ەلوردادا مەملەكەت باسشىسى قاسىم-جومارت توقاەۆتىڭ قاتىسۋىمەن AIF-2025 فورۋمى باستالدى.

فورۋم 29-30 مامىر كۇندەرى وتەدى. اۋقىمدى ءىس-شارانى بۇگىن پرەزيدەنت قاسىم-جومارت توقاەۆ ءسوز سويلەپ اشتى.

استانا حالىقارالىق فورۋمى – ورتالىق ازياداعى ەڭ ءىرى ديالوگتىق الاڭداردىڭ ءبىرى. فورۋم اياسىندا الەمدىك دەڭگەيدەگى وزەكتى ماسەلەلەر – سىرتقى ساياسات، ەكونوميكا جانە قارجى، قاۋىپسىزدىك، تۇراقتى دامۋ، ەنەرگەتيكا جانە كليمات تاقىرىپتارى تالقىلانادى.

فورۋمعا شەتەل ۇكىمەتتەرىنىڭ وكىلدەرى، حالىقارالىق ۇيىمدار، ترانسۇلتتىق كورپوراتسيالار، بيزنەس جانە اكادەميالىق ورتا كوشباسشىلارى قاتىسادى.

AIF – ءتۇرلى سالانىڭ ساراپشىلارى مەن شەشىم قابىلداۋشى تۇلعالارى ءۇشىن جاھاندىق ىنتىماقتاستىق پەن جاڭا سەرىكتەستىكتەردى دامىتۋعا ارنالعان ماڭىزدى پلاتفورما.

پرەزيدەنت قاسىم-جومارت توقاەۆ استانا حالىقارالىق فورۋمىنىڭ پلەنارلىق سەسسياسىندا ءسوز سويلەدى

"قادىرلى قوناقتار!

بارشاڭىزبەن استانا حالىقارالىق فورۋمىندا جۇزدەسكەنىمە قۋانىشتىمىن!

بۇگىنگى باسقوسۋعا شەتەل ۇكىمەتتەرىنىڭ باسشىلارى، ديپلوماتيا، بيزنەس جانە اكادەميالىق ورتاداعى دوستارىمىز بەن ارىپتەستەرىمىز قاتىسىپ وتىر.

مارتەبەلى مەيماندارىمىزعا، اتاپ ايتقاندا، رۋاندا پرەزيدەنتى پول كاگامەگە جانە سولتۇستىك ماكەدونيا پرەزيدەنتى گوردانا سيليانوۆسكا-داۆكوۆاعا، ەۋروپا كەڭەسىنىڭ باس حاتشىسى الەن بەرسەگە، بۇۇ-نىڭ بۇرىنعى باس حاتشىسى پان گي مۋنعا، بىرىككەن ۇلتتار ۇيىمى جۇيەسىنىڭ جەتەكشىلەرىنە، فورۋمنىڭ وزگە دە قاتىسۋشىلارىنا شىنايى ريزاشىلىعىمدى بىلدىرەمىن.

فورۋم اياسىندا جاھاندىق ەكونوميكا، وڭىرلىك ىنتىماقتاستىق جانە حالىقارالىق كۇن تارتىبىندەگى باسقا دا ماسەلەلەر جونىندە ناتيجەلى پىكىر الماسامىز دەپ ۇمىتتەنەمىز.

بۇگىنگى جيىن الەمدە بەلگىسىزدىك بەلەڭ العان كەزەڭدە ءوتىپ وتىر. مۇنى جولايرىق، حالىقارالىق قاتىناستارداعى سىن ساعاتى دەپ سيپاتتاساق تا بولادى. الايدا بۇل تۇجىرىمدى تاريحشىلاردىڭ ەنشىسىنە قالدىرعان ءجون. قازىر وسى جاعدايعا قالاي جاۋاپ بەرەتىنىمىز ماڭىزدى. الدىمىزدا تاڭداۋ تۇر: قانداي شەشىم قابىلدايمىز، قانداي قۇندىلىقتاردى قورعايمىز؟!

