Қазақстандықтардың алдағы Құрылтай сайлауына қатысуы жаңа өкілді органды қалыптастыру үшін ғана емес, шешімдер қабылдау барысында қоғамның әртүрлі топтарының мүдделері ескерілуі үшін де маңызды. Мұндай пікірді «Астана қаласының аутизмі бар балалар ата-аналарының «ОРДА» бірлестігі» ҚБ төрайымы Салтанат Есмағанбетова білдірді.

Өкілді жүйенің жаңа кезеңі

23 тамызда Қазақстанда Құрылтай сайлауы өтеді. Салтанат Есмағанбетованың пікірінше, бұл елдің өкілді жүйесін дамытудағы маңызды кезең болмақ.

«Құрылтай сайлауы – өкілді жүйені дамытудағы маңызды қадам. Ол азаматтардың шешім қабылдау үдерісіне кеңірек қатысуын қамтамасыз етіп, қоғам мен мемлекет арасындағы байланысты нығайтуы тиіс», – деп атап өтті ол.

Жаңа форматқа тоқталған сарапшы өкілді органды қалыптастыруға азаматтардың тікелей қатысуының маңызын атап өтті.

«Жаңа формат өкілді органды қалыптастыруға басқаша көзқарасты көздейді. Мұнда азаматтардың тікелей қатысуына маңызды рөл беріледі. Бұл – адамдардың өз мүдделерін кім қорғайтынына ықпал етуіне мүмкіндік», – деді Салтанат Есмағанбетова.

Азаматтық қоғам қандай рөл атқаруы тиіс?

Қоғамдық бірлестік төрайыны сайлау науқаны кезеңінде азаматтық қоғам институттарының жұмысына да ерекше назар аударды.

Оның айтуынша, негізгі міндеттердің бірі – азаматтардың өз құқықтарын түсінуін, сайлау үдерісінің ерекшеліктерін білуін және оған саналы түрде қатыса алуын қамтамасыз ету.

«Біздің міндетіміз – азаматтарды ақпараттандыру, олардың құқықтық және саяси сауаттылығын арттыру, үдерістің ашық болуына ықпал ету, сондай-ақ заңдылық пен ашықтық қағидаттарының сақталуын мұқият бақылау», – деп атап өтті сарапшы.

Осылайша, оның пікірінше, азаматтық қоғамның рөлі халықты ақпараттандырумен ғана шектелмейді, сонымен қатар сайлау үдерісінің ашықтығын қамтамасыз етуге ықпал етуді де қамтиды.
Неліктен сайлауға бару маңызды?

Салтанат Есмағанбетова сайлаушылардың белсенділігі жаңа органның өкілдік сипатына тікелей байланысты екенін атап өтті. Дауыс беруге азаматтар неғұрлым көп қатысса, қоғамның әртүрлі топтарының өз өкілдерін таңдау арқылы өз мүдделерін білдіру мүмкіндігі де соғұрлым кеңейеді.
«Азаматтардың қатысуы – кез келген өкілді органның заңдылығының негізі. Егер адамдар қатыспаса, олардың мүдделері өкілдіксіз қалуы мүмкін. Сондықтан дауыс беру – тек құқық қана емес, азаматтық жауапкершілік», – деді ол.

Жаңа Құрылтайдан не күтіледі?
Азаматтық қоғам өкілінің айтуынша, болашақ Құрылтай жұмысына қатысты басты күтілім – халықпен ашық әрі тұрақты диалог орнату.
Оның сөзінше, қоғаммен өзара іс-қимыл сайлау науқаны аяқталғаннан кейін де жалғасып, азаматтар көтерген мәселелер нақты шешімдерден көрініс табуы маңызды.

«Басты күтілім – Құрылтай қоғаммен диалог жүргізетін шынайы алаңға айналса екен. Адамдарды алаңдататын мәселелер, әсіресе халықтың әлеуметтік осал топтарына қатысты проблемалар бойынша ашықтықты, кері байланысты және нақты шешімдерді көргіміз келеді», – деп атап өтті Салтанат Есмағанбетова.

Abai.kz