ازەربايجان باس پروكۋراتۋراسى تاراتقان مالىمدەمەگە سايكەس، ارمەنيا سناريادى گوراديز قالاسىنداعى ماي قۇيۋ ستانتسياسىنا جاقىن جەردە جارىلعان. ودان ءبىر ادام قازا تاۋىپ، تاعى ۇشەۋى جاراقات العان. سارسەنبى كۇنى تەرتەر اۋدانى دا ارتيللەريالىق اتقىلاۋعا تۇسكەنى حابارلاندى.

ارمەنيا بولسا، بۇل مالىمەتكە قاتىستى ازىرگە ەشقانداي اقپارات بەرمەدى.

تاۋلى قاراباقتاعى قارۋلى قاقتىعىستار ءتورت كۇننەن بەرى جالعاسىپ جاتىر. باكۋ مەن ەرەۆان ايماقتاعى احۋالدىڭ ءورشىپ كەتۋىنە ءبىرىن-ءبىرى ايىپتاپ جاتىر. 27 قىركۇيەكتە تاڭەرتەڭنەن بەرى باستالعان اتىستان ونداعان ادام قازا بولىپ، كوپ ادام جاراقات الدى. اراسىندا بەيبىت تۇرعىندار دا بار.

ءبىر كۇن بۇرىن ەرەۆان ارمەنيانىڭ ۆاردەنيس اۋدانى، باكۋ ازەربايجاننىڭ داشكەسان اۋدانى اۋە سوققىسىنا تاپ بولىپ جاتقانان مالىمدەگەن. ارميان بيلىگى بۇدان بولەك تۇركيانىڭ F-16 ۇشاعى ارمەنيانىڭ سۋ-25 ۇشاعىن اتىپ تۇسىرگەنىن، ۇشقىش قازا بولعانىن مالىمدەگەن. رەسمي انكارا بۇل مالىمەتتى تەرىسكە شىعاردى.

29 قىركۇيەكتە بىرىككەن ۇلتتار ۇيىمىنىڭ (بۇۇ) قاۋىپسىزدىك كەڭەسى تاۋلى قاراباقتاعى جاعدايدى شۇعىل تالقىلاپ، ۇيىمنىڭ باس حاتشىسى انتونيو گۋتەرريشتىڭ اتىستى تەز ارادا توقتاتۋ بويىنشا ۇندەۋىن قولدادى. بۇۇ ايماقتاعى جاعدايدى رەتتەۋ ءۇشىن كەلىسسوزگە كەلۋگە شاقىردى.

بىراق ازەربايجان مەن ارمەنيا ليدەرلەرى بەيبىت كەلىسسوزدەر وتكىزۋدەن باس تارتىپ، ءبىرىن-ءبىرى جاعدايدى ۋشىقتىردى دەپ ايىپتاپ جاتىر.

تاۋلى قاراباق توڭىرەگىندە داۋ سوۆەت وداعى كەزىنەن باستالعان. ول كەزدە تاۋلى قاراباق اۋدانى ازەربايجان سسر-ءى قۇرامىنا كىرگەن، بىراق تۇرعىندارىنىڭ كوبى ارميان بولعان. 1988-1994 جىلدارى ارالىعىندا بولعان اسكەري قاقتىعىس كەزىندە 30 مىڭ ادام قازا تاۋىپ، جۇزدەگەن مىڭ ادام بوسقىنعا اينالعان. ارمەنيا اسكەرىنىڭ قولداۋىنا يە بولعان سەپاراتيستەر تاۋلى قاراباقتىڭ باسىم بولىگىن باقىلاۋىنا الىپ، ءوزىنىڭ قاراماعىنا ازەربايجانعا تيەسىلى كەي اۋدانداردى دا تىركەپ الدى. ازەربايجان بۇل تەرريتوريانى وككۋپاتسيالانعان دەپ اتايدى. 1994 جىلى ەكى ەل اراسىندا قارۋلى قاقتىعىستى توقتاتۋ جانە شيەلەنىستى بەيبىت جولمەن شەشۋ جونىندە كەلىسىم جاسالدى. بىراق بۇل كەلىسىم شيەلەنىستى شەشكەن جوق.

Abai.kz