وقۋ-اعارتۋ مينيسترلىگى ورتا ءبىلىم بەرۋ ۇيىمدارىندا 2025–2026 وقۋ جىلىنىڭ باستالۋ جانە اياقتالۋ مەرزىمدەرىن، سونداي-اق كانيكۋل كەزەڭدەرىن ناقتىلادى. 

ۆەدومستۆونىڭ مالىمەتىنشە، وقۋ پروتسەسى 2025 جىلعى 2 قىركۇيەكتە باستالىپ، 2026 جىلعى 25 مامىردا اياقتالادى. ءبىلىم كۇنىنە ارنالعان سالتاناتتى جيىننىڭ ۋاقىتى مەن كۇنى مەكتەپتىڭ پەداگوگيكالىق كەڭەسىنىڭ شەشىمىمەن بەلگىلەنەدى.

ءبىرىنشى توقساندا وقۋ ۋاقىتى 8 اپتا. كۇزگى كانيكۋل 2025 جىلعى 27 قازاندا باستالىپ، 2 قاراشانى قوسا العانداعى 7 كۇنگە سوزىلادى.

ەكىنشى توقسان 8 وقۋ اپتاسىنان تۇرادى. قىسقى كانيكۋل 2025 جىلعى 29 جەلتوقساندا باستالىپ، 2026 جىلعى 7 قاڭتاردى قوسا العانداعى 10 كۇنگە جالعاسادى. ءبىرىنشى سىنىپ وقۋشىلارى ءۇشىن قوسىمشا دەمالىس 2026 جىلعى 9 اقپاننان 15 اقپاندى قوسا العانداعى 7 كۇندى قۇرايدى.

ءۇشىنشى توقسان 10 وقۋ اپتاسىنان تۇرادى. كوكتەمگى كانيكۋل 2026 جىلعى 19 ناۋرىزدا باستالىپ، 29 ناۋرىزدى قوسا العانداعى 11 كۇنگە سوزىلادى.

ءتورتىنشى توقساننىڭ ۇزاقتىعى 8 وقۋ اپتاسىن قۇرايدى، وقۋ جىلى 2026 جىلعى 25 مامىردا اياقتالادى.

Abai.kz