جەتىسۋ وبلىسىندا وبلىس اكىمى بەيبىت يساباەۆتىڭ توراعالىعىمەن جاڭا كونستيتۋتسيا جوباسىن تالقىلاۋعا ارنالعان ءوڭىر اكتيۆىمەن كەزدەسۋ ءوتتى. كەڭەسكە اۋدان جانە قالا اكىمدەرى، باسقارمالار مەن اۋماقتىق دەپارتامەنتتەردىڭ باسشىلارى، ءماسليحات دەپۋتاتتارى، قۇقىق قورعاۋ ورگاندارىنىڭ وكىلدەرى، وبلىستىق قوعامدىق كەڭەس مۇشەلەرى جانە بۇقارالىق اقپارات قۇرالدارىنىڭ وكىلدەرى قاتىستى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

— قازاقستان رەسپۋبليكاسى پرەزيدەنتىنىڭ 2026 جىلعى 21 قاڭتارداعى جارلىعىنا سايكەس كونستيتۋتسيالىق رەفورما جونىندەگى كوميسسيا قۇرىلدى. ونىڭ اياسىندا ەنگىزىلەتىن وزگەرىستەردى تالقىلاۋ ءۇشىن جۇمىس توبى جاساقتالدى. اتالعان توپتىڭ قۇرامىنا وبلىستىق ءماسليحات توراعاسى گۇلنار تويلىباەۆا ەنگىزىلدى. بۇگىنگى كۇنگە دەيىن كونستيتۋتسيالىق كوميسسيانىڭ التى وتىرىسى وتكىزىلدى، — دەدى ءوڭىر باسشىسى.

ودان كەيىن جاڭا كونستيتۋتسيا جوباسى بويىنشا جان-جاقتى تۇسىندىرمە جاساعان گۇلنار تويلىباەۆا كونستيتۋتسيانىڭ 77 بابىنا تۇزەتۋلەر ەنگىزىلگەنىن اتاپ ءوتتى.

بەيبىت يساباەۆتىڭ ايتۋىنشا، مەملەكەت باسشىسى باستاماشى بولعان كونستيتۋتسيالىق رەفورما ەل تاريحىنداعى ماڭىزدى كەزەڭگە اينالدى. نەگىزگى زاڭنىڭ جاڭا جوباسى — ساراپشىلار مەن ازاماتتىق قوعام وكىلدەرىنىڭ التى ايلىق ەڭبەگىنىڭ ناتيجەسى.

— نەگىزگى زاڭعا ەنگىزىلىپ وتىرعان تۇجىرىمدامالىق وزگەرىستەر مەملەكەتتىڭ ادامعا باعىتتالعان سيپاتىن كۇشەيتۋگە باعىتتالعان. ادىلەتتى قازاقستان يدەياسى مەن «زاڭ مەن ءتارتىپ» قاعيداتى كونستيتۋتسيالىق باعدار رەتىندە بەكىتىلۋدە. مەملەكەت ازاماتتاردىڭ قۇقىقتارى مەن بوستاندىقتارىن قامتاماسىز ەتۋگە، ءومىر ءسۇرۋ ساپاسىن ارتتىرۋعا جانە ءوزىن-ءوزى جۇزەگە اسىرۋىنا جاعداي جاساۋعا جاۋاپكەرشىلىك الادى. بۇل جوبا ءاربىر ادام ءوزىنىڭ قۇندىلىعى مەن ماڭىزدىلىعىن سەزىنەتىن كۇشتى، زاماناۋي ءارى ورنىقتى قازاقستاننىڭ بەرىك نەگىزىن قالايدى. ءوڭىر تۇرعىندارى جوبانىڭ ەل مەن ايماق بولاشاعى ءۇشىن ماڭىزىن تەرەڭ تۇسىنە وتىرىپ، وعان كەڭ قىزىعۋشىلىق تانىتۋدا، — دەپ قورىتىندىلادى وبلىس اكىمى.

كەزدەسۋ بارىسىندا ءوڭىر اكتيۆىنىڭ وكىلدەرى كونستيتۋتسيالىق وزگەرىستەردى قولداپ، ولاردى وبلىستىڭ بارلىق تۇرعىندارىن كەڭىنەن تارتا وتىرىپ، اشىق تۇردە تالقىلاۋدىڭ ماڭىزدىلىعىن اتاپ ءوتتى.

Abai.kz