ەرمۇرات باپي تۋرالى ءبىر ۇزىك سىر

باسقا بىلمەسە دە، شەتتەن ورالعان اعايىندار وتە جاقسى بىلەدى، ەراعام – ەرمۇرات باپي ەكەۋمىز تيمۋر قۇلىباەۆ پەن كارىم ءماسىموۆتى ويسىراتا جەڭگەن بولاتىنبىز!

2013 جىلى جەلتوقسان ايىندا تيمۋر قۇلىباەۆ پەن كارىم ءماسىموۆتىڭ تىكەلەي ىقپالىمەن شەتتەن ورالعان قانداستارىمىزعا ءتورت جىلسىز ازاماتتىق بەرىلمەيتىن قاتاڭ زاڭ قابىلدانىپ كەتتى.

سول جىلى 15 جەلتوقساندا پرەزيدەنت ول زاڭعا قول قويدى.

بۇكىل قازاق شوك بولدى!

ءوز باسىم يەندە قالعان پاناسىز تورعاي قۇساپ، كوڭىلسىز كۇي كەشتىم!

ۇلتتىق كىتاپحانادا جۇمىس ىستەپ جۇرگەم.

جۇمىستان ءتۇسىپ، ساۋران كوشەسىنىڭ بويىمەن الماتى كوشەسىنە – ۇيگە قاراي اشۋ مەن ىزاعا بۋلىعىپ كەتىپ بارا جاتقام.

كەنەت ويىما قىزاي انام تۇسە كەتتى. ار جاعىنان قاسيەتىڭنەن اينالايىن بايدىبەك بابامنىڭ سۇلباسى كورىندى...

ءيا، مەن قىزايدىڭ ۇرپاعىمىن.

نۇرسۇلتان ءابىشۇلى – بايدىبەك ءبيدىڭ ۇرپاعى.

مەن بايدىبەكتىڭ قىزىنان – قىزايدان تۋسام، نۇرەكەڭ ۇلىنان – شاپىراشتىدان تۋعان.

قازاقى جولمەن ءجون سۇراسساق، نۇرسۇلتان نازارباەۆ – مەنىڭ تۋعان ناعاشىم.

اناۋ «مۇرتقا» قاراعاندا، مەن وعان الدەقايدا جاقىنمىن، مەن ونىڭ تۋعان جيەنىمىن!..

بولدى!

ماسەلە شەشىلدى...

وسىعان دەيىن اقورداعا قاراتىپ ايتىلماعان ءسوز قالعان جوق. جالىنىپ-جالبارىنۋ، استى-ۇستىنە ءتۇسىپ قولپاشتاۋ، اي مەن كۇنگە تەڭەپ ماقتاۋ – ءبارى-ءبارى ايتىلدى. ەندى، وسى جاعىنان – بايدىبەك بابام مەن قىزاي انامنىڭ ارۋاعىن العا تارتىپ، جيەندىگىمدى بۇلداپ، ءبىر ءسوز سالىپ كورۋ عانا قالعان...

پانا تۇتىپ، بىردەن ەراعاما – ەرمۇرات باپيعا تەلەفون شالدىم.

– ەراعا، اسسالاۋماعالايكۋم!

– ۋاعالايكۋماسسالام، اۋىتجان، قالايسىڭ؟

– قۇداي دەپ، ەراعا. ەراعا، مەن ەلباسىنا «اشىق حات» جازايىن دەپ بەكىدىم. قيسىنىن دا تاپتىم...

– اۋىتجان، وتە جاقسى بولدى. اينالايىن، سول «اشىق حاتىڭدى» بىردەن «دات-قا» بەرشى. الدىمەن ءبىز باسايىق. سودان كەيىن سايتتارعا بەرە بەر، جاراي ما؟!

بايقايمىن، ەرمۇرات اعا «اشىق حاتىمدى» «Abai.kz» پورتالىنا بەرىپ قويا ما دەپ، الاڭداپ تۇرعان سەكىلدى. وسىعان دەيىن ءبىراز ماقالامدى «Abai.kz-تەن» الىپ، «دات-قا» باسىپ كەلگەنى بار. جوق، بۇل جولى مەن دە سايتقا ەمەس، الدىمەن گازەتكە باستىرعاندى ءجون كورىپ:

– جارايدى، ەراعا، بىردەن سىزگە جىبەرەم!

– كەلىستىك وندا! اياما، اۋىتجان!..

ۇيگە كەلدىم دە، كومپيۋتەرگە وتىردىم. «ناعاشىما حات» دەگەن تاقىرىپ قويدىم دا، ساقىلداتىپ جازۋعا كىرىستىم.

ول كەزدە ۇلتتىق اكادەميالىق كىتاپحانادا جۇمىس ىستەپ جۇرگەم. 78 مىڭ تەڭگە ايلىق الام، 80 مىڭ پاتەرگە تولەيمىن. جولداسىم جۇمىسسىز. ارقالىق قالاسىنان وقۋىن ءبىتىرىپ، استاناعا كوشىپ كەلگەن اۋىلداس ءىنىم، كەزىندەگى وقۋشىم، ايتىسكەر اقىن ازامات مالجانبايدى وتباسىمەن جالداپ وتىرعان ءبىر بولمەلى پاتەرىمىزگە كىرگىزىپ العامىز. پاتەراقىنىڭ ءبىر جاعىنان شىعىسسىن دەگەن ءتۇرىمىز عوي.

