شەرزات بولاتتى ءولتىرۋ بويىنشا پروكۋرور ايىپتالۋشىلارعا 23 جىلعا دەيىن باس بوستاندىعىنان ايىرۋدى سۇرادى. بۇل تۋرالى «قازتاگ» جازدى.

دۇيسەنبى كۇنى وتكەن سوتتاعى ءجارىسسوز بارىسىندا پروكۋرور دانا سارسەنباي شەرزات بولاتتى ءولتىردى دەپ ايىپتالعاندارعا كەلەسى مەرزىمدەردى سۇرادى:

ابزال شىناسىل – قك 99-بابى 2-بولىگى (كىسى ءولتىرۋ), 293-باپتىڭ 3-بولىگى (بۇزاقىلىق), 24-باپتىڭ 3-بولىگى (قىلمىسقا دايىندالۋ جانە قىلمىسقا وقتالۋ) – 23 جىل;

راۆيل ساكيەۆ – قك 293-باپتىڭ 3-بولىگى (بۇزاقىلىق), 99-باپتىڭ 2-بولىگى (كىسى ءولتىرۋ), 24-باپتىڭ 3-بولىگى (كىسى ولتىرۋگە وقتالۋ) – 20 جىل;

شىڭعىس بەلعوجاەۆ – قك 293-باپتىڭ 3-بولىگى (بۇزاقىلىق) – 7 جىل;

دارحان اسكەنتاي – قك 293-باپتىڭ 3-بولىگى (بۇزاقىلىق) – 7 جىل;

نۇركياس ءىلياسوۆ – قك 293-باپتىڭ 3-بولىگى (بۇزاقىلىق) – 9 جىل;

نۇربول توقتاۋباەۆ – قك 293-باپتىڭ 3-بولىگى (بۇزاقىلىق) – 7 جىل;

ازامات توقتاۋباەۆ – قك 293-باپتىڭ 3-بولىگى (بۇزاقىلىق), قوسىمشا 188-باپ بويىنشا (ۇرلىق) – 15 جىل;

ديدار قالياحمەت – قك 293-باپتىڭ 3-بولىگى (بۇزاقىلىق) – 7 جىل;

ديدار ىسقاق (كامەلەتكە تولماعان) – قك 434-بابى (اۋىر قىلمىس تۋرالى حابارلاماۋ) – 1 جىل 6 اي باس بوستاندىعىنان ايىرۋ.

ەسكە سالايىق، بىلتىر 4 قازان كۇنى توبەلەستەن 16 جاسار شەرزات قايتىس بولدى، كەيىن اشۋلى تالعارلىقتار ءجاسوسپىرىم ولىمىنە بايلانىستى نارازىلىققا شىقتى.

2024 جىلدىڭ 12 قازانىندا قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

15 قازان كۇنى تالعار قالاسىنىڭ اكىمى باحىت قۋاتبەكۇلى كۇرىشبەكوۆ، تالعار قالاسى اكىمىنىڭ ورىنباسارى ماتان ساعىندىق ءوز مىندەتتەرىن ءتيىستى دەڭگەيدە اتقارماعانى ءۇشىن لاۋازىمدارىنان بوساتىلدى. ارتىنشا، تالعار اۋدانى اكىمى اپپاراتىنىڭ باسشىسى اسلان قاسىمباەۆ قىزمەتىنەن قۋىلدى.

2024 جىلدىڭ جەلتوقسان ايىندا تالعار ماڭىندا شەرزات پولاتتىڭ اعاسى ءولى تابىلدى.

ىشكى ىستەر ءمينيسترى ەرجان سادەنوۆ بۇل ءىستى جەكە باقىلاۋىنا الدى. كەيىن بەلگىلى بولعانداي، بۇل ىسكە بايلانىستى جەتى ادام ەكى ايعا قاماۋعا الىنعان. سونىمەن قاتار، 7 قازاندا مارقۇمنىڭ تۋىستارى تالعار قالاسىندا نارازىلىققا شىققانى حابارلاندى. وسىدان كەيىن مارقۇمنىڭ تۋىستارىنىڭ نارازىلىعىنا بايلانىستى تەكسەرۋ باستالدى. 8 قازاندا بۇل ىستە جاڭا دەرەكتەردىڭ انىقتالعانى تۋرالى حابارلاندى.

12 قازانعا قاراعان ءتۇنى الماتى وبلىسى ەڭبەكشىقازاق اۋدانى ازات اۋىلىندا ءجاسوسپىرىمنىڭ ءۇيى ورتەلدى. پوليتسيا قىلمىستىق ءىس قوزعاپ، شەرزات بولاتتىڭ وتباسىن قورعاۋعا الدى. سونىمەن قاتار، ءورت بولعان كەزدە وتباسى باسقا جەردە تۇرىپ جاتقانى بەلگىلى بولدى. باس پروكۋراتۋرا بۇل جاعدايعا بايلانىستى مالىمدەمە جاساپ، ءورتتى تەرگەۋدى ءوز باقىلاۋىنا الدى. الماتى وبلىسىنىڭ اكىمدىگى ورتەنگەن ءۇيدى قالپىنا كەلتىرۋگە كومەكتەسۋگە ۋادە بەردى.

Abai.kz