قازاقستان پرەزيدەنتى قاسىم-جومارت توقاەۆ قازاقستان حالقىنا جولداۋىندا ەلىمىزدەگى تسيفرلاندىرۋ ساياساتىنىڭ قارقىنىنا توقتالدى.

«قازاقستان – الەم قاۋىمداستىعىنىڭ اجىراماس بولىگى. مەملەكەتىمىز ەۋرازيا قۇرلىعىنىڭ ءدال ورتاسىندا ورنالاسقان. قازىرگى زامان بۇلىڭعىر، تۇراقسىز بولسا دا، ءبىز ءبارىمىز جاپپاي تسيفرلاندىرۋ جانە جاساندى ينتەللەكت داۋىرىنە قادام باستىق.

مەنىڭ نەگىزگى ماقساتىم – وسىنداي ءتۇرلى قاتەرگە تولى كەزەڭدە ەلىمىزدىڭ تۇراقتى الەۋمەتتىك-ەكونوميكالىق دامۋىن جانە قاۋىپسىزدىگىن قامتاماسىز ەتۋ. وسكەلەڭ ۇرپاق باقىتتى، بەرەكەلى ءومىر سۇرۋگە ءتيىس. سول ءۇشىن ءبارىمىز ءبىر ۇلت بولىپ، تاباندى ەڭبەك ەتۋىمىز كەرەك. بۇل – بارشامىزعا ورتاق وتە ماڭىزدى جۇمىس، اسا جاۋاپتى ازاماتتىق جانە ۇلتتىق مىندەت.

جۇمىسىمىز قانشالىقتى كۇردەلى بولسا دا، ءبىز مىندەتتى تۇردە تابىسقا جەتۋىمىز كەرەك. باسقا جول جوق. سەبەبى، بۇل – ەلىمىزدىڭ بولاشاعى، حالقىمىزدىڭ تاعدىرى. سوندىقتان، بارلىق رەفورمانى سالماقتى كوزقاراسپەن، مۇقيات، جان-جاقتى ويلاستىرىپ، ساپالى تۇردە جۇزەگە اسىرۋىمىز كەرەك.

بارشاڭىزعا ءمالىم، سوڭعى جىلدارى قازاقستاندا اۋقىمدى وزگەرىستەر جاسالدى. ەلىمىزدىڭ ساياسي جۇيەسى اناعۇرلىم وزىق ءارى اشىق بولا ءتۇستى. ازاماتتارىمىزدىڭ سانا-سەزىمى، بولمىسى وزگەرىپ جاتىر. سونىڭ ارقاسىندا حالقىمىزدىڭ مەملەكەتتىك ينستيتۋتتارعا، زاڭعا جانە ادىلدىك پەن تارتىپكە دەگەن سەنىمى نىعايۋدا. بىراق الدىمىزدا اۋقىمدى جۇمىس بار. قوعامدى جاڭعىرتۋ ءۇشىن ءالى دە كوپ شارۋا اتقارۋىمىز كەرەك.

قازىر ەل ەكونوميكاسىندا رەفورمالار جۇرگىزىلىپ جاتىر. ينفراقۇرىلىمعا جانە جاڭا ءوندىرىس ورىندارىن اشۋعا قوماقتى ينۆەستيتسيا سالىنىپ جاتىر. مۇنىڭ ءبارى حالىقتىڭ ءال-اۋقاتىن جانە ەلىمىزدىڭ الەۋەتىن ارتتىرۋ ءۇشىن جاسالىپ جاتقانى ايدان انىق. جاساندى ينتەللەكتىنىڭ قارقىندى دامۋى قازىردىڭ وزىندە حالىقتىڭ، اسىرەسە جاستاردىڭ مىنەز-قۇلقى مەن بولمىس-بىتىمىنە اسەر ەتىپ جاتىر. باسقاشا بولۋى مۇمكىن ەمەس، سەبەبى بۇل ءۇردىس بۇكىل الەمدە قالىپتاسقان ءتارتىپتى جانە ادامداردىڭ ءومىر ءسۇرۋ سالتىن ءبىرجولا وزگەرتۋدە. ءبىز بۇعان دايىن بولىپ، باتىل ارەكەت ەتۋىمىز كەرەك. ايتپەسە، ارتتا قالۋدىڭ سالدارى وتە اۋىر بولادى. سوندىقتان مەن الدىمىزعا وتە ماڭىزدى ستراتەگيالىق ماقسات قويدىم. قازاقستان ءۇش جىل ىشىندە مىندەتتى تۇردە جاپپاي تسيفرلىق ەل بولۋى كەرەك»، - دەدى مەملەكەت باسشىسى.

Abai.kz