ازامات پەن نۇرشاش، ەكى كىشكەنەسىمەن – ءبارىمىز التى جان بولىپ، اياداي پاتەردە بىرگە تۇرىپ جاتتىق.

اس بولمەدەگى توقال ورىندىققا نوۋتبۋگىمدى قويىپ الىپ، جەردە وتىرىپ، تۇنىمەن جازۋ جازامىن.

جولداسىم گۇلبايان قاسىمداعى ەسكى ديۆاندا ۇيىقتاپ جاتادى.

«ۇلكەن» بولمەدە انالار...

قالاي جان باعىپ ءجۇرمىن، ونىمەن شارۋام جوق!

ەسىل-دەرتىم ەلباسىنىڭ موينىن بەرى بۇرىپ، قۇردىمعا كەتىپ بارا جاتقان ۇلى كوشتى ارناسىنا قايتا سالۋ...

ارادا ەكى-ءۇش كۇن ءوتتى.

ماقالانىڭ قاڭقاسىن ءبىتىرىپ، وڭدەپ، جاقسىلاپ تۇرىپ تۇزدىقتاپ جاتقان كەزىم بولاتىن.

ەراعا ءوزى تەلەفون سوقتى.

– اۋىتجان، حال قالاي؟

– اسسالاۋماعالايكۋم، ەراعا!

– ماقالاڭدى جازىپ بولدىڭ با؟

– نەگىزى بولىپ قالدى. ۇستىنەن ءبىر قاراپ شىعۋىم كەرەك. ەراعا، بىراق كولەمى ءسال ۇزارىپ كەتتى...

– اۋىتجان، ماقالاڭ جاقسى بولسا، كولەمنەن قورىقپا! گازەتتىڭ بەتى جەتەدى. قانداستاردان ايايتىن ەشتەڭەمىز جوق! تەك، باسقا بىرەۋگە بەرىپ قويما! بىردەن وزىمە جىبەر، جاراي ما؟!

قۋ ءىشىم سەزىپ تۇر، ەراعا «Abai.kz-كە» بەرىپ قويا ما دەپ، الاڭداپ تۇرعان سەكىلدى.

جوق، بۇل جولى بۇل ماقالامدى ءسوزسىز «دات-قا» باستىرام. «دات» – جۇرت ىزدەپ ءجۇرىپ وقيتىن، تارالىمى وتە كوپ، داڭقتى گازەت. ونىڭ ۇستىنە، مەن ۇلتتىڭ تاعدىرىن شەشەتىن، قۇلىباەۆ پەن ءماسىموۆتىڭ جولىن كەسەتىن تاريحي ماڭىزعا يە ماقالا جازىپ جاتىرمىن. ول تاسقا باسىلىپ، تاريحقا قالۋى كەرەك!

– جارايدى، ەراعا! جازىپ بولا سالىپ، وزىڭىزگە جىبەرەم...

شاماسى، ءتورت كۇننىڭ ىشىندە ماقالا جازىلىپ بولدى. تاۋەلسىزدىك مەرەكەسى ءوتىپ، قايتادان جۇمىسقا شىقتىق.

قۇستاي ۇشىپ كىتاپحاناعا جەتتىم. ءالى ەسىمدە، سارسەبى كۇنى بولاتىن. «يا، بيسميللياحي راحماني راحيم! ءبىر اللا، ءوزىڭ قولداي كور!» دەپ، ءدال ساعات وننىڭ مولشەرىندە لىقسىعان ون التى بەتتەن تۇراتىن «ناعاشىما حاتتى» «دات-قا» جىبەردىم دە، ەراعاما تەلەفون شالىپ، ەسكەرتىپ قويدىم.

قولىم جۇمىسقا بارمايدى. سەندەلىپ، ارى ءجۇردىم، بەرى ءجۇردىم. ءتۇس بولدى. ءتۇس اۋدى. ەراعام جاقتان ەش حابار جوق....

اقىرى شادامىم تاۋسىلىپ، تۇستەن كەيىنگى ساعات بەستەن وتە بەرگەندە ءوزىم تەلەفون سوقتىم.

– ەراعا، اسسالاۋماعالايكۋم!

– اليكىسالام، اۋىتجان! ماقالاڭ، بۇيىرسا، ەرتەڭگى نومەرگە كەتىپ بارادى. ءبىر ءارىبىن قىسقارتقام جوق. تۇپ-تۋرا ءتورت بەت بولدى. سەنەسىڭ بە، وقىپ وتىرىپ، ءۇش جەرىندە كوزىمە جاس الدىم. اناۋ ناعاشىڭنىڭ بۇرعان جۇرەگى جىبىمەسە، بىلمەيمىن ەندى...

