مەملەكەتتىك كەڭەسشى ەرلان قارين Jibek Joly تەلەارناسىنداعى «ۋادە» باعدارلاماسىندا سۇحبات بەردى. سۇحبات بارىسىندا ول ەلتاڭبانى اۋىستىرۋ باستاماسىنا قاتىستى ويىن جەتكىزدى.

ەرلان قاريننىڭ ايتۋىنشا، ەلتاڭبانى وزگەرتۋ – پرەزيدەنتتىڭ ۇسىنىسى ەمەس. مەملەكەت باسشىسى ءوز سوزىندە «ەلتاڭبانى اۋىستىرۋعا قاتىستى ءارتۇرلى پىكىردىڭ ايتىلاتىندىعىن، ەگەر قاجەت بولسا، كوميسسيا قۇرىپ تالقىلاۋ قاجەتتىگىن، وڭ شەشىم قابىلدانسا بايقاۋ جاريالاۋ كەرەكتىگىن» - ايتقان.

«مەملەكەت باسشىسى ەلتاڭبانى مىندەتتى تۇردە اۋىستىرۋ كەرەك دەگەن پىكىر ايتقان جوق. وكىنىشكە وراي، كوپشىلىگى مالىمدەمەنى دۇرىس قارامايدى، وقىمايدى، تىڭدامايدى. شىن مانىسىندە، پرەزيدەنت ول جەردە قوعامدا كەيبىر ازاماتتىڭ ەلتاڭباعا قاتىستى ءارتۇرلى پىكىر ايتىپ جۇرگەنىن، ماسەلەگە قاتىستى ۇستانىم قالىپتاسسا، وندا اشىق تۇردە تالقىلاۋ» كەرەكتىگى تۋرالى پىكىر ايتتى»، — دەيدى مەملەكەتتىك كەڭەسشى.

ەرلان قاريننىڭ سوزىنشە، ەلتاڭبانى اۋىستىرۋ ماسەلەسىن قوعام بەلسەندىلەرى، قوعامدىق ۇيىمدار، ۇلتتىق قۇرىلتايدىڭ بىرقاتار مۇشەسى كوتەرگەن.

«الەۋمەتتىك جەلىدەن كورىپ ءجۇرمىن. «بارلىق شارۋا قالعانداي، ەندى مەملەكەتتىك ەلتاڭبانى اۋىستىرۋ ماسەلەسىمەن اينالىسىپ جاتىر» دەگەن سىندى پىكىرلەر بار. مۇنىڭ ءبارى جاي ءسوز. بارلىق ماسەلەنى ىسىرىپ قويىپ، ەلتاڭبانى اۋىستىرۋ ماسەلەسىمەن اينالىسىپ جاتقان ەشكىم جوق. اتىراۋداعى قۇرىلتاي وتكەننەن بەرى ءبىراز ۋاقىت ءوتتى. ەشقانداي تالقىلاۋ، جيىن وتپەدى، ارنايى شەشىم، قۇجات قابىلدانعان جوق. پىكىرتالاس قالاي ءجۇرىپ جاتىر، سولاي ءجۇرىپ جاتىر. ول – تەك قانا پىكىر. بولدى. سوندىقتان دا بۇل بيلىك تاراپىنان جاسالىپ جاتقان ارنايى جۇمىس ەمەس. بۇل – قوعامداعى پىكىرتالاستىڭ ءبىر كورىنىسى عانا. ماسەلەن، مەملەكەتتىك كەڭەسشىنىڭ قىزمەتىن قارايتىن بولساڭىز، كوپتەگەن كوميسسيانىڭ جۇمىسىن ۇيلەستىرۋمەن اينالىسامىن. ونىڭ ءبىرى – گەرالديكا ماسەلەسى. ەگەر، مەملەكەت، بيلىك كەيبىرەۋلەر ايتىپ جۇرگەندەي ءبارىن ىسىرىپ قويىپ، ەلتاڭبانى اۋىستىرۋ ماسەلەسىمەن اينالىساتىن بولسا، وندا مەن مىندەتتى تۇردە گەرالديكا بويىنشا كوميسسيا وتىرىسىن وتكىزىپ، وسى ماسەلەنى ورتاعا سالار ەدىم. جوق، ونىمەن اينالىسىپ جاتقانىمىز جوق»، — دەدى مەملەكەتتىك كەڭەسشى.

سۇحباتتىڭ تولىق نۇسقاسى:

Abai.kz