دۇنيە ءجۇزىن قاقتىعىستار مەن سوعىس ءورتى جايلاپ بارادى. بىلتىرعى مالىمەتكە سايكەس، 52 مەملەكەت قارۋلى قاقتىعىس جاعدايىندا تۇرعان. ال وسىنداي قاتىگەز ارەكەتتەردەن كەلگەن ەكونوميكالىق شىعىن 19 تريلليون دوللارعا جەتتى. بۇل، شامامەن، الەمدىك ءىجو-ءنىڭ 13,5 پايىزى.

دەگەنمەن وسى سانداردىڭ ارعى جاعىنداعى احۋال ودان دا قورقىنىشتى: قازىرگى قاقتىعىستار اناعۇرلىم ۇزاق ءارى كۇردەلى سيپاتقا يە. وعان كوپتەگەن «ويىنشىلار»، ءتىپتى، ەشقانداي مەملەكەتكە قاتىسى جوق توپتار ارالاسادى. بۇدان بولەك، مۇنداي قاقتىعىستاردىڭ تامىرىندا ءتۇرلى قايشىلىقتار جاتىر.

اتالعان فاكتورلار بەيبىتشىلىكتىڭ بەرىك ورناۋىنا كەدەرگى كەلتىرۋدە. ايرىقشا الاڭداۋشىلىق تۋعىزاتىن تاعى ءبىر دۇنيە بار. ول – الەمدەگى وسى تەكتەس شيەلەنىستەردىڭ جاھانعا مۇلدەم جاڭا تۇسىنىك پەن قۇندىلىقتار ۇسىنىپ، ادامزاتتى تۇبەگەيلى تۇلەگەن، بىراق ازىرگە بەيمالىم كەلەشەككە باستاپ بارا جاتقان جاساندى ينتەللەكتىنىڭ دامۋ ترەندىمەن ەش ۇيلەسپەۋى.

بۇل ورايدا تاريحي تۇجىرىمدار مەن ساياسي ارازدىققا نەگىزدەلگەن اسكەري قاقتىعىستار مەن سوعىستار مۇلدەم ورىنسىز، ءتىپتى اقىلعا قونبايدى.

سوعىسۋدىڭ ورنىنا ءبىز حالقىمىزدى، اسىرەسە، جاستارىمىزدى سانالى ءارى وركەنيەتتى قوعام قۇرۋعا ۇندەۋىمىز كەرەك.

ارينە، قاقتىعىستاردىڭ قاي-قايسىسى دا ءجىتى نازار اۋدارۋدى قاجەت ەتەدى. ايتسە دە، يادرولىق قارۋدى يەلەنگەن مەملەكەتتەر اراسىنداعى شيەلەنىسكە ايرىقشا ءمان بەرگەنىمىز ءجون.

بۇگىندە توعىز ەلدىڭ ارسەنالىندا جالپى سانى 13 مىڭ يادرولىق وقتۇمسىق بار. ساراپشىلار ونى قولدانۋ ىقتيمالدىلىعى ارتىپ كەلە جاتقانىن ەسكەرتەدى. ءتىپتى، بۇعان جازاتايىم قاتەلىك، وقىس وقيعا نەمەسە ەسكالاتسيا سەبەپ بولۋى مۇمكىن.

ءبىر عانا جارىلىستىڭ سالدارى جويقىن بولماق. عالىمدار اتوم بومباسى تۇسكەن جەرىن كۇل-تالقان ەتىپ قانا قويماي، جاھاندىق اۋقىمداعى كليمات اپاتىنا اكەپ سوعۋى، ەگىستىك اتاۋلىنى جويىپ جىبەرۋى مۇمكىن ەكەنىن ايتادى.