– و، ەراعا، قۇداي تىلەۋىڭىزدى بەرسىن! اعا، ماعان ءبىر ونشاقتى گازەت بەرىپ جىبەرەسىز بە؟

– ونشاقتىڭ نە، ەلۋ گازەت جىبەرەم. نەگىزگى باسشىلاردىڭ بارىنە تارات!

قاراسام، يەگىم كەمسەڭدەپ، كوزىمە جاس تىعىلىپ، داۋىسىم دىرىلدەپ بارادى ەكەن.

– جارايدى، ەراعا، راحمەت سىزگە...

وسى ءسوزدى تىستەنىپ تۇرىپ زورعا ايتتىم دا، تەلەفوندى ءوشىردىم. بولمەمنىڭ ەسىگىن جاۋىپ الىپ، ال كەلىپ جىلا! وكىرىپ تۇرىپ، ەكى ءبۇيىرىم سولقىلداپ تۇرىپ، ءبىر جىلادىم دەيسىڭ! اكەم مۇقيبەك ولگەندە دە مۇنداي جىلاماعان شىعارمىن. قىستىعىپ، پورا-پورا بولىپ جىلادىم-اۋ ءبىر...

شاماسى، ءبىر ساعات وتكەن بولسا كەرەك. ءوزىمدى زورعا جۇباتىپ، سولىعىمدى باسىپ، ۇيگە ءىلبىپ، ارەڭ جەتتىم.

ەكى كوزىم بىلەۋدەي بولىپ كەتسە كەرەك، گۇلبايان شوشىپ كەتتى.

بولعان قۋانىشتى جاعدايدى بايانداپ، جىلاعانىمدى ايتىپ، كۇلدىم.

بۇل ەندى قۋانىشتىڭ كۇلكىسى بولاتىن...

ەرتەسىنەن باستاپ، ءتۇس-تۇستان تولاسسىز تەلەفوندار كەلە باستادى. ءبارى «ناعاشىما حاتتى» وقىعانىن ايتىپ، القاپ جاتىر. «بايقاشى!» دەپ، جانى اشىعاندار دا بولدى. كوپ كەشىكپەي، ەراعامنان ەلۋ گازەت تە كەلىپ جەتتى.

سول كەزدەگى پرەزيدەنت كەڭسەسىنىڭ باسشىسى، قازاقتىڭ ارداقتى ۇلى ماحمۇد قاسىمبەكوۆ اعامىزدىڭ اتىنا اتالعان «اشىق حاتتى» ەلباسىنا جەتكىزىپ بەرۋدى ءوتىنىپ، سىپايىلاپ حات جازىپ، دايىنداپ قويعام.

گازەتتىڭ ءبىر نۇسقاسىن قوسىپ، سول حاتتى اقورداعا پوچتا قىزمەتى ارقىلى سالدىم دا جىبەردىم.

ءبىر اپتا وتكەن جوق، اقوردادان تەلەفون كەلدى.

ءوزىن «ءابدىمۇتال الىبەكوۆ» دەپ تانىستىرعان اعامىز ماحمۇد بازارقۇلۇلىنىڭ تاپسىرماسىمەن حابارلاسىپ تۇرعانىن، ماحاڭنىڭ «ناعاشىما حاتتى» ەلباسىنا جەتكىزگەنىن، ونى نۇرسۇلتان ءابىشۇلىنىڭ وقىعانىن جەتكىزدى.

– ءابدىمۇتال اعا، جاقسى حابارىڭىز ءۇشىن سىزگە ۇلكەن راحمەت! سوندا، ەلباسى مەنىڭ «ناعاشىما حات» دەگەن «اشىق حاتىمدى» وقىدى ما؟

– ءيا، ەلباسى وقىدى. سونى سىزگە ايتايىن دەپ، تەلەفون شالىپ تۇرمىن عوي. ماحمۇد بازارقۇلۇلى الىپ كىرىپ، وقىتتى...

– ەدى ارى قاراي نە بولادى؟!

– ونى ايتا المايمىن، اۋىت مۇقيبەكۇلى. ماعان تەك حاتىڭىزدى ەلباسىنىڭ وقىعان جەتكىزۋدى عانا تاپسىرعان. ودان ارتىق ەشتەڭە ايتا المايمىن...

– ءابدىمۇتال اعا، وسىعان دا قۇدايعا تاۋبە! سىزگە كوپ راحمەت! ماحمۇد اعامىزعا مەنەن سالەم ايتىڭىز، ول كىسىگە دە العىسىم شەكسىز!

– راحمەت سىزگە دە! مىندەتتى تۇردە ايتام! ساۋ بولىڭىز!

ا، قۇداي!

«ناعاشىما حات» ناعاشىما جەتتى!

دەرەۋ ەرمۇرات باپيعا تەلەفون سوقتىم.

ءسۇيىنشى سۇراپ، بولعان جاعدايدى قۋانا-قۋانا جەتكىزدىم.

