قاراعاندىداعى اپات: ەلىمىزدىڭ تۋى ەندى تومەن تۇسپەسىن!..
كەشە مارقۇم بولعان كەنشىلەردى جوقتاپ، ەل بوپ ازا تۇتتىق. بۇگىن جەرگىلىكتى باسىلىمدار جەر استىندا قالعان 46-كەنشىنىڭ ءمايىتى تابىلعانىن حابارلادى. اقشەيىتتەردىڭ وتباسىنا، تۋعان-تۋىستارى مەن جاقىندارىنا، مۇقىم قازاق ەلىنە قايعىرا كوڭىل ايتامىز.
جالپىۇلتتىق ازا تۇتۋ كۇنى قازاقستاندا وسىمەن 13-رەت جاريالاندى. بۇل، جالپى العاندا، تاۋەلسىزدىك العالى بەرى ەكى جارىم جىل سايىن تۋىمىزدى تومەن تۇسىردىك دەگەن ءسوز. باسقاسىن بىلاي قويىپ، كەيىنگى 5 جىلدا 6 رەت جالپىۇلتتىق ازا تۇتۋ كۇنى جاريالانعان ەكەن.
2019 جىلدىڭ 27-جەلتوقسانىندا الماتى اۋەجايى ماڭىندا تاڭەرتەڭ Bek Air اۋە كومپانياسىنىڭ Fokker-100 ۇشاعى قۇلادى. ۇشاق بورتىندا 93 جولاۋشى مەن 5 ەكيپاج مۇشەسى بولعان. استاناعا بەت العان اۋە كەمەسى ۇشۋ بارىسىندا بەتون قورشاۋدى بۇزىپ، ەكى قاباتتى نىسانعا سوعىلدى. رەسمي مالىمەت بويىنشا 13 ادام قايتىس بولدى. سول جىلى جەلتوقسان ايىنىڭ 28-ءى كۇنى جالپىۇلتتىق ازا تۇتۋ كۇنى جاريالاندى.
2020 جىلدىڭ 8-شىلدەسىندە پرەزيدەنت قاسىم-جومارت توقاەۆ 13 شىلدەنى COVID-19 كوروناۆيرۋسىنىڭ سالدارىنان قايتىس بولعاندار ءۇشىن ۇلتتىق ازا تۇتۋ كۇنى دەپ جاريالادى.
2021 جىلدىڭ 26-تامىز كۇنى ساعات 19:00-دە جامبىل وبلىسى بايزاق اۋدانىندا اسكەري ءبولىمنىڭ وق-دارىلەر ساقتالعان قويماسىنان ءورت شىقتى. 13 ادام مەرت بولىپ، 98 ادام جاراقات العان. جارىلىس وشاعىنا جاقىن اۋىلداردان جۇزدەگەن ادام ەۆاكۋاتسيالاندى. قويماداعى وق-دارىلەردىڭ كەيبىرى ءدال وسىنداي جارىلىس بولعان ارىس قالاسىنان اكەلىنگەنى بەلگىلى بولدى. 2021 جىلعى 29 تامىزدا ەل پرەزيدەنتىنىڭ جارلىعىمەن قازاقستاندا ۇلتتىق ازا تۇتۋ كۇنى بولىپ جاريالاندى.
2022-جىلدىڭ باسىندا قاندى قاڭتار وقيعاسىندا كەم دەگەندە 238 ادام قازا تاپتى. قاسىم-جومارت توقاەۆ 10-قاڭتاردى جالپىۇلتتىق ازا تۇتۋ كۇنى دەپ جاريالادى.
بيىل ماۋسىم ايىنىڭ 8-ءى كۇنى اباي وبلىسىندا «سەمەي ورمانى» مەملەكەتتىك ورمان تابيعي رەزەرۆاتىندا باستالعان ءىرى تابيعي اپاتتى بىرنەشە كۇن اۋىزدىقتاۋ مۇمكىن بولمادى. ناتيجەسىندە 14 ادام قازا تاپتى. مەملەكەت باسشىسىنىڭ جارلىعىمەن ماۋسىم ايىنىڭ 12-ءسى كۇنى جالپىۇلتتىق ازا تۇتۋ كۇنى بولىپ جاريالاندى.
اراعا ءتورت اي سالىپ، كەشەگى تراگەديالى وقيعا بولدى. وسى وقيعالاردىڭ اربىرىنەن كەيىن مارقۇمدار مەن جاپا شەككەندەردىڭ وتباسىلارىنا ماتەريالدىق-پسيحولوگيالىق كومەك كورسەتىلەتىنى ايتىلىپ كەلەدى. بۇلاي بولۋى زاڭدى دا. الايدا تابيعي اپاتتاردان، الەمگە تونگەن ىندەتتەن باسقاسى الدىن الۋعا بولاتىن وقيعالار ەدى. بيلىك باسىنداعىلار وتكەننەن ساباق الۋى كەرەك دەپ ەسەپتەيمىز.
ەلىمىزدىڭ تۋى ەندىگارى تومەن تۇسپەۋىن، قالىڭ قاراشانىڭ ەندى قايتىپ قارا جامىلماۋىنان تىلەيمىز! اسپانىمىز اشىق، جۇرتىمىز امان بولعاي!
Abai.kz