ونىڭ قاسىرەتىن ءبىز جاقسى بىلەمىز. جەرىمىزدە جاسالعان 450 يادرولىق سىناقتىڭ زاردابىمەن قازاقستان ءالى كۇنگە دەيىن بەتپە-بەت كەلىپ وتىر. ءبىز بەيبىتشىلىك ءۇشىن كەڭەس وكىمەتىنەن مۇراعا قالعان يادرولىق ارسەنالدان ءوز ەركىمىزبەن باس تارتتىق. بۇگىندە جاپپاي قىرىپ-جوياتىن يادرولىق جانە بيولوگيالىق قارۋدى تاراتپاۋ ۇستانىمىن جاقتايمىز.

جاھاندىق قاۋىپسىزدىككە تونگەن قاتەرگە تەك گەوساياسي سيپات تۇرعىسىنان قاراماۋ كەرەك. مۇنى مويىنداعان ءجون.

الەمدەگى قازىرگى احۋال وزگەرىپ جاتىر. مۋلتيلاتەراليزمنىڭ ءۇنى قۇمىققاندا، پروتەكتسيونيزم ءورشيدى.

وسىناۋ بەي-بەرەكەت كەزەڭدەگى ءبىزدىڭ مىندەتىمىز – ىنتىماقتى قاتاڭ ساقتاۋ، ىدىراعان تۇسىن قايتا قالپىنا كەلتىرۋ.

قازاقستان قازىرگىدەي الماعايىپ زاماندى سىندارلى ىقپالداستىق تۇرعىسىنان قاراستىرادى. سىرتقى ساياساتتا جىككە بولىنبەي ديالوگقا كەلۋدى، كەز كەلگەن ەلدىڭ ەگەمەندىگىن قۇرمەتتەۋدى باسشىلىققا الامىز.

اسىرەۇلتشىلدىق تانىتىپ، وزگە حالىقتاردىڭ تاريحى مەن مادەني داستۇرلەرىن مەنسىنبەۋگە جول بەرىلمەيدى.

از حالىقتاردىڭ انا تىلىندە سويلەپ، ءتول مادەنيەتىن دارىپتەۋىنە قۇرمەتپەن قاراۋ قاجەت. سوندىقتان قازاقستاندا «بىرلىگىمىز – ارالۋاندىقتا» قاعيداتىن قاتاڭ ۇستانامىز.

قۇرمەتتى دوستار!

سوڭعى بىرنەشە جىلدا قازاقستاندا اۋقىمدى ەكونوميكالىق جانە ينستيتۋتسيونالدىق رەفورمالار جۇرگىزىلدى. ءبىزدىڭ ماقساتىمىز ايقىن – بارىنشا ارتاراپتاندىرىلعان، ينكليۋزيۆتى جانە كەلەشەككە باعدارلانعان ەكونوميكا قۇرۋ. ەكونوميكالىق ءوسىم ورنىقتى بولۋمەن قاتار، ونىڭ يگىلىگى ءار ازاماتقا ءادىل بولىنۋگە ءتيىس.

ەلىمىزدى تۇبەگەيلى جاڭعىرتىپ، ادىلەتتى قازاقستاننىڭ نەگىزىن قالاۋ ءۇشىن مەملەكەتتىلىكتى نىعايتۋعا كوپ كۇش-جىگەر جۇمساپ جاتىرمىز.

جالپىۇلتتىق رەفەرەندۋم ارقىلى كونستيتۋتسيامىزعا وزگەرىس ەنگىزىلىپ، باستى بيلىك ينستيتۋتتارىنا رەفورما جاسالدى.

ءبىز سۋپەرپرەزيدەنتتىك جۇيەدەن باس تارتتىق. «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداسىن باسشىلىققا الاتىن، تەجەۋ مەن تەپە-تەڭدىك جۇيەسى بار پرەزيدەنتتىك رەسپۋبليكا جولىن تاڭدادىق.