– اۋىتجان، وتە جاقسى بولعان ەكەن. سەن قانداستارىڭنىڭ الدىنداعى ازاماتتىق پارىزىڭدى وتەدىڭ. ەندى ءبارى جاقسى بولادى. قۇتتى بولسىن!

– ەراعا-وۋ، سىزگە راحمەت! ءسىز دە ۇلتىڭىزدىڭ الدىنداعى جىگىتتىك مىندەتىڭىزدى تاعى ءبىر مارتە ارتىعىمەن ورىندادىڭىز! سىزگە ريزامىن!

– اۋىتجان، راحمەت! امان بولايىق!

ەندى داۋرەن قۋات دوسىما تەلەفون سوعىپ، بولعان جاعدايدى تاعى قايتالاپ، ودان دا ءسۇيىنشى سۇرادىم.

– اۋكە، كەرەمەت بولعان ەكەن! قۇتتىقتايمىن! بىلاي ىستەيىك، «ناعاشىما حات» ناعاشىمنىڭ قولىنا ءتيىپتى...» دەگەن اتپەن دەرەۋ ءبىر سۇحبات جاساپ جىبەرەيىك...

ول سۇحباتتى دا جاساپ، «Abai.kz» پورتالىنا جاريالادىق...،

ەراعامنىڭ سول قامقورلىعى مەن داۋرەن قۋاتتىڭ ۇشقىرلىعى – ەسىمنەن ءبىر كەتكەن ەمەس!..

كۇندەر ءوتىپ جاتتى. جاڭا جىلدى وتە كوڭىلدى وتكىزدىك.

اقپان ايىنىڭ باسىندا تاعى دا اقوردادان تەلەفون كەلدى. جاڭىلماسام، سەرىك ساعىنوۆ دەگەن جىگىت حابارلاسىپ، پرەزيدەنت كەڭسەسىنىڭ باسشىسى ماحمۇد قاسىمبەكوۆ اعامىزدىڭ قابىلدايتىنىن ايتتى.

12 اقپاندا اقورداعا ماحمۇد بازارقۇلۇلىنىڭ قابىلداۋىنا باردىم.

ماحاڭ ماعان «ناعاشىما حاتتى» نۇرسۇلتان ءابىشۇلىنىڭ تۇگەل وقىعانىن ادەمىلەپ تۇرىپ ايتىپ بەردى. ەڭ كەرەمەتى، ەلباسىنىڭ ءتورت جىلسىز ازاماتتىق بەرىلمەيتىن ەتىپ قابىلدانعان بىلتىرعى قاتاڭ زاڭدى قايتا قالپىنا كەلتىرۋ تۋرالى شەشىم قابىلداعانىن جەتكىزدى. سوسىن، وزىمە العىسىن ايتىپ، كەرەمەت قولتاڭباسى جازىلعان ەلباسى تۋرالى كىتابىن سىيلادى!

ءسۇيىنشى سۇراۋدىڭ كوكسى ەندى باستالدى.

قۋانعانىم سونشالىق، مىنا جاڭالىقتى ايتىپ، ءوزىم تانيتىن قازاققا تۇگەل زۆونداعان شىعارمىن؟!

كوپ ۋاقىت وتكەن جوق، بەس اي، جيىرما ءتورت كۇن وتكەندە، تۇڭعىش پرەزيدەنت نۇرسۇلتان نازارباەۆ كوشى-قون ءۇردىسىن رەتتەۋگە ارنالعان زاڭ جوباسىن قايتا قاراۋ، قانداستارىمىزعا ازاماتتىقتى ءتورت جىل ەمەس، بۇرىنعى جەڭىلدەتىلگەن تارتىپپەن ءۇش ايدىڭ ىشىندە بەرۋ تۋرالى تاريحي شەشىم قابىلداپ، جارلىق شىعاردى.

ارادا ءبىر جىل وتە شىقتى.

2015 جىلدىڭ باسىنان باستاپ، ماجىلىستە كوشى-قون ءۇردىسىن رەتتەۋگە ارنالعان زاڭ جوباسى قايتا قارالدى.

گۇلنار سۇلەيمەنقىزى سەيتماعانبەتوۆا اپكەم باسقارعان جۇمىس توبىنا باستان-اقىر قاتىسىپ، كوپ ۇسىنىستار بەردىم. تالقىلاۋ توعىز ايعا سوزىلدى.

جۇمىس توبى بارىن سالدى.

ازاماتتىق بەرۋ ءتارتىبى باياعى قالپىنا كەلۋمەن بىرگە، اتالعان زاڭعا تاعى دا بىرقىدىرۋ ەلەۋلى تولىقتىرۋلار مەن وزگەرتۋلەر ەنگىزىلدى...

ءسويتىپ، ەراعاڭ ەكەۋمىز تيمۋر قۇلىباەۆ پەن كارىم ءماسىموۆتى ويسىراتا جەڭىپ، ۇلى كوشكە ەكىنشى بەتتەمەستاي قىلعان بولاتىنبىز!

