اۋەجايلاردا رەيستەرىڭنىڭ اراسىندا بوس ۋاقىت بولادى، سول كەزدە اينالاڭداعى ءوزىڭ سياقتى جولاۋشىسى بار، سول جەردە جۇمىس جاسايتىندارى بار، نەشە ءتۇرلى ۇلتتاردى كورىپ وتىرىپ مىناداي وي كەلەدى.

بوس ماقتانۋدان ءالى ارىلا الماي كەلەمىز. اسىرەسە تاريحتى ايتقاندا. بالەن عاسىر بويى اينالامەن سوعىسىپ سوعىسىپ، اقىرىندا رەسەيدەن وڭباي جەڭىلىپ، تاۋەلسىزدىكتەن، جەردەن ايرىلىپ بودان بولىپ كەتكەنىمىز تۋرالى ايتقىمىز كەلمەيدى. تاريحتان ساباق العىمىز كەلمەيدى.

قاراپ تۇرساڭ كەزىندە ءدال قاسىمىزداعى كورشىلەرىمىز رەسەي مەن قىتاي تەحنولوگيالىق تۇرعىدا قارقىنداپ دامىپ جاتقاندا ءبىزدىڭ ەلدىڭ يگى جاقسىلارى وعان ءمان بەرمەي، باياعىشا مال باعىپ، كوشىپ-قونىپ جۇرە بەردى. جان-جاققا تىڭشىلار جىبەرىپ، زەرتتەپ، جاڭا نارسەلەردى ەلگە اكەلۋلەرىنە نە كەدەرگى بولدى ەكەن؟ قاراجات جەتپەدى ەمەس، بايلار مالىنىڭ ءتىپتى سانىن بىلمەيتىن. سولاي اتا-بابا جولىن ۇستايمىز دەپ جۇرگەندە قازاق ەلى باسقا ەلدەردەن بىرنەشە ءجۇز جىلعا ارتتا قالىپ قويدى.

قىلىشەن سوعىساتىن كەزدە بىزدىكىلەر قىرعيداي ءتيىپ، حورەزمنىڭ قۇل بازارىنا سۇيرەپ اپارىپ ساتىپ جۇرگەن رەسەيلىكتەر دامىپ كەتىپ، اسكەرىن مىلتىقپەن، زەڭبىرەكپەن قارۋلاندىرىپ، ءوزىمىزدى باسىپ الدى، ارتىنان ءتىپتى كورسەتپەگەندەرى جوق، ۇلت رەتىندە قۇرىپ كەتۋگە شاق قالدىق. كەزىندە الاش زيالىلارى ءبىزدى قازاق اۆتونوميالى كەڭەستىك سوتسياليستىك رەسپۋبليكاسى دەپ قوستىرماعاندا قازىرگى تاۋەلسىزدىك بولماس ەدى، رەسەيدىڭ ياكۋتيا سياقتى بولىگى بولىپ وتىرار ەدىك.

قازىر قالايمىز؟ ءالى دە سول، شەتەل دامىپ، ءبىز ارتتامىز. تەك قانا ديپلوماتيانىڭ ارقاسىندا عانا تاۋەلسىزدىگىمىزدى ساقتاپ وتىرمىز، ايتپەسە ارىگە بارماي-اق، قاسىمىزداعى ەكى الپاۋىتقا شاقپاق قۇرلى جوقپىز.
ءبىز تۋرالى بولاشاق ۇرپاق نە ايتار ەكەن، اتا-بابامىز وتىرىك ستاتيستيكا جاساپ، وزدەرىنەن وزدەرى ۇرلاپ ەلدى قۇرتتى دەر مە ەكەن... جانە 100 جىلدان كەيىن قازىرگى شەندىلەردىڭ بىردە-ءبىرىنىڭ اتى قالمايدى، ۇرپاعىمىز "اتا-بابا" دەگەندە ىشىنە ءبارىمىز كىرىپ كەتەمىز.

ارمان راحمەت

Abai.kz