سونىمەن، 2007 جىلدان باستاپ ەلىمىزدەگى قورعانىس سالاسىن شەنسىز باسقارعان شەنەۋنىك دانيال احمەتوۆ قىزمەتىنەن بوساپ، وتستاۆكاعا كەتتى.  قورعانىس سالاسىنداعى شۇعىل قابىلدانعان اۋىس-ءتۇيىس تۋرالى  قازاقستان پرەزيدەنتىنىڭ ءباسپاسوز قىزمەتى قىسقاشا مىنانداي اقپارات بەردى:  «مەملەكەت باسشىسىنىڭ وكىمىمەن قازاقستان رەسپۋبليكاسى قورعانىس ءمينيسترىنىڭ ءبىرىنشى ورىنباسارى – شتاب باستىقتارى كوميتەتىنىڭ توراعاسى مۇحتار قاپاشۇلى التىنباەۆقا قازاقستان رەسپۋبليكاسى قورعانىس ءمينيسترىنىڭ مىندەتىن ۋاقىتشا اتقارۋ جۇكتەلدى.

دانيال احمەتوۆ قازاقستاندا اسكەري شەنى جوق العاشقى قورعانىس ءمينيسترى بولدى. ول بۇل قىزمەتكە 2007 جىلى قاڭتاردا پرەمەر-مينيستر قىزمەتىنەن بوساتىلعاننان كەيىن تاعايىندالعان ەدى. ەكس-ءمينيستردىڭ  بۇرىنعى  ورىنباسارى، گەنەرال-لەيتەنانت قاجىمۇرات ماەرمانوۆ ۇقك تەرگەۋ اباقتىسىندا سىبايلاسقان جەمقورلىققا قاتىستى ءىس بويىنشا وتىر. تەك ماەرمانوۆ قانا ەمەس، دانيال كەنجەتايۇلىنىڭ  اينالاسىنداعى اسكەري لاۋازىم يەلەرىنىڭ ءبىر قانشاسى جەمقورلىق ارەكەتتەرىنىڭ اشكەرە بولۋىنا بايلانىستى ءىستى بولىپ جاتىر.  

ايتكەنمەندە، كەشەگە دەيىن «جابىق تاقىرىپ» بولىپ كەلگەن اسكەري سالاعا قاتىستى جاريالانىمنىڭ بارلىعى باس بارماقتى قايقايتىپ كورسەتەتىندەي ەدى. مىسالى «ناعىز جىگىتتەرگە ارنالعان»  «سارباز» گازەتىنىڭ 2007 جىلدىڭ قازان ايىنداعى ءبىر سانىندا بىلاي دەپ جازىلىپتى:  «قازاقستان رەسپۋبليكاسىنىڭ قورعانىس ءمينيسترى دانيال احمەتوۆ وتكەن قىركۇيەك ايىندا الماتى قالاسىندا شوعىرلانعان جوعارى اسكەري وقۋ ورىندارىندا سويلەگەن سوزىندە... “رەسپۋبليكامىزدىڭ اسكەري ءبىلىم بەرۋ جۇيەسى بۇگىنگى كۇننىڭ تالاپتارىنا تولىق ساي ەمەس. تۇرالاپ قالعان اسكەري ءبىلىم بەرۋ جۇيەسىن الەمدىك ستاندارت دەڭگەيىنە كوتەرۋىمىز ءۇشىن رەفورما جۇمىستارىن تۇبەگەيلى تۇردە جاڭاشا جۇرگىزۋىمىز قاجەت. جوعارى اسكەري ءبىلىم ورىندارىنىڭ ماتەريالدىق-تەحنيكالىق وقۋ بازالارىن جاقسارتىپ، ۇستازدار مەن پەداگوگ-عالىمداردىڭ بىلىكتىلىگىن جەتىلدىرۋ ماقساتىندا بولىنەتىن قارجى كولەمى دە ەسەلەنە تۇسەدى...” – دەپ جوعارى اسكەري وقۋ ورىندارىنىڭ جاڭا باسشىلارىن ۇجىمدارىنا تانىستىرعان بولاتىن».
مۇنايدىڭ باعاسى شامادان تىس شارىقتاپ ءوسىپ قازاقستان «قارا التىننىڭ» ىرىزدىعىن كورە قالعان تۇستا پرەمەر-ءمينيستردىڭ تۇعىرىنا تۋ بايلاعان دانيال كەنجەتايۇلى شاماسى پيار ماسەلەسىن مىقتاپ ءتۇسىنىپ السا كەرەك، قورعانىس ءمينيسترى قىزمەتىندە دە ول اركەز جاقسى جاعىنان جارنامالانىپ ءجۇردى. الايدا، قارجى داعدارىسى مەن كوررۋپتسياعا قارسى قازاقستانداعى «بىتىسپەس» مايداننىڭ سالقىنى ونى دا وراپ اكەتتى. وسى ۋاقىتقا دەيىن ءباسپاسوز كوتەرگەن جايتتاردىڭ بىرىنە قۇلاق اسپاعان جوعارى بيلىك اقىرىندا احمەتوۆكە سەنىپ تاپسىرىلعان، بالكىم، قيماستىقپەن سىيلاي سالعان سالانى جايلاعان بىلىققا دا نازار اۋدارىپتى. سوندا دەيمىز-اۋ، قارجى داعدارىسىنىڭ قارا داۋىلى تۇرماسا قازىنانى توناعاندار بۇتىنا تولىپ جۇرە بەرمەك پە ەدى؟..  تەگىندە، بەينەلەپ ايتساق، داۋىلدىڭ سوققانى دا جاقسى... جەر انا قوقىستان ءبىر تازارىپ قالادى. قازاقستان دا سول قارجى داعدارىسىنىڭ داۋىلى ورشىگەن مىنا زاماندا ءوز ىشىندەگى قۋ اياقتاردان ءبىر ارىلىپ قالاتىن سياقتى. بىراق، ءىشىپ-جەۋگە ەبى باردىڭ بارىنە ىڭعايلى بۇگىنگى جۇيەنىڭ جىلىك مايىن شاققاندار ءبارىبىر كوررۋپتسيامەن كۇرەستى كوررۋپتسيانىڭ جەڭىسىنە جىعىپ سالىپ وتىرا بەرەرى داۋسىز. ءيا، بۇل جولى اسكەريلەردىڭ ورتاسىندا شەن تاعىپ ۇلگەرمەگەن شەنەۋنىك قىزمەتىنەن بوسادى. ول ءتىپتى ناعىز ۇرىستىڭ قانداي بولاتىنان دا بىلمەي «قىرشىن» كەتتى. كەشەگە دەيىن قولىنا دۇرىستاپ تاپانشا ۇستاماعان ول ەندى قانداي قىزمەتتىڭ قۇلاعىن ۇستار ەكەن؟ ۇستاۋ بىلاي تۇرسىن، ءوزىنىڭ ۇستالىپ كەتۋى دە عاجاپ ەمەس.

«اباي-ينفورم».