سويتسەك، ماسەلە وتە كۇردەلى ەكەن. ءبارىن كەيىن – سول زاڭ جوباسى ماجىلىستە تالقىلانىپ جاتقان كەزدە بىلدىك قوي، جاعداي بىلاي بولىپتى:

تيمۋر قۇلىباەۆتىڭ جاڭاوزەن مۇنايشىلارىنىڭ ەرەۋىلىن ۇيىمداستىرعان – «ورالماندار» دەپ، اشىق ەفيردەن ايتقانى بەلگىلى.

سول قۇلىباەۆتىڭ جالاسىنان كەيىن ۇلى كوشتى توقتۋدىڭ شارۋاسى باستالعان.

قاتاڭداتىلعان زاڭ جوباسى پارلامەنتكە كەلگەندە، وعان ءبىراز سەناتورلاردىڭ قارسى شىققانىن دا تەلەارنادان كوردىك.

سويتسەك، ۇكىمەتباسى كارىم ءماسىموۆ سەگىز بەتتەن تۇراتىن «ورالماندار» تۋرالى قارالاۋ حاتىن جازىپ، زاڭدى قاتاڭداتۋ تۋرالى ەلباسىنا ۇسىنىس جاساعان جانە ول ۇسىنىسىن نۇرسۇلتان ءابىشۇلىنا ماقۇلداتىپ العان. ەلباسى ءماسىموۆتىڭ ۇسىنىسىنا «كەلىسەمىن!» دەپ، بۇرىشتاما جازىپ، قولىن قويىپ بەرگەن.

ءماجىلىستىڭ دە ءبىراز دەپۋتاتتارى قاتاڭ زاڭعا قارسى داۋىس بەرۋگە دايىندالىپ جاتقاندا، كارىم ءماسىموۆتىڭ زىڭگىتتەي-زىڭگىتتەي ەكى جىگىتى پارلامەنت ۇيىنە كەلىپ، ماناعى ەلباسى كەلىسىم بەرگەن ءماسىموۆتىڭ ۇسىنىسىن ولارعا كورسەتىپ، كادىمگىدەي قىسىم جاساعان. قولداپ داۋىس بەرمەسە، باسقاشا بولاتىنىن ايتىپ قورقىتقان...

سودان ءماجىلىستىڭ ول دەپۋتاتتارى دا امالسىزدان ءتورت جىلسىز ازاماتتىق بەرىلمەيتىن قاتاڭ زاڭدى قولداپ، داۋىس بەرۋگە ءماجبۇر بولعان.

بۇل تۋرالى مەنى جەكە-جەكە شاقىرىپ الىپ، سول كەزدەگى دەپۋتات الدان سمايىل اعا مەن  گۇلنار سەيتماعانبەتوۆا اپايىم ايتىپ بەردى.

ءدال وسىنداي اقپاراتتى ماعان قازاقتىڭ كورنەكتى اقىنى، سول كەزدەگى مەملەكەتتىك حاتشىنىڭ كومەكشىسى وتەگەن ورالباەۆ اعامىز دا ايتتى...

قۇداي قولداپ، «ناعاشىما حاتتى» وقىعان سوڭ، نۇرسۇلتان ءابىشۇلى بىردەن ەسىن جيىپ، انا ەكەۋگە سەنىپ، دۇرىس شەشىم شىعارماعانىن بىلگەن.

ايتا كورمەڭىز، ول – تيمۋر قۇلىباەۆ پەن كارىم ءماسىموۆتىڭ ايى وڭىنان تۋىپ تۇرعان ءبىر كەز ەدى عوي.

زامانبەك نۇرقادىلوۆ پەن التىنبەك سارسەنباەۆ وققا ۇشىپ، ءاي دەيتىن «اجە» مەن قوي دەيتىن «قوجادان» قۇتىلعان; جاڭاوزەن ەرەۋىلشىلەرىن قانعا بوكتىرگەن; «ۇلتتىق كاسىپكەرلەر پالاتاسى» تۋرالى زاڭدى قابىلداتىپ الىپ، ەندى شەتتەن اعىلىپ جاتقان ۇلى كوشتى توقتاتۋعا كوشكەن-تۇعىن.

قىسقاسى، ەكەۋدىڭ قۇداي ەمەس، قۇدايدان بىلاي دا ەمەس بولىپ، ەكى يىندەرىنەن دەم الىپ تۇرعان شاعى!

سوعان قاراماستان، ءبىز ەرمۇرات باپي اعامىز ەكەۋمىز جالعىز قول، جالاڭ قىلىش – «دات-پەن» ارىستانداي ايباتتى كارىم ءماسىموۆ پەن الەمدىك دەڭگەيدەگى الپاۋىت تيمۋر قۇلىباەۆتىڭ اۋىزدارىن اڭقيتىپ، باستارىن تۋالەتكە تىعىپ تۇرىپ، ۇلى كوشكە قايتىپ بەتتەمەستەي ەتىپ وسىلاي جەڭگەنبىز!

