتىك تەحنيكالىق ۋنيۆەرسيتەتى بۇل مىندەتتى ورىنداۋ ءۇشىن كەلەسى جىلى 400 ورىندىق جاڭا جاتاقحانانىڭ قۇرىلىسى باستاماق. لەنين كوشەسى 67 مەكەن-جايى بويىنشا ورنالاساتىن جاڭا عيمارات 1126,42 شارشى مەتردى قۇرايدى دەپ جوسپارلانۋدا.

مۇنىمەن قوسا، قاراعاندى مەملەكەتتىك مەديتسينا ۋنيۆەرسيتەتى ەكى جاتاقحانا قۇرىلىسىن جوسپارلاپ وتىر. ارقايسى 500 ادامعا شاقتالعان جاتاقحانالاردىڭ ورنالاساتىن جەرى ايقىلدالىپ، قاجەتتى قۇجاتتاماسى دايىندالۋ ۇسىندە. اتالمىش وقۋ ورنىنداعى 8 مىڭ ستۋدەنتتىڭ 6 مىڭنان استامى باسقا وڭىرلەردەن كەلگەندەر مەن شەتەلدىكتەر. سوندىقتان، جاڭا جاتاقحانالارعا سۇرانىس جوعارى. سونداي-اق، قارقارالى اۋىل شارۋاشىلىعى كوللەدجىندە 100 ورىندىق جاتاقحانا قۇرىلىسى كەلەسى جىلى باستالماق.

وبلىستىق ءماسليحاتتىڭ دەپۋتاتتارى دا اتالمىش ماسەلەنى ءجىتى قاداعالاۋدا. بىرنەشە مارتە وتىرىس وتكىزىپ، جاستاردى جاتاقحانامەن قامتۋ ماسەلەسىن كوتەردى. سوندا ايتىلعان مالىمەتتەر بويىنشا جىل باسىندا وبلىستاعى 9 جوعارى وقۋ ورنىندا 27 497 ستۋدەنت كۇندىزگى بولىمدە ءبىلىم الادى. ولاردىڭ 70 پايىزعا جۋىعى، ياعني، 19172-ءسى باسقا وڭىرلەردەن كەلگەن جاستار. 26 جاتاقحانادا 9 مىڭنان استام ستۋدەنت تۇرىپ جاتىر، ال، جوعارى وقۋ ورنى جاتاقحانالارىنداعى جاستار 8 مىڭنان اسىپ جىعىلادى. پاتەر جالداپ نەمەسە تۋىستارىن پانالاپ جۇرگەن ستۋدەنتتەر 22 پايىزدى قۇرايدى، ياعني، 4180 ادام. دەپۋتاتتار ءالى دە 2 مىڭعا جۋىق ستۋدەنتتىڭ جاتاقحاناعا مۇقتاجدىعىن انىقتاپ وتىر.

مەملەكەت ۇسىنعان مۇمكىندىكتەردى قوردالانعان ماسەلەلەردىڭ شەشىمىن تابۋعا ءتيىمدى پايدالانا ءبىلۋ ماڭىزدى. جەرگىلىكتى اتقارۋشى بيلىك وسىنى انىق سەزىنىپ، باستامانىڭ باياندى بولۋىنا ەڭبەك قىلسا دەيمىز.

جانسايا وماربەكوۆا

Abai.kz