Ресей президентінің Урал федералды округіндегі арнайы өкілі Владимир Якушев су тасқынына Қазақстанды кінәлап, Қорған және Түмен облыстарындағы су тасқынын болдырмау үшін Қазақстан өзінің су қоймалар жүйесіне суды «келісілген түрде жіберуге міндетті еді деген пікір білдірді.

«Бізде осындай қыс болған кезде және қардың мөлшері айтарлықтай көп болса, су қоймасында жеткілікті мөлшерде су жиналатын болса, біздің әріптестерімізбен [қазақстандық] осы мәселе бойынша жұмыс істеуіміз керек», - деді Якушев РБК телеарнасындағы сұхбатында.

Оның айтуынша, алдағы уақытта Қазақстанда ағынды суларды реттеу арқылы бірнеше аумақта су тасқыны мәселесін болдырмауға болады.

Осы тұста Қазақстанның Су ресурстары және ирригация министрлігі Владимир Якушевтің «Қазақстан су жіберіп, біздің бірнеше елдімекен суға кетті» деген мәлімдемесіне жауап беріп, терістеді.

«Тобыл өзенінің бойындағы су Ресейден келеді. Тиісінше, суды ағызу туралы шешім ресейлік жағынан келетін ағындар негізінде қабылданады. Сондықтан Ресейдегі су тасқынына Қазақстан ықпал етеді деу дұрыс емес. Бұл шындыққа жанаспайды», - делінген министрліктің ҚазТАГ редакциясына жауабында.

«Тараптар разрядтардың көбеюі немесе азаюы бойынша тәулік бойы ақпарат алмасады. Ал біз ешқандай келісілмеген әрекеттер туралы айтып отырған жоқпыз. Қазақстандық тарап Ресей тарапымен тату көршілік әріптестік рухында ынтымақтастық пен ақпарат алмасуды жалғастыруға дайын», - деп атап өтті министрлік.

Дариға Асқар

Abai.kz