داۋ جوق، نۇرسۇلتان نازارباەۆ قىزمەتىنىڭ باسىن وتە جاقسى باستادى. بىراق، وتىز جىلدىق پرەزيدەنتتىك مەرزىمىنىڭ سوڭعى جارىمىندا بارلىق سالادا قاتەلىك جىبەردى. مەنىڭ ويىمشا، ونى وسىنداي كۇيگە تۇسىرگەن ءوزىنىڭ اينالاسىنداعى ات توبەلىندەي توپ. ول توپتىڭ باستى اتاماندارى – تيمۋر قۇلىباەۆ پەن كارىم ءماسىموۆ!

شىن مانىندە، ءبىز بۇل ەكەۋدى جەڭىپ قانا قويعان جوقپىز، تۇڭعىش پرەزيدەنتتى دە تاعى ءبىر بىلىققا باتىپ بارا جاتقان جەرىنەن قۇتقارىپ قالدىق.

باسقاسىن بىلمەيمىن، قازىرگى تاڭدا دا، بولاشاقتا دا ۇلى كوشكە مۇددەلى قاۋىمنىڭ الدىندا نۇرسۇلتان نازارباەۆ ەڭبەگى زور، بەتى جارىق تۇلعا رەتىندە قالا بەرەدى!

ءبىز نۇراعانىڭ شەكارا سىرتىندا قالعان قازاقتار ءۇشىن جاساعان تاريحي شەشىمدەرى مەن زور قامقورلىعىن ءومىرى ۇمىتپايمىز! ۇنەمى وسىلاي ساعىنىشپەن ەسكە الىپ، دارىپتەپ وتىرامىز!

ودان بەرى دە، مىنە، ونشاقتى جىل ءوتىپتى.

ال، انا ەكەۋگە كەلسەك، ءوز باسىم ولارمەن بولعان تىكە كۇرەسىم وسىمەن اياتالدى دەپ جۇرگەم.

جوق، ءالى اياقتالماپتى!

ەندى بۇلاردىڭ ۋزۋرپاتسياسىنىڭ تامىرىن قىرقۋ كەرەك بولدى.

سول ماسەلەنى كوتەرۋ، ارى قاراي جالعاستىرۋ ميسسياسىن تاعدىر مەنىڭ ماڭدايىما جازعان سەكىلدى.

مىنە، سول كۇرەستى باستادىم.

ولاردىڭ كومەسكى جولمان مەملەكەتتى بيلەۋ جانە بار بايلىقتى توناۋ ءۇشىن قۇرعان سحەماسىنىڭ سىرىن اشىپ، وتكەن جىلى «قازاقستان – ۋزۋرپاتسيالانعان مەملەكەت» دەگەن كولەمدى ماقالا جازعام. بيىل «ەراعا، بۇل – «جاڭا ۋزرۋپاتسيا!» دەگەن اتپەن ەرمۇرات باپي اعامىزدىڭ اتىنا جازىلعان «اشىق حاتپەن» سول كۇرەستى قايتا جالعادىم.

بۇكىل دۇنيەجۇزى بىلەدى، بۇل ەكەۋ وڭاي ادامدار ەمەس!

شىنىمدى ايتسام، مەن تيمۋر قۇلىباەۆ پەن كارىم ءماسىموۆتىڭ ءبىلىمى مەن ايلاسىنا تاڭ قالدىم!

ناقتىلاپ ايتسام، بۇل ەكى جىگىتكە قول قويدىم!

كونستيتۋتسيانىڭ 5-بابىنىڭ كوزىن باقىرايتىپ قويىپ، قوعامدىق بىرلەستىككە نەمەسە كوممەرتسيالىق ەمەس ۇيىمعا ارناۋلى زاڭمەن ەرەكشە قۇقىقتار مەن قۇزىرەتتەر بەرگىزىپ، سول ارقىلى اتقارۋشى بيلىك پەن زاڭ شىعارۋشى جانە قۇقىق قورعاۋ ورگاندارىن قۋىرشاققا اينالدىرىپ قويىپ، جەرىنىڭ استى مەن ءۇستى قىمبات باعالى تابيعي بايلىققا لىقسىپ تۇرعان ءبۇتىن ءبىر الىپ مەملەكەتتى «كومەسكى» جولمەن ۇرشىقشا ءيىرىپ، ۋىسىندا ۇستاۋ، ءسويتىپ از عانا ۋاقىتتىڭ ىشىندە مەملەكەت بايلىعىنىڭ تەڭ جارىمىن وزدەرىنىڭ قالتالارىنا باسۋ – بۇل جاي نارسە ەمەس!

ءبارى جان-جاقتى قاراستىرىلىپ، مۇقيات زەردەلەنىپ، اسقان شەبەرلىكپەن وتە ساۋاتتى جاسالعان.

بىلاي قاراعاندا، كاسىپكەرلەردىڭ مۇددەسىن قورعاپ، جارىلقاپ جاتقانداي كورىنەدى.

ال، ءىس جۇزىندە ناعىز ۋزۋرپاتسيا! جانە ونىڭ ەرمۇرات باپي اعامىز ايتقانداي، كلاسسيكالىق ءتۇرى ەمەس، جاڭا فورماسى…

تاڭ قالاتىن جاعداي!