بۇل تۇجىرىم قازاقستانداعى ساياسي جۇيەنىڭ ەرەكشەلىكتەرىنە مەيلىنشە لايىقتى مودەل ەكەنىنە كامىل سەنەمىن.

پرەزيدەنت وكىلەتتىلىگى ءبىر رەتتىك 7 جىلدىق مەرزىممەن شەكتەلدى. قازاقستاندا عانا ەمەس، ءبىزدىڭ ايماقتا مۇنداي شەشىم بۇرىن-سوڭدى قابىلدانباعان. مەنىڭ ويىمشا، بۇل قادام ەلىمىزدىڭ ساياسي جۇيەسىن نىعايتۋعا، ەكونوميكاسىن دامىتۋعا جانە وركەنيەتتى قوعام قۇرۋعا نەگىز بولادى.

پرەزيدەنت – حالىقتىڭ بەلگىلى ءبىر مەرزىمگە، ءبىزدىڭ جاعدايىمىزدا جەتى جىلعا جالداعان مەنەدجەرى.

پارلامەنت ازاماتتىق قوعام جانە جاڭا ساياسي پارتيالاردىڭ مۇشەلەرىمەن تولىقتى. سونداي-اق ايەلدەرگە، جاستارعا جانە الەۋمەتتىك تۇرعىدان وسال توپتىڭ وكىلدەرىنە قوسىمشا كۆوتا بەرىلدى.

ادام قۇقىقتارىن قورعاۋدىڭ ناقتى تەتىكتەرى بولماسا، ىلگەرى جىلجۋ مۇمكىن ەمەس. بۇل جۇيە «زاڭ مەن ءتارتىپ» قاعيداتىندا كورىنىس تاپقان.

ءبىز اتالعان رەفورمالاردى گەوساياسي احۋال تۇراقسىز كەزەڭدە قولعا العانىمىزدى بىلەمىز. بىراق «جول مۇراتى – جەتۋ». وسى ستراتەگيالىق باعدارىمىزدان اينىمايمىز، رەفورمالاردى توقتاتپايمىز.

جاھانداعى سىن-قاتەرلەرگە قاراماستان، ەكونوميكامىز بىلتىر 5,1 پايىزعا ءوستى. شەتەلدەن تارتىلعان تىكەلەي ينۆەستيتسيانىڭ كولەمى رەكوردتىق كورسەتكىشكە جەتتى. ترانسكاسپي حالىقارالىق كولىك باعىتىمەن تاسىمالدانعان جۇك 62 پايىزعا ارتتى.

دەيتۇرعانمەن ءبىزدىڭ ستراتەگيالىق مۇراتىمىز تسيفرمەن عانا ولشەنبەيدى. بۇل رەفورمالار جۇرتشىلىقتىڭ وركەندەۋىنە جول اشاتىن جاڭا قوعامدىق كەلىسىمدى ورناتۋدى كوزدەيدى.

ءبىز ادام كاپيتالىنا ينۆەستيتسيا سالىپ، جاس مامانداردىڭ قالىپتاسۋىنا جاعداي جاسايمىز. ەڭ باستى مىندەتىمىز – ايماقتار اراسىنداعى الشاقتىقتى ازايتۋ جانە ورتا تاپتى نىعايتۋ.

سول سەبەپتى تسيفرلىق تەحنولوگيا مەن جاساندى ينتەللەكتىدەن باستاپ جاسىل ەنەرگەتيكا مەن قوسىمشا قۇنى جوعارى وندىرىسكە دەيىنگى نەگىزگى سەكتورلارداعى الەۋەتىمىزدى كۇشەيتە بەرەمىز.

ءبىز تسيفرلىق ترانسفورماتسيادا ەلەۋلى تابىسقا قول جەتكىزدىك. ماقساتىمىز – ەۋرازياداعى جەتەكشى IT حابقا اينالۋ.

