.png)
«قولونەر – حالىق رۋحانياتىنىڭ قاينار كوزى»
قازاقتىڭ «ونەر تاۋسىلماس قازىنا، جۇتاماس بايلىق» دەگەن ءسوزى بار. سول بايلىقتىڭ ءبىر تارماعى – قولونەر. بۇل – ۇلتتىڭ رۋحاني بولمىسىن، تاريحي زەردەسىن، تانىمىن بويىنا سىڭىرگەن ەرەكشە ونەر ءتۇرى. قولونەر – كوزبەن كورىپ، قولمەن ۇستايتىن، جۇرەكپەن سەزىلەتىن قۇندىلىق.
سول قۇندىلىقتى بۇگىنگى زاماندا دا كوزدىڭ قاراشىعىنداي ساقتاپ كەلە جاتقان ازاماتتار بار. سولاردىڭ ءبىرى – قۇمكول اۋىلىنىڭ ءتول پەرزەنتى، شەبەر، ۇلتتىق مۇرانى ۇلىقتاۋشى – كىتاتوۆ توقتابەك.
سۋرەت: اۆتور مۇراعاتىنان الىندى.
توقتابەك اعا – جاي عانا شەبەر ەمەس، ءبىر اۋلەتتىڭ عانا ەمەس، ءبۇتىن ءبىر اۋىلدىڭ رۋحاني جۇگىن ارقالاپ جۇرگەن ازامات. ول اعاشتى ورنەكتەپ، تەمىردى كورىكتەپ، اتادان قالعان ونەردى بۇگىنگى ۇرپاققا لايىقتاپ جاڭعىرتىپ كەلەدى. شەبەرحاناسى شاعىن بولعانىمەن، ىشىنەن شىققان ءاربىر بۇيىم – ۇلكەن ەڭبەك پەن جۇرەك جىلۋىنىڭ جەمىسى.
قازىرگى تاڭدا، توقتابەك جاساعان ساندىقتار، توسەكتەر، ورىندىقتار، باسقا دا جاي جيحاز بەن تۇتىنۋ بۇيىمدارى مەن ۇلتتىق ناقىشتاعى ساندىك زاتتار اۋدان كولەمىندە ۇلكەن سۇرانىسقا يە. جەرگىلىكتى تۇرعىندار ونى «قولونەردىڭ سوڭعى ساردارى» دەپ باعالايدى. اكەدەن ميراس بولعان ونەردى جالعاپ، ونى كاسىپكە اينالدىرعان توقتابەك – بۇگىنگى كۇننىڭ ۇلگىسى بولۋعا ابدەن لايىق تۇلعا.
ول قولونەرمەن قاتار، مال شارۋاشىلىعىن دا دوڭگەلەتىپ وتىر. ەكى سالانى قاتار الىپ ءجۇرىپ، اۋىلدىڭ ەكونوميكالىق - مادەني دامۋىنا شىنايى ۇلەس قوسقان ازامات.
توقتابەك شەبەردىڭ سوزىنەن ءۇزىندى:
– قولونەر – ۇلتتىڭ جانى. ءار جاساعان دۇنيەم – اتا-بابادان قالعان اماناتقا دەگەن ادالدىق. بۇل تەك اعاش جونۋ نەمەسە ويۋ-ورنەك سالۋ ەمەس. بۇل – تاريحپەن تىلدەسۋ. كەيدە ءبىر ساندىقتى جاساۋعا نەشەمە كۇندەر مەن تۇندەر كەتەدى، بىراق، سونىڭ ءاربىر شەگەسى – جۇرەكتەن شىققان ءبىر تامشى ەڭبەك. ...شاكىرت تاربيەلەۋ – ەندىگى ارمانىم.
«اۋىل» پارتياسى قولونەردى قولداۋدى ۇلتتىق ساياساتتىڭ ماڭىزدى باعىتتارىنىڭ ءبىرى دەپ بىلەدى.
ۇلتتىق ءداستۇر – رۋحاني تىرەك
ءبىز اتا-بابادان قالعان داستۇرلەردىڭ ۇلتتىق بىرەگەيلىكتى قالىپتاستىرۋداعى ماڭىزىن جاقسى تۇسىنەمىز. قولونەر – سول ءداستۇردىڭ كورىنىسى. ۇلتتىق سانانى ساقتاۋدا ءداستۇر مەن مادەنيەتتى ۇيلەستىرىپ، ۇرپاققا جەتكىزۋ – ءبىزدىڭ باستى ۇستانىمىمىز.
مادەني مۇرا – كەلەشەككە امانات
قازاقتىڭ مادەنيەتىنە ءتان ءاربىر ەلەمەنت – باعا جەتپەس بايلىق. ونى ساقتاۋ، ناسيحاتتاۋ جانە جاڭا فورماتتا ۇسىنۋ – ۋاقىت تالابى. قولونەردى تەك مۇرا ەمەس، قازىرگى نارىققا بەيىمدەلگەن كاسىپ كوزىنە اينالدىرۋ – ماقساتىمىز.
اۋىل كاسىپكەرى – اۋىل تىرەگى
ءبىز اۋىلداعى كاسىپكەرلىكتى دامىتۋ – اۋىلدىڭ الەۋمەتتىك تۇراقتىلىعى مەن مادەني سەرپىلىسىنىڭ نەگىزى دەپ بىلەمىز. بۇل تۇرعىدا، توقتابەك «شەبەر» سىندى ازاماتتارعا قولداۋ كورسەتىپ، ولاردىڭ ەڭبەگىن ەلدىك دەڭگەيدە تانىتۋ – «اۋىل» پارتياسىنىڭ باستى مىندەتتەرىنىڭ ءبىرى.
«ءبىر اۋىل – ءبىر ءونىم» قاعيداتىن ناقتى جۇزەگە اسىرۋ – ءار ءوڭىردىڭ وزىندىك برەندىنە اينالاتىن ءونىم شىعارۋعا مۇمكىندىك بەرەدى.
قۇمكولدەگى توقتابەك شەبەردىڭ بۇيىمدارى – سونىڭ دالەلى. ول اۋىل برەندىنە، رۋحاني نىشانعا اينالىپ وتىر.
قورىتىندى:
قولونەر – توزبايتىن ونەر. ونى ۇلىقتاعان ادام – ۇلتقا قىزمەت ەتكەنمەن تەڭ. توقتابەك قاتارلى ازاماتتار اۋىل رۋحىن ساقتاپ وتىرعان ەڭ نەگىزگى تىرەك تۇلعالار سەبىندە... ءبىز ولاردى قولداپ، ولاردىڭ ەڭبەگىن كەڭىنەن ناسيحاتتاپ، ۇلتتىق برەندكە اينالدىرۋىمىز قاجەت. ويتكەنى ۇلتتىڭ كۇشى – رۋحانياتتا، ال، رۋحانياتتىڭ باستاۋى – حالىقتىڭ ءتول ونەرى – قولونەردە!
ومارعاليەۆ ەرىك قايراتبەكۇلى،
«اۋىل» پارتياسىنىڭ وكىلى
Abai.kz
