قازاقستاننىڭ اگروونەركاسىپتىك كەشەنىندە تسيفرلىق تەحنولوگيالار مەن جاساندى ينتەللەكت نەگىزىندەگى شەشىمدەر بەلسەندى تۇردە ەنگىزىلۋدە. بۇل قۇرالدار شارۋالارعا ءوندىرىس تيىمدىلىگىن ارتتىرۋعا، رەسۋرستاردى وڭتايلى پايدالانۋعا جانە بارلىق پروتسەستەردىڭ اشىقتىعىن قامتاماسىز ەتۋگە مۇمكىندىك بەرەدى.

قازىرگى تاڭدا 648 اۋىل شارۋاشىلىعى تاۋارىن ءوندىرۋشى ءوز قىزمەتىندە تسيفرلىق شەشىمدەردى پايدالانىپ وتىر. كورسەتكىشتىڭ قارقىندىلىعى جاقسى جانە تەحنولوگيالاردى ءىس جۇزىندە قولدانۋ مەن فەرمەرلەردىڭ قىزىعۋشىلىعى ارتقان سايىن ءوسىپ كەلەدى.

كاسىپورىنداردىڭ ىشىندە 396-سى وسىمدىك سالاسىندا، 211-ءى مال شارۋاشىلىعىندا، ال 41 كاسىپورىن ونىمدەردى قايتا وڭدەۋ باعىتىندا تسيفرلىق تەحنولوگيالاردى قولعا الىپ وتىر.

وسىمدىك شارۋاشىلىعىندا نەگىزىنەن ەگىنشىلىك تەحنولوگيالارى كەڭىنەن تارالۋدا. اۋىل شارۋاشىلىعى وندىرۋشىلەرى GPS-ناۆيگاتسيانى، درونداردى، سەنسورلاردى جانە اناليتيكالىق پلاتفورمالاردى قولدانادى. بۇل قۇرالدار ناقتى ۋاقىت رەجيمىندە توپىراقتىڭ، ەگىستىكتەردىڭ جانە اۋا رايىنىڭ جاعدايىن باقىلاۋعا مۇمكىندىك بەرەدى.

مۇنداي شەشىمدەر ەگىس جۇمىستارىن اۆتوماتتاندىرۋعا، تىڭايتقىشتار مەن وسىمدىكتەردى قورعاۋ قۇرالدارىن ديففەرەنتسيالدى ەنگىزۋگە، سونداي-اق باسقارۋشىلىق شەشىمدەردى وڭتايلاندىرۋعا جاعداي جاسايدى. ناتيجەسىندە ونىمدىلىك ارتىپ، وندىرىستىك شىعىندار ازايادى جانە ادامي فاكتوردىڭ ىقپالى تومەندەيدى.

مال شارۋاشىلىعىندا تسيفرلاندىرۋ ءىس جۇزىندە بارلىق كەزەڭدەردى، مالدى ازىقتاندىرۋ مەن دەنساۋلىعىن باقىلاۋدان باستاپ، ميكروكليمات پەن تابىن ونىمدىلىگىن باسقارۋعا دەيىن قامتيدى.

قازىرگى ۋاقىتتا وڭىرلەردە 104 زاماناۋي ءسۇت-تاۋارلى فەرما جانە 30 بورداقىلاۋ الاڭى جۇمىس ىستەيدى، وندا IoT جۇيەلەرى ەنگىزىلگەن. بۇل شەشىمدەر جانۋارلاردىڭ ومىرلىك كورسەتكىشتەرىن اۆتوماتتى تۇردە باقىلاۋعا، ازىقتاندىرۋ راتسيونىن رەتتەۋگە جانە تۇراقتى ۇستاۋ جاعدايلارىن قامتاماسىز ەتۋگە جول اشادى.

تەحنولوگيالاردى قولدانۋ ونىمدىلىكتىڭ ارتۋىنا، ءونىم ساپاسىنىڭ جاقسارۋىنا جانە وندىرىستىك شىعىنداردىڭ تومەندەۋىنە ىقپال ەتەدى.

اۋىل شارۋاشىلىعى ونىمدەرىن قايتا وڭدەۋ سالاسىندا كاسىپورىندار تەحنولوگيالىق پروتسەستەردى باسقارۋدىڭ اۆتوماتتاندىرىلعان جۇيەلەرىن ەنگىزۋدە. بۇل وندىرىستىك كەزەڭدەردى وڭتايلاندىرىپ، جابدىقتى ءتيىمدى پايدالانۋعا جانە شىعىنداردى ازايتۋعا سەپتىگىن تيگىزەدى.

200-دەن استام كاسىپورىن Smart-فەرمالار ساناتىنا جاتادى، مۇندا تسيفرلىق تەحنولوگيالار ەگىنشىلىكتەن باستاپ دەرەكتەردىڭ ينتەللەكتۋالدى تالداۋىنا دەيىن كەشەندى تۇردە قولدانىلادى.

مۇنداي شارۋاشىلىقتار درونداردى، سپۋتنيكتىك ناۆيگاتسيالىق جۇيەلەردى، سەنسورلار مەن تسيفرلىق پلاتفورمالاردى پايدالانىپ، ەگىستىكتەردىڭ جاعدايى تۋرالى دەرەكتەردى جەدەل الىپ، ونىمدىلىكتى بولجاۋعا جانە عىلىمي نەگىزدەلگەن شەشىمدەر قابىلداۋعا مۇمكىندىك بەرەدى.

تسيفرلىق تەحنولوگيالارعا دەگەن بەلسەندىلىك اقمولا، سولتۇستىك قازاقستان، پاۆلودار، قوستاناي جانە جەتىسۋ وبلىستارىندا بايقالادى. بۇل وڭىرلەردە اۋىل شارۋاشىلىعى ءوندىرىسى مەن قايتا وڭدەۋ سالاسىندا جاساندى ينتەللەكت ەلەمەنتتەرىن، اۆتوماتتاندىرۋدى جانە مونيتورينگ جۇيەلەرىن قولدانۋدىڭ تۇراقتى تاجىريبەسى قالىپتاسقان.

اۋىل شارۋاشىلىعىندا تسيفرلىق تەحنولوگيالاردى ەنگىزۋ اگرارلىق كاسىپورىنداردىڭ تيىمدىلىگى مەن باسەكەگە قابىلەتتىلىگىن ارتتىرۋعا، ماتەريالدىق جانە تابيعي رەسۋرستاردى ۇتىمدى پايدالانۋعا، ەڭبەك ونىمدىلىگىن وسىرۋگە جانە Smart Farming — بولاشاقتىڭ ينتەللەكتۋالدى اۋىل شارۋاشىلىعىنا كوشۋگە نەگىز قالايدى.

سالاداعى تسيفرلاندىرۋ ەلىمىزدىڭ اۋىل شارۋاشىلىعىنىڭ تۇراقتى دامۋىنىڭ نەگىزگى فاكتورلارىنىڭ ءبىرى، ول سالانىڭ تەحنولوگيالىق جاڭعىرۋىن جانە ەلدىڭ ازىق-تۇلىك قاۋىپسىزدىگىن ارتتىرۋدى قامتاماسىز ەتەدى.

Abai.kz