اسىرەسە، جاساندى ينتەللەكتىنى دامىتۋعا ايرىقشا ءمان بەرىپ وتىرمىز. بىرقاتار شەتەلدىك ۋنيۆەرسيتەتتىڭ فيليالى بار، زەرتتەۋ مەن ازىرلەۋ سالاسىنداعى سەرىكتەستىك جولعا قويىلعان اكادەميالىق جانە يننوۆاتسيالىق حابقا اينالعىمىز كەلەدى.

قازاقستان ەڭ قۋاتتى سۋپەركومپيۋتەردى ىسكە قوسۋعا كىرىستى. قازىردىڭ وزىندە بۇل جۇمىس باستالىپ كەتتى.

بۇدان بولەك، سryptoCity دەپ اتالاتىن جاڭا پيلوتتىق جوبانى جۇزەگە اسىرۋدى جوسپارلاپ وتىرمىز. مۇندا كريپتوۆاليۋتانى ازىق-تۇلىك ساتىپ الۋعا، قىزمەت تولەمىنە جانە باسقا دا ماقساتتاردا پايدالانۋعا جاعداي جاسالادى.

الەمدەگى ۋران قورىنىڭ 40 پايىزى قازاقستاننىڭ ەنشىسىندە. سوندىقتان ەلىمىز اتوم ەنەرگەتيكاسىن دامىتۋدى ۇلتتىق ستراتەگيانىڭ باسىم باعىتى رەتىندە قاراستىرادى.

الايدا كليمات داعدارىسى شەشىلمەي، ەشقانداي ورنىقتى دامۋ بولمايدى. ورتالىق ازيا – پلانەتاداعى كليمات وزگەرىستەرىنە وسال وڭىرلەردىڭ ءبىرى. مۇندا عالامدىق جىلىنۋ دەڭگەيى الەمدەگى ورتاشا كورسەتكىشپەن سالىستىرعاندا ەكى ەسە جوعارى.

اتالعان قيىندىقتاردى ەڭسەرۋ ءۇشىن وڭىرلىك تۇرعىدان ۇيلەستىرىلگەن، پراگماتيكالىق باعىتتاعى كليمات كۇن ءتارتىبىن ىلگەرىلەتۋگە بەيىلمىز. ونىڭ اياسىندا ەلىمىز بىرقاتار حالىقارالىق ۇيىمعا مۇشە بولىپ، كەلىسىمدەرگە قوسىلدى.

كەلەسى جىلى قازاقستان بۇۇ-مەن بىرگە وڭىرلىك ەكولوگيالىق ءسامميتىن وتكىزەدى. بۇل الاڭ ورتالىق ازيا ەلدەرىنىڭ ستراتەگياسىن جاھاندىق ماقساتپەن ۇشتاستىرۋدى كوزدەيدى.

قازاقستان ءوزارا قۇرمەت پەن ايماقتىق ىقپالداستىقتى ارقاۋ ەتكەن ورتالىق ازيانىڭ تۇراقتىلىعى بەرىك، ىنتىماعى بەكەم، بولاشاعى ايقىن بولعانىن قالايدى.

ەكى اي بۇرىن بۇۇ باس اسسامبلەياسى الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى جونىندەگى بۇۇ-نىڭ ايماقتىق ورتالىعىن قۇرۋ تۋرالى قاراردى رەسمي تۇردە قابىلدادى.

بۇل – ءبىزدىڭ كوپجاقتى دامۋعا ۇلەس قوسقان ماڭىزدى جەتىستىگىمىز. اتالعان ورتالىق بىرلەسكەن جوبالارعا قولداۋ كورسەتىپ، تەحنيكالىق ساراپتامالاردى قامتاماسىز ەتەدى جانە حالىقارالىق ىنتىماقتاستىقتى ۇيلەستىرەدى.

قادىرلى قوناقتار!

