قىزىل يمپەريا ۇستەمدىك قۇرعان كەڭەس زامانىندا قازان ايى داڭعازا مەرەكەمەن باستالاتىن. بيىلعى قازان ايىنىڭ ءار اپتاسى قازاقستان ءۇشىن دە، الەم ءۇشىن دە تىنىش بولماي تۇر.

الەم دەگەندە، ارينە، يزرايل مەن حاماس قاقتىعىسى ويعا ورالاتىنى انىق. قازاننىڭ 7-ءسى كۇنى ورىن العان حاماس-تىڭ قاندى شابۋىلىنان 1400-دەن استام يزرايل تۇرعىنى وپات بولسا، يزرايل تارابىنىڭ كەك الۋ ارەكەتىنەن 8000-نان استام پالەستينالىق اجال قۇشتى.

ال ءوز ىشىمىزگە كەلسەك، ۇكىمەتتىڭ قازاننىڭ التىسى كۇنگى اۋىلشارۋاشىلىق وندىرىسىنە وراسان زور شىعىن كەلتىردى دەگەن جەلەۋمەن كيىك اتۋعا رۇقسات بەرۋ شەشىمىنەن كەيىن، بوسقان، وققا ۇشقان دالا تاعىلارىنىڭ ايانىشتى تاعدىرى  الەۋمەتتىك جەلىنىڭ تالقى تاقىرىبىنا اينالدى.

«كيىكتىڭ كيەسىنە ۇرىنباساق بولعانى» دەگەن قورقىنىش ءار كوڭىلدە بەلەڭ الدى.

29 قازان – 46 كەنشىنىڭ كەنىشتەن شىعا الماي، جەر استىندا وپات بولۋىنا بايلانىستى ۇلتتىق ازا تۇتۋ كۇنى بولىپ جاريالاندى. ۇلانعايىر جەرگە سيماعان كيىك تاعدىرى دا، كەنىشتە قازا تاپقان ەل ازاماتتارىنىڭ ءومىرى دە ەلدىڭ قابىرعاسىن قايىستىرعانى انىق.

ماسەلەنىڭ توركىنىنە ۇڭىلسەك، كيىك قىرعىنى مەن كەنىشتەگى اپاتتىڭ ادامي، ەكونوميكالىق سالدارلارى بار ەكەنى انىق. اشىعىن ايتقاندا ەسكى قازاقستان بيلىگىنىڭ ەستيتىن ۇكىمەت قۇرۋعا تىرىسىپ وتىرعان جاڭا قازاقستان بيلىگىنە قالدىرعان توقسان تاراۋ تۇيتكىلىنىڭ ءبىر پاراسى ەكەنى انىق.

قازىر قوعام نازارى كيىك تاعدىرىنان، كەنىشتە مەرت بولعان ادام تاعدىرىنا اۋدى. ول زاڭدى دا. كوپشىلىك بيلىكتىڭ ۇندىتەكتى ينۆەستورمەن كەلىسىم-شارتتىڭ كۇشىن جويۋ باستاماسىن قۇپتاپ، ءوز ۇسىنىستارىندا جەتكىزۋدە. ەسكى قازاقستان بيلىگىنەن تەپەرىش كورگەن مۇقتار جاكىشەۆ، سەرىك احمەتوۆتەر دە العا شىعىپ، نازارباەۆ بيلىگى كەزىندە مەملەكەت بايلىعىنىڭ جىمىسقى جولمەن قالاي جات قولىنا وتكەنىن جەتكىزۋدە.

جاڭارعان پارلامەتتە دە شەتەل اسقان ەل بايلىعىن ەلگە قايتارۋ تۋرالى زاڭ جوبالارى قابىلدانىپ، سەڭ بۇزىلعانداي بولعان. بۇل باعىتتا ەرمۇرات باپي اعامىز باستاعان دەپۋتاتتار بەلسەندى جۇمىس ىستەۋدە. كەنىشتەگى اپات حالىق قالاۋلىلارىنىڭ بوسقا شىرىلداپ جۇرمەگەنىن تاعى ءبىر دالەلدەدى. كوش جولى كەسىلىپ، جايىلىم اياسى تارىلىپ، ەلدىڭ ەگىنىنە تۇسكەن كيىكتىڭ سۇيكىمسىز تاعدىرى دا، جەر استىنان شىعا الماي قالعان كەنشىلەردىڭ ءولىمى دە 30 جىلدىق جۇيەنىڭ نەگە الىپ كەلگەنىنىڭ ناقتى كورىنىسى بولدى.

ەل بايلىعىن زاڭسىز يەلەنگەن شەتەلدىك ميللياردەرلەرمەن كۇرەس تە، كيىكتىڭ ءورىسى مەن سۋاتىن جالعا العان اسكەري دەرجاۆامەن كۇرەس تە وڭايعا تۇسپەسى انىق. بۇل ماسەلەنىڭ شەشىمى ەستيتىن ۇكىمەتتىڭ ەل پىكىرىنە قۇلاق اسىپ، ادام ومىرىمەن باقۋاتتى بولۋىن بارىنەن بيىك قويىپ، الەمدەگى ەڭ ۇلكەن تەرريتوريانىڭ مۇمكىندىگىن تولىق اشىپ، شولەيتتەندىرمەي، اڭداردىڭ تىنىسىن تارىلتپاي جۇمىلا جۇمىس جاساۋىندا جاتىر.

ەسبول ۇسەنۇلى

Abai.kz