قر پرەمەر-ءمينيسترىنىڭ اتىنا

تالدامالى ۇسىنىس حات

تاقىرىبى: قازاقستاندا جەمىس-جيدەك جانە باۋ-باقشا شارۋاشىلىعىن دامىتۋ ستراتەگياسىن جەتىلدىرۋ...

قۇرمەتتى پرەمەر-مينيستر!

قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆ 2023 جىلى وتكەن اۋىل شارۋاشىلىعى ەڭبەككەرلەرىنىڭ ءبىرىنشى فورۋمىندا ۇكىمەتكە باۋ-باقشا شارۋاشىلىعىن دامىتۋ، ينفراقۇرىلىمىن جاڭعىرتۋ جانە مەملەكەتتىك قولداۋدى كۇشەيتۋ جونىندە ناقتى تاپسىرمالار بەرگەن بولاتىن.

سونداي-اق سەنات دەپۋتاتى سۇلتان دۇيسەمبينوۆتىڭ 2024 جىلعى پارلامەنت وتىرىسىندا ايتقان بايانداماسى ەلىمىزدىڭ بۇل سالادا جوسپارلانعان مەجەلەرگە جەتپەي وتىرعانىن كورسەتەدى.

اتاپ ايتقاندا:

جەمىس-جيدەك داقىلدارىنىڭ ەگىس كولەمى 2024 جىلى نەبارى 35,3 مىڭ گەكتار بولدى، ال 2030 جىلعا قاراي 1 362 مىڭ گەكتار مەجەلەنگەن.

وندىرىلگەن ءونىم كولەمى — 317,1 مىڭ توننا، بۇل ددۇ ۇسىنعان تۇتىنۋ مولشەرىنىڭ (2,4 ملن توننا) نەبارى 13%-ىن عانا قامتيدى.

ءجۇزىم شارۋاشىلىعى — 9,6 مىڭ گەكتار عانا، بۇل وزبەكستانداعى 133 مىڭ گەكتارمەن سالىستىرعاندا 14 ەسە از.

نەگىزگى پروبلەمالار:

1. مەملەكەتتىك باعدارلامالاردىڭ ناقتى تەتىكتەرى مەن ناتيجەلى مونيتورينگى جوق.
2. سۋ ينفراقۇرىلىمىنىڭ ەسكىرگەنى جانە زاماناۋي تەحنولوگيالاردىڭ از قامتىلۋى.
3. شاعىن شارۋا قوجالىقتارىنا ءتيىمسىز بيۋروكراتيالىق تالاپتار مەن كووپەراتسياعا ماجبۇرلەۋ.
4. ساقتاۋ قويمالارى مەن لوگيستيكالىق جۇيەلەردىڭ جەتكىلىكسىزدىگى.
5. سالا ماماندارى مەن فەرمەرلەر اراسىندا ءبىلىم مەن تاجىريبەنىڭ تاپشىلىعى.

ۇسىنىستار:

1. “اۋلا باقشاسى” باعدارلاماسىن ەنگىزۋ:
وزبەكستان تاجىريبەسى نەگىزىندە اۋىل تۇرعىندارىنا جەكە اۋلاسىندا باۋ-باقشا ەگۋدى ىنتالاندىرىپ، وتكىزىلگەن ءار كەلى ءونىم ءۇشىن سۋبسيديا بەرۋ.
2. تامشىلاتىپ سۋارۋ مەن كولەڭكەلەۋ جۇيەلەرىنە قولجەتىمدى نەسيەلەر:
باسەكەگە قابىلەتتى بولۋ ءۇشىن سۋ پايدالانۋدى ازايتاتىن تەحنولوگيالاردى قولدانۋعا مەملەكەتتەن گرانتتار ءبولۋ.
3. جەمىس-جيدەك ساقتايتىن قويمالار مەن وڭدەۋ تسەحتارىن دامىتۋ:
جەرگىلىكتى كووپەراتيۆتەرگە مەملەكەتتىك-جەكەمەنشىك ارىپتەستىك نەگىزىندە توڭازىتقىش قويمالار سالۋعا قولداۋ كورسەتۋ.
4. ءبىلىم بەرۋ جانە سەرۆيستىك قولداۋ:
فەرمەرلەرگە ارنالعان اگروتەحنيكالىق ترەنينگتەر، ونلاين پلاتفورمالار جانە اگروكەڭەس بەرۋ ورتالىقتارى ۇيىمداستىرۋ.
5. سالا دامۋىنا جاۋاپتى ارنايى وپەراتور قۇرۋ:
«KazAgroFruit» سەكىلدى سالالىق ۇيلەستىرۋ ورتالىعى قۇرىلىپ، ەكسپورت، ستاندارتتاۋ، تەحنيكالىق سۇيەمەلدەۋ مىندەتتەرى جۇكتەلۋى ءتيىس.

قورىتىندى:

پرەزيدەنت تاپسىرماسىنا سايكەس، جەمىس-جيدەك شارۋاشىلىعى ستراتەگيالىق سالا رەتىندە قارالۋى ءتيىس. بۇل — ازىق-تۇلىك قاۋىپسىزدىگى، اۋىل حالقىنىڭ تابىسىن ارتتىرۋ، ەكسپورتتىق الەۋەت پەن جۇمىس ورىندارىن قۇرۋ سىندى ماڭىزدى باعىتتاردى قامتيدى.

وسى ۇسىنىستار ۇكىمەت جانىنداعى ءتيىستى جۇمىس توبى اياسىندا قارالىپ، ۇلتتىق دەڭگەيدەگى جاڭا سالالىق باعدارلاما ازىرلەنسە، 2030 جىلعا دەيىنگى ماقساتتار ناقتى ورىندالار ەدى.

قۇرمەتپەن، وركەن توقتارۇلى

Abai.kz