بيىل كسرو-نىڭ تاريح ساحناسىنان كەتكەنىنە تۋرا 31 جىل. بۇل ارالىقتا پوستكەڭەستىك كەڭىستىكتە جاڭا بۋىن ءوسىپ ۇلگەردى. كرەمل سوڭعى ۋاقىتتا "كسرو-نىڭ ىدىراۋى ۇلكەن گەوساياسي اپات بولدى" دەگەن ويىن جاسىرماي ايتۋدا. ونداي پىكىردى پۋتين دە بىرنەشە مارتە ايتتى. 

ءپۋتيننىڭ سىرتقى ساياساتتاعى قادامدارى مەن ىشكى ساياساتتاعى ۇلتتى ۇيىستىرۋ ارەكەتتەرى كسرو-نى جانداندىرۋ يدەياسىنا نەگىزدەلگەن. ماسكەۋ ونى اشىق مويىنداماسا دا، ءار ارەكەتىنەن اڭعارۋ قيىن ەمەس. 24-اقپان كۇنى ۋكراينا جەرىنە باسىپ كىرگەن رەسەيلىك تانكتەردە كسرو-نىڭ قىزىل تۋى جەلبىرەپ تۇرعانى سونىڭ ايقىن دالەلى. سوڭعى ۋاقىتتا رەسەيدىڭ اقپارات سالاسى كەڭەستىك كەزەڭدى ماقتاۋ-ماداقتاۋدى ارتتىردى. ءستاليندى ۇلى وسەم رەتىندە دارىپتەيتىن سەريالدار تۇسىرىلۋدە، كسرو-نىڭ قاندىقول جەندەتتەرىنە ارنالعان جەكەلەگەن فيلمدەر جەتكىلىكتى. توم-توم تاريحي كىتاپتار جازىلۋدا. رەسەيلىك ساياساتكەرلەر "ەرتە مە، كەش پە كسرو-نى قايتا قۇرۋ كەرەك" دەگەندى اشىق ايتا باستادى.

كسرو-نىڭ پرەمەرى بولعان نيكولاي رىجكوۆ كۇنى كەشە عانا كسرو-نى جانداندىرۋعا قاتىستى پىكىر ءبىلدىردى. ول 1922 جىلعى فورمات نەگىزىندە كسرو-نى قايتا قۇرۋ مۇمكىن ەمەس، الايدا باسقا دولى بار دەگەن ويدا.

"ەۋروپالىق بىرلەستىكتەرگە ۇقساس بىرلەستىك قۇرۋعا تىرىسۋىمىز كەرەك. ەو بار جانە ونىڭ ارنايى ورگاندارى بار. ەو ىسپەتتەس پوستكەڭەستىك كەڭىستىكتە مەملەكەتتەر بىرلەستىگىن قۇرۋعا بولادى دەپ ويلايمىن. جاڭا شارتتاردى قاراستىرا وتىرىپ جاساۋعا بولادى عوي", - دەيدى ول.

رىجكوۆ بۇرىنعى كسرو-نى قالپىنا كەلتىرۋ مۇمكىن ەمەس دەيدى ول. "سەبەبى مەملەكەت دەگەن ءتىرى ورگانيزم ىسپەتتەس، ءبىر ورىندا تۇرمايدى، داميدى، وزگەرەدى"   دەپ تۇيىندەدى ويىن.

كسرو-نى اڭساۋ رەسەيدە ءتۇرلى ۇسىنىستارمەن جالعاسىن تاۋىپ كەلەدى. رەسەيلىك اسىرەۇلتشىلدار "رەسەيدىڭ تۋىن كسرو تۋىنا اۋىستىرۋ كەرەك" دەگەن ۇسىنىستى ايتقاندارىنا بىرنەشە جىلدىڭ ءجۇزى بولدى. ال رەسەيلىك كوممۋنيستەر ء"ستاليندى كەسەنەگە قايتا جەرلەۋ كەرەك" دەگەن ۇسىنىستى كوتەرۋدە.

كا مىرزا

Abai.kz