بۇكىل ۇلت بولىپ، مەملەكەت بولىپ ويلاناتىن ماسەلە!

ءبىزدىڭ ەرەكەڭ – ەرلان قارين مىرزا ءوزى باس بولىپ 2022 جىلعى «ساياسي رەفورمانىڭ» جوباسىن جاساعان كەزدە: «وسى تيمۋر قۇلىباەۆ پەن كارىم ءماسىموۆ ورمەكشىنىڭ تورىنداي ەتىپ، اسا شەبەرلىكپەن جاساعان مەملەكەتتى توناۋ سحەماسىنا ءبىزدىڭ مىنا جاساپ جاتقان كونستيتۋتسيالىق رەفورمامىز توتەپ بەرە الا ما، جوق پا؟» دەگەندى ءبىر ويلانىپ كوردى مە ەكەن دەشى؟!

ەگەر، بۇل ەكەۋ – تيمۋر قۇلىباەۆ پەن كارىم ءماسىموۆ وسى ءبىلىمى مەن ايلاسىن اناداي ارامدىققا ەمەس، حالقى مەن مەملەكەتىنە ادالدىقپەن جۇمساعاندا، ءبىزدىڭ قازاقستان، تۇڭعىش پرەزيدەنت نۇرسۇلتان نازارباەۆ ايتقانداي، باياعىدا ازيانىڭ بارىسى بولىپ اقىرىپ تۇرادى ەكەن…

سونىمەن، بەلدى بەكەم بۋىپ، ەندى ەكەۋدىڭ ۋزۋرپاتسياسىنا قارسى كۇرەستى باستادىق!

ماقسات - «قازاقستان رەسپۋبليكاسىنىڭ ۇلتتىق كاسىپكەرلەر پالاتاسى تۋرالى» زاڭىنىڭ كۇشىن جويىپ، قولدانىستاعى بارلىق زاڭدار مەن نورماتيۆتىك قۇجاتتاردى ۇلتتىق كاسىپكەرلەر پالاتاسىنان زالالسىزداندىرۋ!

ءسويتىپ، تيمۋر قۇلىباەۆ پەن كارىم ءماسىموۆتىڭ ۋزۋرپاتسياسىن تالقانداۋ!

قۇدايعا شۇكىر، قازىر كارىم ءماسىموۆ تۇرمەدە وتىر.

تيمۋر قۇلىباەۆ «اتامەكەن» قر ۇكپ-داعى باسشىلىق قىزمەتىنەن شەتتەلىلىپ، اكتيۆتەرىن مەملەكەتكە قايتارۋ ۇستىندە.

ەكەۋىنىڭ دە باسىنان باعى تايعان...

كەرىسىنشە، ەرمۇرات باپي – بۇگىندە ارىستانداي اقىرعان دەپۋتات. «دات-تىڭ» داۋىسى باسەڭ تارتقانىمەن، ەراعاڭنىڭ ەكپىنى ۇدەمەسە، كەمىگەن جوق!

مەن «اشىق حاتتى» ەراعاڭنىڭ اتىنا بوستان-بوسقا جازعان جوقپىن. ازۋىن ايعا بىلەگەن نازارباەۆپەن وتىز جىلعا جۋىق جۇلقىسقان  جولبارىس باسىنان باعى تايعان قۇلىباەۆتىڭ الدىندا مىسىق بولىپ قالادى دەگەنگە كىم سەنەدى!؟

بۇل جولعى سۇيەنەرىم دە – ءبىرىنشى قۇداي، ەكىنشى تاعى دا ەرمۇرات باپي!

ەرەكەڭ بۇگىن دە جالعىز ەمەس، اينالاسى تولعان ءوزى سەكىلدى تۇلعالار!

ەدىل جاڭبىرشين، سامات مۇساباەۆ، مارات باشيموۆ، ەربولات ساتىبالدين، قازىبەك يسا، بولاتبەك ناجدمەتدينۇلى، مۇرات ابەنوۆ، باقىتجان بازاربەك، ابزال قۇسپان، ەرلان سايروۆ، ءادىل جۇبانوۆ، ەلنۇر بەيسەمباەۆ، ءۇنزيلا شاپاق، امانجول ءالتاي باستاعان جاسامىستار مەن جۇلدىز سۇلەيمەنوۆا، اسحات ايماعامبەتوۆ، ررينات زايىت، بولات كەرىمبەك، اناس باققوجاەۆ، جاناربەك ءاشىمجانوۆ، ماقسات تولىقباي، نارتاي سارسەنعاليەۆ، باتىرحان ونباەۆ سەكىلدى جاس پەرىلەر.

شەتىنەن سەن تۇر، مەن اتايىنداردىڭ ءوزى!

جوعارى لاۋازىمدى قىزمەتتەر اتقاندارى دا، كاسىبي زاڭگەرلەرى دە، ەرەكەڭ سەكىلدى ەسكى جۇيەنىڭ ادىلەتسىزدىگىمەن كۇرەسكەندەر دە بار.