ءسوزسىز، ءبىز بەتپە-بەت كەلىپ وتىرعان سىن-قاتەرلەر ترانسۇلتتىق سيپاتقا يە. دەسەك تە وعان قارسى ارەكەتىمىزدە بىرىزدىلىك جوق. الەمدەگى احۋال وتە شەتىن، تۇراقسىز ءارى كەرەعارلىققا تولى. سوندىقتان جاھاندىق ىنتىماقتاستىق ءۇشىن قۇرىلعان ينستيتۋتتار وسى جاعدايلارعا ساي بولۋعا ءتيىس.

قازاقستان ورتا دەرجاۆالار ادىلەتتى ءارى ينكليۋزيۆتى الەمدىك ءتارتىپتىڭ ورناۋىنا مۇددەلى بولۋى كەرەك دەپ سانايدى. قازىرگى جۇيەنى مۇقيات سارالاپ، تىڭ ءادىس-تاسىلدەرگە سۇيەنۋ قاجەت. سوعان سايكەس، ورتا دەرجاۆالار دا جاۋاپكەرشىلىك جۇگىن كوتەرۋگە دايىن بولۋعا ءتيىس.

جىل سوڭىنا تامان نيۋ-يوركتە بۇۇ-نىڭ 80 جىلدىعىن اتاپ وتەمىز. 1945 جىلى، ياعني، دۇنيە جۇزىندەگى سۇراپىل سوعىستان كەيىن 51 مەملەكەت بىرگە قۇرعان بۇل ۇيىم بەيبىت ءارى قاۋىپسىز الەمدى قۇرۋدىڭ باتىل جولىن ۇسىندى.

بۇگىندە ۇيىمعا 193 ەل مۇشە. وسىلايشا، ول الەمدەگى قۇرامى ءارالۋان، كۇردەلى ءارى ءوزارا تىعىز بايلانىسقان قوعامداستىققا اينالدى.

ايتسە دە بۇۇ-نىڭ نەگىزگى تارماقتارى، اسىرەسە، قاۋىپسىزدىك كەڭەسى مۇلدەم وزگەرگەن جوق.

80 جىل بۇرىن جاسالعان ينستيتۋتسيونالدى قۇرىلىم مەن قازىرگى زامان اراسىندا الشاقتىق كوپ. بۇل ۇيىمعا جانە ونىڭ تيىمدىلىگىنە دەگەن سەنىمگە سەلكەۋ تۇسىرەدى.

ميللياردتاعان ادامنىڭ تاعدىرىنا اسەر ەتەتىن اسا ماڭىزدى شەشىمدى بىرنەشە ەلدىڭ قابىلداعانى دۇرىس ەمەس.

سوندىقتان قازاقستان بۇۇ قاۋىپسىزدىك كەڭەسىنىڭ قۇرامىن كەڭەيتىپ، وعان الەمنىڭ ءار وڭىرىنەن وكىل قوسۋ تۋرالى ۇستانىمدى قولدايدى.

بۇۇ وزەكتىلىگىن جوعالتپاي، قازىرگى زاماننىڭ تالاپتارىنا ساي بولۋى ءۇشىن قاۋىپسىزدىك كەڭەسىنە قۇرىلىمدىق رەفورما جاسالۋعا ءتيىس.

الپاۋىت ەلدەر بەيبىتشىلىك پەن قاۋىپسىزدىكتى ساقتاۋعا بەيىل ەكەنىن انىق ءبىلدىرۋى كەرەك. ءارى بارلىق مەملەكەتتىڭ تەرريتوريالىق تۇتاستىعىن قورعاۋ تۋرالى ەڭ باستى قاعيداتتان اينىماۋعا ءتيىس.

ءبارىمىز بۇۇ جارعىسىن مۇلتىكسىز ساقتاۋىمىز قاجەت. ونىڭ نەگىزگى پرينتسيپتەرىنە ءۇستىرت نەمەسە نەمقۇرايلى قاراۋدان اۋلاق بولۋىمىز كەرەك. سوندا عانا بىرىككەن ۇلتتار ۇيىمىنىڭ ابىروي-بەدەلىنە دەگەن سەنىمدى قالپىنا كەلتىرە الامىز.

