«بيىل بيۋدجەتكە سالىقتان ءتۇسۋى كەرەك بولعان 3 تريلليون تەڭگە تۇسپەدى». بۇل اقپاراتتى كەشە ءماجىلىس تورىنەن دەپۋتات ماقسات تولىقباي جاريالادى.

بۇل نەنى بىلدىرەدى؟!

بۇل ءبىزدىڭ ۇكىمەتتىڭ جۇمىس ىستەۋدەن قالعانىن، سالىق ورگانىنىڭ بازار يەلەرىنىڭ الدىندا دارمەنسىز ەكەنىن بىلدىرەدى. قازىرگى تاڭدا سالىق جيناۋشى ورگان بازارداعى ەكى كۆادرات مەتر جەردى 200 مىڭ تەڭگەگە جالعا الىپ، قۇرت-ماي، قىمىز-شۇبات، كورتوپ-پياز، كيىم-كەشەك ساتاتىن كەمباعالداردان عانا تيىن-تەبەن جينايدى.

ال، اناۋ ارەنداعا تولەگەن 200 مىڭ تەڭگە تىكە قالتاعا كەتىپ جاتىر. بازار يەلەرى ودان كوك تيىن سالىق تولەمەيدى…

سول ءۇشىپ ولجاس بەكتەنوۆ ۇكىمەتى باسىمەن كەتكەن بازارلاردى رەتكە سالۋى كەرەك!

بۇل جەردە ولجاس ابايۇلى الىسقا بارماي-اق، كورشى قىرعىز ەلىنىڭ، ناقتىلاپ ايتسام، قامشىبەك تاشيەۆتىڭ تاجىريبەسىن قولدانسا، ماقسات تولىقباي ايتقان 3 تيريلليون تەڭگە ءبىر تيىنى قالماي ۇكىمەت قورجىنىنا تۇسكەلى تۇر.

قامچىبەك تاشيەۆ نە ىستەدى؟!

قامشىبەك تاشيەۆ ءوز ەلىندەگى باسىمەن كەتكەن بازارلاردى انىقتاپ، زاڭسىز الىنعان جەرلەردىڭ ءبارىن مەملەكەتكە قايتاردى. بازارلارداعى ءاربىر نۇكتەنى نومەرلەپ، جالداۋ اقىسىن 40-50 پايىزعا ارزانداتقىزدى. بازارداعى نۇكتەلەردى جالعا الۋشىلار كەلىسىم-شارت بويىنشا تولەۋگە ءتيىستى جالداۋ اقىنى تۇگەلدەي بانك جۇيەسى ارقىلى تولەيتىن ءتارتىپ ورناتتى…

مىنە، وسىنداي باسقارۋدىڭ ناتيجەسىندە ورتالىق ازيادا قىرعىزستان دەگەن جاڭا كوشباسشى ەل پايدا بولدى. ۇلتتىق ستاتيستيكا كوميتەتىنىڭ دەرەگىنشە، 2024 جىلدىڭ باسىنان بەرى قىرعىزستان ەكونوميكاسىنىڭ ءوسىمى 9,4%-دى قۇرادى. ساراپشىلار 2025 جىلى قىرعىزستاننىڭ ءجىو ءوسىمى 8,7%-دى قۇرايدى دەپ وتىر. بۇل بۇكىل ورتالىق ازياداعى ەڭ جوعارعى كورسەتكىش.

قىسقاسى، ولجەكەڭ دە ءبىر ءسات كابينەتتەن شىعىپ، قامشىبەكتىڭ قاشىسىن قولعا الىپ، باسىمەن كەتكەن بازار يەلەرىن كوتەنگە شىقپارتۋى ءتيىس…

اۋىت مۇقيبەك

Abai.kz