قازىر «اتامەكەن» ۇكپ-نىڭ بۇرىنعى باسشىسى ابىلاي مىرزاحمەتوۆ ۇستالىپ، استانا پوليتسيا دەپارتامەنتىنىڭ ۋاقىتشا ۇستاۋ يزولياتورىندا وتىر. قر سىبايلاس جەمقورلىققا قارسى قىزمەتىنىڭ دەرەگىنشە، ول «تۋىسىن قىلمىستىق جاۋاپكەرشىلىكتەن بوساتۋعا كومەكتەسكەن جانە كاسىپكەردى اسا ءىرى كولەمدە پارا بەرۋگە يتەرمەلەدى» دەگەن كۇدىككە ىلىنگەن.

«قازىرگى تاڭدا قىلمىستىق ءىس بويىنشا كەشەندى جەدەل-ىزدەستىرۋ شارالارى جۇرگىزىلىپ، ونىڭ باسقا دا قىلمىستارعا قاتىسى بار-جوعى تەكسەرىلىپ جاتىر. تەرگەۋ جالعاسادى»، – دەدى انتيكور.

سونداي-اق دەپارتامەنت قر قىلمىستىق-پروتسەستىك كودەكسكە سايكەس تەرگەۋدىڭ مۇددەسى ءۇشىن بۇدان باسقا اقپاراتتاردى ءازىر جاريا ەتۋگە بولمايتىنىن جەتكىزدى.

2022 جىلى 18 اقپاندا ابىلاي مىرزاحمەتوۆ باسقاراتىن «اتامەكەن» باسقارماسى وتستاۆكاعا كەتتى. ابىلاي مىرزاحمەتوۆ 2013 جىلدىڭ قىركۇيەگىنەن بەرى ۇكپ باسقارما توراعاسى قىزمەتىن اتقارىپ كەلەدى. سونىمەن قاتار، ءار جىلدارى جەكە سەكتوردا جۇمىس ىستەپ، «قازاقستان تەمىر جولىن» دا باسقاردى. 2001-2002 جىلدارى كولىك جانە كوممۋنيكاتسيا ءمينيسترى بولدى.

2002 جىلدىڭ ناۋرىز ايىندا مىرزاحمەتوۆ قىلمىستىق ءىستى تەرگەۋ قىزمەتىنەن بوساتىلدى، ال 2003 جىلدىڭ مامىرىندا مەملەكەتتىك مۇلىكتى ۇرلاۋدى ۇيىمداستىردى دەگەن ايىپپەن مۇلكى تاركىلەنىپ، بەس جىلعا شارتتى تۇردە باس بوستاندىعىنان ايىرۋ جازاسىنا كەسىلدى.

Abai.kz