ەڭ باستىسى، بۇل كىسىلەردىڭ ءبارى ەسكى جۇيەنىڭ قىرى مەن سىرىن وتە جاقسى بىلەدى!

سوندىقتان، قاي-قايسى دا انا ەكەۋدى ءتۇتىپ جەۋگە، بەتىن تىرناۋعا دايىن قاسقىرلار!

بىراق، ولار انا ەكەۋدى قالاي تۇقىرتۋدىڭ جولىن بىلمەي، كەيبىرەۋى بىلسە دە «بالەسىنەن اۋلاق!» دەپ، جولاڭقىراماي، وقتارىن سانالى-ساناسىز تۇردە دالاعا اتۋمەن، بوسقا ارامتەر بولۋمەن كەلەدى.

مىنە، ەكەۋدى تۇقىرتۋدىڭ بىردەن-ءبىر جولى – «قازاقستان رەسپۋبليكاسىنىڭ ۇلتتىق كاسىپكەرلەر پالاتاسى تۋرالى» زاڭىنىڭ كۇشىن جويىپ، قولدانىستاعى بارلىق زاڭدار مەن نورماتيۆتىك قۇجاتتاردى ۇلتتىق كاسىپكەرلەر پالاتاسىنان زالالسىزداندىرۋ!

اتالعان زاڭنىڭ كوزى جويىلسا، بىتكەن ەسكى بيلىكتىڭ تامىرى قيىلادى!

ارينە، بۇل ءۇشىن ساياسي شەشىم كەرەك!

ۇكىمەتكە ساياسي شەشىم قابىلداتۋ ءۇشىن، ەراعاڭ باستاعان وسى دەپۋتاتتاردىڭ باستاماسى قاجەت!

ءيا،  مەن كورىپ وتىرمىن، ەدىل جاڭبىرشين، ەربولات ساتىبالدين سەكىلدى وتە بىلىكتى، اسا ىقپالدى دەپۋتاتتار تابانداپ وتىرىپ، ءبىردى-ەكىلى زاڭنان ۇلتتىق كاسىپكەرلەر پالاتاسىنىڭ فۋنكتسيالارىن الدىرىپ تاستادى.

بەينەلەپ ايتساق، ۇلتتىق كاسىپكەرلەر پالاتاسى – بيت پەن سىركە، ال ءبىزدىڭ قولدانىستاعى زاڭدار مەن نورماتيۆتىك قۇجاتتار بيتتەپ كەتكەن باستىڭ ءدال ءوزى!

ول ءبيتتى ءار شاشتىڭ تۇبىنەن تەرىپ وتىرۋ – قيامەت!

«بيت بىلگەنشە، سىركە بۇتقا سيگەنشە جەيدى!» دەگەن ماقال بار.

ونىڭ ۇستىنە، ەدىل جاڭبىرشين مەن ەربولات ساتىبالدين سەكىلدى دەپۋتاتتار كەلەرگى شاقىرىمداردا بولا ما، جوق پا، - ونى ءبىر قۇدايدىڭ ءوزى بىلەدى.

سوندىقتان، تىر-تىر قاسىپ وتىرعانشا، اناۋ قانسورعىش بيت پەن سىركەدەن قۇلانتازا قۇتىلۋ ءۇشىن، شاشتى ءبىر جولدا ۇستارمەن تاپ-تاقىر قىپ، بىراق قىرىپ تاستاعان دۇرىس!

ناقتىلاپ ايتساق، «ۇلتتىق كاسىپكەرلەر پالاتاسى تۋرالى» زاڭىنىڭ كۇشىن جويىپ، قولدانىستاعى زاڭدار مەن نورماتيۆتىك قۇجاتتاردى ۇكپ-دان تۇگەل زالالسىزداندىرۋ – كەزەك كۇتتىرمەيتىن اسا ماڭىزدى ماسەلە!

ونى ەشقاشان كەلەسى بۋىننىڭ ەنشىسىنە قالدىرۋعا بولمايدى!

مەن ەلىمىزدى ونداعان جىلدار بويى وراسان زور داعدارىسقا ۇشىراتقان وسىناۋ كۇردەلى ساياسي ماسەلەنىڭ «ادىلەتتى قازاقستاننىڭ» ەراعام تورىندە وتىرعان ءبىرىنشى شاقىرىلىم دەپۋتاتتارىنىڭ قولىمەن شەشىلگەنىن قالايمىن!

وتىز جىلعا جۋىق ادىلەتسىزدىكپەن ىمىراسىز كۇرەسكەن ەرمۇرات باپي جانە ونىڭ مەن اتىن اتاعان ساپتاستارى قۇلىباەۆ پەن ءماسىموۆ ورناتىپ كەتكەن ۋزۋرپاتسيانىڭ تالقاندالۋىنا ىقپال ەتكەن دەپۋتات رەتىندە تاريحتا قالۋى كەرەك!

بۇرىن دا جەڭگەنبىز! قۇداي بۇيىرسا، ەراعا، تاعى دا جەڭەمىز!

اۋىت مۇقيبەك

Abai.kz