قادىرلى دوستار!

سىزدەر استاناعا الەمنىڭ تۇكپىر-تۇكپىرىنەن كەلدىڭىزدەر. ارقايسىسىڭىز تاجىريبەلەرىڭىزدى، دۇنيەتانىمدارىڭىزدى جانە قۇندىلىقتاردىڭ ىقپالىمەن قالىپتاسقان كوزقاراستارىڭىزدى ورتاعا سالاسىزدار.

اتالعان فورۋمنىڭ ءمانى وسىنداي ينتەللەكتۋالدىق ارالۋاندىقتا جاتىر.

الدىمىزدا كەلەشەكتىڭ ءتۇرلى ستسەناريى كۇتىپ تۇر. ءبىرى ءۇمىت ۇيالاتادى، ءبىرى قاۋىپ-قاتەرگە تولى. بارىنە ورتاق وركەنيەت جولىن تاڭدايمىز با، الدە جىككە ءبولىنىپ قۇردىمعا كەتەمىز بە؟ ونى ۇركەردەي توپتىڭ مالىمدەمەسى ەمەس، كوپتىڭ اۋىزبىرشىلىگى شەشۋى قاجەت.

استانا حالىقارالىق فورۋمى وسى ىنتىماقتاستىققا قولداۋ ءبىلدىرۋ ءۇشىن قۇرىلدى. اتالعان الاڭ ءوزارا قۇرمەتكە نەگىزدەلگەن جانە اشىق پىكىرتالاس مۇمكىندىگىن ۇسىنادى.

بيىلعى فورۋم تاقىرىبى – «اقىل-وي قوسۋ ارقىلى كەلەشەكتى باعدارلاۋ» ( Connecting Minds, Shaping the Future) بۇل – ءبىزدىڭ ۇندەۋىمىز ءارى قالتقىسىز سەنىمىمىز.

جاھاندىق سىن-قاتەردى جالعىز ەڭسەرۋ مۇمكىن ەمەس. ديپلوماتيا رەسمي پروتوكولدىڭ تار شەڭبەرىنەن شىعىپ، اناعۇرلىم تەرەڭ ءارى ادامي قالىپتاعى قارىم-قاتىناسقا ءتور ۇسىنۋعا ءتيىس.

ءبىز دۇنيەجۇزىلىك دامۋدىڭ جاڭا كەزەڭىنە قادام باستىق. مۇندا ادامدار اراسىنداعى سەنىم، ءبىلىم-تاجىريبەمەن ءبولىسۋ جانە ازاماتتىق قوعامنىڭ ىنتىماقتاستىعى حالىقارالىق قاتىناستاردىڭ جاڭا ىرگەتاسىن قالايدى. سوندىقتان ىقپالداستىقتىڭ اياسىن كەڭەيتە بەرۋىمىز كەرەك.

قازاقستان يدەيانىڭ كەنى، ارااعايىندىق شەشىمدەردىڭ ارحيتەكتورى جانە ءتۇرلى وڭىرلەر مەن مادەنيەتتەردىڭ سەرىكتەسى رەتىندە وسى وزگەرىستەرگە ۇلەس قوسۋعا دايىن.

بۇل فورۋم تىڭ ويلار ايتىلاتىن عانا ەمەس، باتىل قادامدار جاسالاتىن الاڭعا اينالسىن. بارشاڭىزدى مازمۇندى ديالوگ ورناتۋعا شاقىرامىن.

الداعى پىكىرتالاستار قىزىقتى، فورۋم جۇمىسى ناتيجەلى بولۋىنا تىلەكتەستىك بىلدىرەمىن.

راقمەت!"

Abai.kz