قازىر قازاقتاندا كسرو ءميفى – «قازاقستان كوپۇلتتى مەملەكەت» دەگەن تۇجىرىم ورنىعىپ، سوعان جۇرتتىڭ 40 پايىزى جانە بيلىكتەگى اكىم-قارالار يمانداي سەنەتىن كۇيگە ۇشىرادىق.

«140 ۇلتتى ەلمىز» دەگەن پالەكەت ويلاپ تابىلىپ، سول ۇلتتاردىڭ ءتىزىمى 0,1 پايىز دەگەن كورسەتكىشپەن، ۇلتقا ۇيالماي ۇسىنىلاتىن بولدى.

ال اتا زاڭىمىزدىڭ 2-باپ 1 تارماعىندا: «قازاقستان رەسپۋبليكاسى - پرەزيدەنتتىك باسقارۋ نىسانىنداعى ءبىرتۇتاس مەملەكەت»، - دەپ جازىلعان.

«كوپۇلتتى فەدەراتسيالى ەل» دەگەن جوق!

الەم بىزدە: «140 ۇلت تۇرادى»، - دەمەيدى. «ورىس جانە انا تىلىندە سويلەيتىن قازاقتار تۇرادى»، - دەپ تانيدى. جانە قازاقستاندا اۆتوحون بولا المايتىن، بىراق، تاعدىر ايداۋىمەن 1730 جىلدان باستاپ ەلىمىزدىڭ ءار تۇپكىرىنە قونىستانعان دياسپورلار بار ەكەنى جاسىرىن ەمەس.

ولاردى قونىستانۋىنا قاراي: «شوعىرلانعان، شاشىراعان جانە ارالاس ورنالاسقان حالىقتار» دەپ بولەمىز. جانە ولاردىڭ سويلەۋ ءتىلى نە ورىس ءتىلدى، نە قازاق ءتىلدى بولىپ بولىنەدى. ولار ءوز تاريحي وتانىندا ەمەس، پاتشالىق جانە قىزىل بيلىك كەزىندە قازاقتان تارتىپ الىنعان جەرلەردى مەكەندەپ وتىر. ءارى 25 مىڭنان 1 ملن دەيىنگى ارالىقتاعى وسى ءىرىلى-ۇساقتى دياسپورلاردىڭ قازاقتىڭ سالىق كوميتەتىن كەرەك تە ەتپەيتىن ءوز كولەڭكەلى بيزنەسى بار.

وسى ماسەلە عالىمدارىمىز تاراپىنان جەتە زەرتتەلىپ، كسرو ءميفى – «قازاقستان كوپۇلتتى مەملەكەت» دەگەن تۇجىرىمعا نۇكتە قوياتىن كەز كەلگەن سياقتى!

جاڭا قازاقستان مەملەكەتىمىزگە تاڭىلعان وسىنداي ورىنسىز ميفتەردەن ارىلۋعا ءتيىس. بىراق وسى قادامعا ەل مەن جەر يەسى – قازاققا نە ۇلتتىق، نە ءدىني پارتيا قۇرعىزباي وتىرعان بيلىك بارا قويار ما ەكەن.

ال، زيالارىمىز: «ءبىز الاشتانۋشىمىز، ونىڭ اناسىن زەرتتەپ جاتىرمىز، مىناسىن قاراستىرىپ جاتىرمىز»، - دەپ اۋىزدىعا ءسوز، اياقتىعا جول بەرمەيدى. بىراق: «الاش» پارتياسىن جاڭارتا قۇرۋىمىز كەرەك»، - دەگەن ءۋاجدى ءسوز اۋىزدارىنان شىققان ەمەس. نەگە؟

نازارباەۆتىڭ جارلىعىمەن 1995 جىلعى 1 ناۋرىزدا قۇرىلعان قازاقستان حالقى اسسامبلەياسى 30 جىل سانامىزدى ۋلاندىردى. ءبىرتۇتاس ەلدى ۇلت پەن ۇلىسقا ءبولدى. ەندى وسى الەمدە جوق بالەكەتتىڭ كەلەسى جىلى تاريحي ساحناسىنان كەتەتىنە كىم كەپىل بولا الادى؟

ءابىل-سەرىك الىاكبار

Abai.kz